ބޮޑުވަޒީރުކަމަށް އަލުން އައްޔަން ކުރުމަށް އަޣުލަބިއްޔަތު މެމްބަރުން ތާއީދުކުރުމަކީ 26 އޮކްޓޯބަރގައި ގެނައި ބަޣާވާތް ބަލިކޮށްލުމަށް އަނެއްކާވެސް އިތުރަށް އެޅުނު ފިޔަވަޅެއްކަމަށް ސްރީ ލަންކާގެ ކުރީގެ ބޮޑުވަޒީރު ރަނިލް ވިކްރަމް ސިންގހަ ވިދާޅުވެއްޖެއެވެ.
ޔޫއެންޕީގެ ލީޑަރު ރަނިލް މިހެން ވިދާޅުވީ ބޮޑުވަޒީރުކަމަށް ރަނިލް އަލުން އައްޔަންކުރަން ފެންނަ ކަމަށް ގާނޫނު ހަދާ މަޖިލީހުގައި ބުރާސްފަތި ދުވަހު ނެގި ވޯޓަށް ފަހު ވާހަކަދައްކަވަމުންނެވެ.
ރަނިލްވަނީ އޭނާއަށް ސަރުކާރު އެކުލަވާލުމުގެ ފުރުސަތު އަލުން ދީފިނަމަ ތަރައްގީގެ އާ ޕްލޭންތަކާއެކު މަސައްކަތްކުރައްވާނެ ކަމަށް ވައުދުވެވަޑައިގެންފައެވެ.
ރަނިލްވަނީ ގައުމު ބައިބައިނުވާނެ ގޮތަށް ގައުމީ ބޮޑެތި މައްސަލަތަކަށް ހައްލު ގެންނަވާނެ ކަމަށް ވައުދުވެ ވަޑައިގެންފައެވެ.
ރަނިލްވަނީ އެ މަނިކުފާނަށް ތާއީދުކޮށްދެއްވި މެމްބަރުންނަށާއި ގާނޫނުހަދާ މަޖިލީހުގެ ރައީސް ކަރޫ ޖަަޔަސޫރިއާއަށް ގާނޫނު ހަދާ މަޖިލީހުގެ ދައުރު ރައްކާތެރިކޮށްދެއްވީތީ ޝުކުރުއަދާކުރައްވާކަމަށް ވިދާޅުވެފައެެވެ.
ރަނިލްއަށް މަޖިލީހުން އަލުން ތާއީދުކޮށްފައިމިވަނީ ޔޫއެންޕީގެ ލީޑަރުކަމުން އިސްތިއުފާ ދެއްވުމަށް ފަހު، ބޮޑު ވަޒީރުގެ މަގާމަށް އާ ބޭފުޅެއްގެ ނަން ހުށައެޅުމަށް ޕާޓީގެ ކޮންގްރެސްއެއް ބޭއްވުމަށް، ރަނިލް ވިކްރަމަސިންހައަށް އެ ޕާޓީގެ ކުރީގެ މަޖިލިސް މެމްބަރުންތަކެއް ގޮވާލާފައިިވަނިކޮށެވެ.
ލަންކާގެ ރައީސް މައިތިރިޕާލަ ސިރިސޭނާ ވަނީ އިދިކޮޅުން ރަނިލް ނޫން އެހެން ކޮންމެ ބޭފުޅެއްގެ ނަން ފޮނުވިޔަސް ބޮޑު ވަޒީރުކަމަށް އައްޔަނު ކުރަން އެއްބާރުލުން ދެއްވާނެ ކަމަށް ވިދާޅުވެފައެވެ.
