ތުރުކީއަށް ދަތުރުފުޅެއް ކުރެއްވުމަށް ރައީސް ރަޖަބް ތައްޔިބު އޮރްދޮޣާން ދެއްވި ދައުވަތު އެމެރިކާގެ ރައީސް ޑޮނަލްޑް ޓްރަމްޕް ގަބޫލުފުޅުކުރައްވައިފި ކަމަށް ތުރުކީގެ ރައީސްގެ ތަރުޖަމާނު ވިދާޅުވެއްޖެއެވެ.
ވެރިރަށް އަންކާރާގައި ހޯމަ ދުވަހު ބޭއްވި ކެބިނެޓްގެ ބައްދަލުވުމަކަށް ފަހު ނޫސްވެރިންނާ ވާހަކަ ދައްކަވަމުން އިބްރާހިމް ކާލިން ވިދާޅުވީ ޓްރަމްޕް ބޭނުންފުޅުވަނީ 2019 ވަނަ އަހަރު އެ ދަތުރުފުޅު ކުރައްވަން ކަމަށާއި ނަމަވެސް އަދި ތާރީޚެއް ހަމަ ނުޖެހޭ ކަމަށެވެ.
ވައިޓް ހައުސްއިން ވަނީ އަންނަ އަހަރު ޓްރަމްޕް ޒިޔާރަތްކުރެއްވުމަށް ދައުވަތު ލިބިފައިވާކަން ކަށަވަރުކޮށްދީފައެވެ.
ރައީސް ޓްރަމްޕް ވަނީ މިދިޔަ އަހަރުގެ މެއި މަހު އޮރްދޮޣާންއާ ވައިޓް ހައުސްގައި ބައްދަލުކުރައްވާފައެވެ.
ކާލިން ވިދާޅުވީ ރައީސް ޓްރަމްޕްއަށް އޮރްދޮޣާން ދައުވަތު އެރުވީ، އެމެރިކާގެ ސިފައިން ސީރިޔާ އިން ބޭލުމަށް ރައީސް ޓްރަމްޕް ނިންމެވި ނިންމެވުމާގުޅިގެން މަޝްވަރާކުރެއްވުމަށް މިދިޔަ ހަފްތާ ބަންދުގައި އޮރްދޮޣާން ކުރެއްވި ފޯން ކޯލްގައި ކަމަށެވެ. އެ
އެމެރިކާގެ ސިފައިން ސީރިޔާއިން ބޭލުމަށް ރައީސް ޓްރަމްޕް ނިންމެވި ނިންމެވުމާ ގުޅިގެން މަޝްވަރާކުރެއްވުމަށް އެމެރިކާގެ އަސްކަރިއްޔާގެ ވަފުދެއް މި ހަފްތާގައި ތުރުކީއަށް ދާނެ ކަމަށް ތުރުކީ ރައީސްގެ ތަރުޖަމާނު ވިދާޅުވިއެވެ.
