ފަތުރުވެރިންގެ ތެރޭގައި މަގުބޫލު އިންޑިއާގެ ގޯއާގައި، އިނގިރޭސިވިލާތުގެ 48 އަހަރުގެ އަންހެނަކު ރޭޕްކޮށްފިއެވެ.

އެ އަންހެން މީހާ ރޭޕްކޮށްފައިވަނީ އަނބުރާ ހޮޓަލަށް ދިޔަ މަގުމަތީގައެވެ. މި ރޭޕްގެ ތުހުމަތުގައި 31 އަހަރުގެ އިންޑިއާ ފިރިހެނަކު ހައްޔަރު ކޮށްފައިވާ ކަން ގޯއާގެ ފުލުހުން ވަނީ ކަށަވަރުކޮށް ދީފައެވެ. އިންޑިއާ މީހާގެ މައްޗަށް ވައްކަމުގެ ތުހުމަތު ވެސް ކުރާ ކަމަށް ފުލުހުން ވަނީ ބުނެފައެވެ.

މައުލޫމާތު ލިބިފައިވާ ގޮތުގައި އެ ފިރިހެން މީހާ މި އަންހެން މީހާ ރޭޕްކުރީ ގޯއާގެ މަޝްހޫރު ޕަލޯލެމް ބީޗް ކައިރީގައި ހުރި ދަނޑެއްގެ ތެރެއަށް ގެންދިޔުމަށް ފަހުއެވެ.

ދިއްލީގައި ހުންނަ އިނގިރޭސި ހައި ކޮމިޝަނުން ދަނީ އަންހެން މީހާއަށް އެހީތެރިވުމުގެ ގޮތުން ކުރެވެން ހުރި ހުރިހާ ކަމައް ކުރަމުން ކަމަށް އެ ކޮމިޝަނުން ވަނީ ބުނެފައެވެ.

ފަތުރުވެރިންގެ ތެރޭގައި މަގުބޫލު ގޯއާއަށް މިދިޔަ އަހަރު އެކަނިވެސް 270000 މީހުން ޒިޔާރަތް ކޮށްފައިވާ ކަމަށް އިންޑިއާގެ ޓޫރިޒަމް މިނިސްޓްރީއިން ވަނީ ބުނެފައެވެ. ނަމަވެސް މި ފަހުން ރޭޕްގެ މައްސަލަތަކެއް ހިނގާފައިވާތީއްވެ ގޯއާގެ ރީތި ނަމަށް ވަނީ ބުރޫ އަރާފައެވެ. އިންޑިއާގައި ދުވާލަކު 100 ރޭޕް މައްސަލަ ރިޕޯޓް ކުރެއެވެ.