އަފްޢާނިސްތާނުގައި ހަރަކާތްތެރިވާ އެމެރިކާގެ ސިފައިން ކުރިއަށް އޮތް ދުވަސް ތަކުގައި އެ ގައުމުން ފައިބާނެ ކަމަށް ރިޕޯޓްތައް ބުނެފިއެވެ.

އެމެރިކާގެ ޑިފެންސް އޮފިޝަލުންނާ ހަވާލާދީ ރިޕޯޓްތައް ބުނާ ގޮތުގައި 7,000 ސިފައިން ފައިބަން ހަމަޖެހިފައިވާ ކަމަށެވެ. މި އަދަދަކީ އަފްޢާނިސްތާނުގައި ހަރަކާތްތެރިވާ ސިފައިންގެ ތެރެއިން ދެބައި ކުޅައި އެއްބައި ސިފައިންނެވެ.

އެމެރިކާގެ 14،000 ހާހެއްހާ ސިފައިންގެ އަފްޢާނިސްތާނުގައި ހަރަކާތްތެރި ވަމުންދާ އިރު، ސިފައިން ވަނީ އެކި ބައިތަކަށް ބަހާލާފައިއެވެ.

އޭގެ ތެރޭގައި ޓްރޭނިންގައި ހަރަކާތްތެރިވާ ސިފައިންނާއި، އަފްޢާންގެ ސިފައިންނަށް އެޑްވައިޒް ދޭ ސިފައިންގެ އިތުރުން އައިއެސް، އަލް ގައިދާ ޖަމާއަތްތަކާއި ހަނގުރާމަ ކުރާ ސިފައިން ވެސް ހިމެނެއެވެ. 

ބައެއް މަސްދަރުތައް ބުނާ ގޮތުގައި އެމެރިކާ ސިފައިން މަދު ކުރުމުގެ ބޭނުމަކީ އަފްޢާނިސްތާނުގެ ސިފައިންނަށް ޖާގާ ދިނުމުގެ ގޮތުން ކަމަށެވެ.

އެމެރިކާ ސިފައިން ފޭބުމަށް ނިންމުމާއި ގުޅިގެން ތާލިބާނުންގެ އޮފިޝަލަކު ބުނީ، އެމެރިކާ ސިފައިން ފައިބައިފާނެ ކަމަށް ހީކޮށްފައި ނުވާކަމަށެވެ. ނަމަވެސް އެމެރިކާގެ ނިންމުމަށް އުފާ ކުރާ ކަމަށް އެ އޮފިޝަލާއި ހަވާލާދީ ރިޕޯޓްތައް ބުނެއެވެ.

ރިޕޯޓްތައް ބުނާގޮތުގައި އެމެރިކާއިން ސިފައިން ފައިބާނެ ކަމުގެ އިޝާރާތެއް އަފްޢާނިސްތާނުގެ އެއްވެސް ފަރާތަކަށް މީގެ ކުރިން އެމެރިކާ އިން ދީފައި ނުވާކަމަށެވެ.

އެމެރިކާ ސިފައިން އަފްޢާނިސްތާނަށް އަރާފައިވަނީ 2001 ވަނަ އަހަރު ސެޕްޓެމްބަރު މަހު 11 ވަނަ ދުވަހު އެމެރިކާގެ ޓްރޭޑް ސެންޓަރު ގޮއްވާލި ހާދިސާ އަށް ފަހުއެވެ. 

އެމެރިކާ ސިފައިން ފައިބާނެ ކަމަށް ރިޕޯޓްތައް ބުނާއިރު، ސީރިއާގައި ހަރަކާތްތެރިވާ އެމެރިކާގެ ސިފައިންވެސް ފައިބާނެ ކަމަށް ރައީސް ޑޮނާލްޑް ޓްރަމްޕް ވަނީ ވިދާޅުވެފައެވެ. އެމެރިކާ ސިފައިން ސީރިއާއިން ފޭބުމާއި ބެހޭ ގޮތުން ރައީސް ޓްރަމްޕާއި ހިޔާލު ތަފާތު ވުމުގެ ސަބަބުން އެމެރިކާގެ ޑިފެންސް ސެކްރެޓަރީ ޖިމް މެޓިސް ވަނީ އިސްތިއުފާ ދެއްވާފައެވެ.