އިންޑޮނޭޝިޔާއަށް ހޮނިހިރު ދުވަހުގެ ރޭ ސުނާމީ އެރި އިރު މިއުޒިކް ޝޯއެއްގައި ތިބި ބަޔަކު ރާޅާ އެކީ ދަމައި ގަނެގެންދާ ވީޑިއޯއެއް އާއްމުވެއްޖެއެވެ.
"ސެވަންޓީން" ނަމަކަށް ކިޔާ މި ބޭންޑު ޝޯ ހުށައަޅަމުން ދިޔައީ އިންޑޮނޭޝިއާގެ ބަންޓެން ޕްރޮވިންސުގެ ރިސޯޓެއްގައެވެ. އެ މީހުން ޝޯ ދޭން ތިބި ސްޓޭޖް ފަހަތުން އެރި ރާޅުގައި ބޭންޑުގެ މެމްބަރުންނާއި ކުޅެން ގެންގުޅޭ ސާމާނު އައީ ޝޯ ބަލަން ގޮސް ތިބި މީހުންގެ ގަޔާއި ދިމާލަށެވެ.
NEW: Video shows a tsunami crashing into a venue in Indonesia where the band Seventeen was performing https://t.co/4P9zDCRkKC pic.twitter.com/q9RYOaPTt8
— BNO News (@BNONews) December 23, 2018
މި ހަދިސާގައި ޝޯ ހުށައަޅައިދޭން ތިބި ބޭންޑުގެ މެމްބަރުންގެ ތެރެއިން ސަލާމަތްވީ ލީޑް ވޯކަލިސްޓު ރީފިއަން ފަޖަރްސްޔާ އެކަންޏެވެ. ބޭންޑުގެ ބޭސިސްޓް ބާނީ އާއި ރޯޑް މެނޭޖަރު އޯކީ ވިޖަޔަ މަރުވެފައިވާ އިރު، ބޭންޑުގެ ބާކީ ތިބި މެމްބަރުންނާއި ކްރޫއިން ވީނުވީ ތަނެއް އަދި ނޭނގޭ ކަމަށް ބޭންޑުގެ ފަރާތުން ނެރުނު ބަޔާނެއްގައި ވަނީ ބުނެފައެވެ. ގެއްލުނު މީހުންގެ ތެރޭގައި ރީފިއަންގެ އަންހެނުން ވެސް ހިމެނޭ ކަމަށް މައުލޫމާތު ވަނީ ލިބިފައެވެ.
އިންޑޮނޭޝިޔާގެ ސުންޑާ ސްޓްރެއިޓްގެ އައްސޭރިއަށް އެރި ސުނާމީގައި މިހާ ތަނަށް 280 މީހުން މަރުވެފައިވާ ކަމުގެ މައުލޫމާތު ވަނީ ލިބިފައެވެ. އިންޑޮނޭޝިޔާގެ މީޓިއޮރޮލޮޖީ އެންޑް ޖިއޯފިޒިކްސް އެޖެންސީއިން ބުނެފައި ވަނީ ސުނާމީ އަރަން މެދުވެރިވީ، އަލިފާން ފަރުބަދަ އަނަކް ކްރަކަޓާއޫ ގޮވުމުގެ ސަބަބުން ބިންގަނޑު ކަނޑައިގެން ދިޔުމާއި ގުޅިގެން ކަމަށް ލަފާކުރެވޭ ކަމަށެވެ.
