ސައުދީއަށް ހަތިޔާރު ވިއްކަން ވެފައިވާ 13 ބިލިއަން ޑޮލަރުގެ އެއްބަސްވުން އުވާލެވޭނެ ގޮތެއް ބަލަމުންދާ ކަމަށް ކެނެޑާގެ ބޮޑުވަޒީރު ޖަސްޓިން ޓްރޫޑޯ ވިދާޅުވެއްޖެއެވެ.
ޓްރޫޑޯ މީގެ ކުރިން ވިދާޅުވެފައިވަނީ މި އެއްބަސްބުން އުވާލުމުން ދައްކަން ޖެހޭ ފައިސާގެ އަދަދު ބޮޑު ކަމުން، އެކަން ކުރަން ފަސްޖެހިވަޑައިގަންނަވާ ކަމަށެވެ. ނަމަވެސް މި ހަތިޔާރުތަކުގެ ބޭނުން ނަހަމަ ގޮތުގައި ހިފާފައިވާނަމަ، މި ހަތިޔާރުތައް ބޭރު ކުރުމަށް ދޫކޮށްފައި އޮތް އެކްސްޕޯޓް ހުއްދަ އުވާލެވޭނެ ކަމަށްވެސް ޓްރޫޑޯ ވަނީ ވިދާޅުވެފައެވެ.
ކެނެޑާގެ ކުރީގެ ސަރުކާރުން ވެފައިވާ އެއްބަސްވުން އުވާލައިފިނަމަ 1 ބިލިއަން ޑޮލަރުގެ ޖޫރިމަނާއެއް ދައްކަން ޖެހޭ ކަން ޓްރޫޑޯ ވަނީ ހާމަކޮށްފައެވެ. އެހެން ނަމަވެސް އިދިކޮޅު ފަރާތްތަކުން ވަނީ، ޖަމާލް ހަޝޯގީގެ މަރުގެ މައްސަލައާއި ޔަމަނުގައި ކުރަމުން ގެންދާ ހަނގުރާމައާއި ގުޅިގެން މި އެއްބަސްވުން އުވާލަން ޓްރޫޑޯއަށް ގޮވާލައްވާފައެވެ.
ޓްރޫޑޯ ވަނީ "ރަނގަޅަށް" ކަން ކުރުމުގެ ނިޔަތުގައި 1 ބިލިއަން ޑޮލަރު ކެނެޑާގެ ރައްޔިތުންގެ ބޮލުގައި އެޅުވުމުގެ ކުރިން ވަރަށް ވިސްނަން ޖެހޭ ކަމަށް ވިދާޅުވެފައެވެ.
ސައުދީއަށް މި ހަތިޔާރު ވިއްކާ ކުންފުނި ކަމުގައިވާ ޖެނެރަލް ޑައިނަމިކްސްއިން ބުނެފައިވަނީ މި އެއްބަސްވުން އުވާލައިފި ނަމަ އެ ކުންފުންޏަށާއި ކެނެޑާގެ އޮޓާވާގެ ސަރަހައްދީ ސަރުކާރަށްވެސް ގެއްލުން ވާނެ ކަމަށެވެ.
އިންސާނީ ހައްގުތަކަށް މަސައްކަތް ކުރާ ޖަމިއްޔާތަކުން 2016 ވަނަ އަހަރުން ފެށިގެން ދަނީ ސައުދީއާއި އެކު ވެފައިވާ އެއްބަސްވުން އުވާލުމަށް ޓްރޫޑޯއަށް ސިޓީ ފޮނުވަމުންނެވެ. މި ކަމުގެ ސަބަބެއްގެ ގޮތުގައި އެ ފަރާތްތަކުން ފާހަގަ ކޮށްފައިވަނީ، ޔަމަނުގައި ތިބި ކުށެއް ނެތް އާންމުން މެރުމަށް މި ހަތިޔާރުތައް ބޭނުން ކުރެވެމުން ދާ ކަމެވެ.
ސައުދީއާއި ކެނެޑާގެ ގުޅުން ގޯސްވާން ފެށީ މި އަހަރުގެ ކުރީކޮޅު، ސައުދީއިން ހައްޔަރު ކޮށްފައިވާ އަންހެނުންގެ ހައްގުތަކަށް ވަކާލާތު ކުރާ އެކްޓިވިސްޓުންތަކެއް ދޫކޮށްލަން ކެނެޑާއިން ގޮވާލުމާއި ގުޅިގެންނެވެ. އޭގެ ފަހުން، އޮކްޓޫބަރު މަހު ސައުދީ އެމްބަސީގެ ތެރޭގައި ޙަޝޯގީ މަރާލި ހިސާބުން މި ގުޅުން ވަނީ އިތުރަށް ގޯސްވެފައެވެ.
