މަގާމުން ދުރުކޮށްފައިވާ ސްރީލަންކާގެ ބޮޑު ވަޒީރު ރަނިލް ވިކްރަމަސިންހަ އަލުން ބޮޑު ވަޒީރުކަމާއި ހަވާލުވާން އުޅޭ ކަމުގެ އަޑުތަކެއް އަރާފިއެވެ.
ލަންކާގައި ހުންނަ ބީބިސް ކޮރަސްޕޮންޑެންޓް އައްޒާމް އަމީން މިރޭ ކުރި ޓްވީޓެއްގައި ބުނީ ރަނިލް ބޮޑު ވަޒީރު ކަމަށް ގެނައުމަށްޓަކައި ރައީސް މައިތުރިޕާލަ ސިރިސޭނާއި ރަނިލް އާއި ދެމެދު ފޯނުން މިރޭ ވާހަކަ ދެކެވިފައިވާކަމުގެ މައުލޫމަތު އޭނާއަށް ލިބިފައިވާ ކަމަށެވެ.
ރަނިލް ބޮޑުވަޒީރު ކަމުގެ ހުވާކުރުން އޮންނާނީ އަދީއްތަ ދުވަހު ލަންކާ ގަޑިން 10 ޖަހާއިރު ކަމަށް އައްޒާމް ވަނީ ބުނެފައެވެ. އައްޒަމް ބުނީ އޭނާއަށް މައުލޫމާތު ދީފައިވަނީ ޔޫއެންޕީގެ މެމްބަރު ރަޖިތަ ސެނަރަތްނަ ކަމަށެވެ.
ނަމަވެސް ރައީސް ސިރިސޭނާ ވަނީ ރަނިލް އާއިއެކު މަސައްކަތް ކުރަން ބޭނުންފުޅު ނުވާކަމަށް މީގެ ކުރިން ވިދާޅުވެފައެވެ. މިހާރު ބޮޑުވަޒީރު ކަމުގައި ހުންނެވި މަހިންދްރަ ރާޖަ ޕަކްސާ މާދަމާގެ ވަގުތެއްގައި އިސްތިއުފާ ދޭއްވާނެ ކަމަށް ލަންކާގެ ޑެއިލީ މިރާއިން ރިޕޯޓް ކުރެއެވެ.
