އިސްލާމިކް ސްޓޭޓް (އައިއެސް)ގެ ނަމުގައި އުޅެމުންދިޔަ ޖަމާއަތް "ބަލިކުރެވިއްޖެ" ކަމަށް ރައީސް ޓްރަމްޕް ވިދާޅުވެފައިވަނިކޮށް ސީރިޔާގައި އުޅޭ އެމެރިކާގެ ސިފައިން އެ ގައުމުން ބޭލުމަށް އެމެރިކާއިން ނިންމައިފިއެވެ.
ޕެންޓަގަންއިން ބުނީ އެ ބަދަލުވަނީ އެ ހަނގުރާމައިގެ އެެހެން ހަރުފަތަކަށް ކަމަށެވެ. ނަމަވެސް ތަފްސީލެއް ނުދެއްވައެވެ.
ސީރިޔާގެ އިރުއުތުރުން އައިއެސް ފައްސާލުމަށް އެމެރިކާގެ 2000 އެއްހާ ސިފައިން މަސައްކަތްކޮށްފައިވެއެވެ. ނަމަވެސް ބައެއް ތަންތަންކޮޅުގައި ކޮންމެވެސް ވަރަކަށް ހަނގުރާމަވެރިން އުޅެމުންދެއެވެ.
އައިއެސް އަލުން ވަރުގަދަވެގެން ނާންނާކަން ކަށަވަރުވަންދެން އެމެރިކާގެ ސިފައިން ތިބޭނެކަމަށް ކުރިންވަނީ ބެލެވިފައެވެ.
މީގެ އިތުރުން އެމެރިކާގެ ފައުޖުތައް އަނބުރާ ގެންދިއުމުން ރަޝިއާއާއި އިރާނުގެ ނުފޫޒު ސީރިއާއަދި ސަރަހައްދުގައި ބޮޑުވެދާނެކަމުގެ ބިރުވަނީ ބޮޑުވެފައެވެ.
ހަނގުރާމައިގެ އެެހެން ހަރުފަތަކަށް ބަދަލުވަނީކަމަށް ބުނުމަށްފަހު އިތުރު ތަފްސީލް ނުދޭނެކަމަށް ޕެންޓަގަންއިންވަނީ ބުނެފައެވެ. ޕެންޓަގަންއިން ބުނީ އެހެންހެދި ސަބަބަކީ ސިފައިންގެ ސަލާމަތަށާއި އޮޕަރޭޝަންގެ ސަލާމަތީ ސަބަބުތަކަށްޓަކަައިކަމަށެވެ.
ވައިޓް ހައުސްއިން ބުނީ އެގައުމާއި އެ ގަައުމުގެ ބައިވެރިންތިބީ އެމެރިކާގެ މަސްލަހަތ ހިމެނޭ ކޮންމެ ކަމެއް ދިފާއުކުރަން ޖެހިއްޖެ ހާލަތެއްގައި ކޮންމެ ލެވެލްއެއްގައިވެސް އަލުން މަސައްކަތްފެށުމަށް ތައްޔާރަށްކަމަށެވެ.
ރައީސް ޓްރަމްޕް ވިދާޅުވެފައިވަނީ މިއީ ތާރީޚީ ނަސްރަށްފަހު ސިފައިން އަނބުރާ ގައުމަށް ގެންދަންވީ ވަގުތުކަމަށެވެ.
