މެލޭޝިއާގެ ކުރީގެ ބޮޑުވަޒީރު ނަޖީބު ރައްޒާގުގެ ވެރިކަމުގައި ހިނގާފައިވާ އެންމެ ބޮޑު ކޮރަޕްޝަން، 1 އެމްޑީބީގެ އެތައް ބިލިއަން ޑޮލަރެއްގެ ޚިޔާނާތުގެ ތެރެއިން ގަނެފައިވާ ކަމަށް ތުހުމަތުކުރެވޭ ޔޮޓް، "އިކުއަނިމިޓީ" ހޯމަ ދުވަހު ނީލަމަށް ލައިފިއެވެ.

ނީލަމުގެ ކަންކަން ކުރިޔަށްގެންދަނީ ލަންޑަންގައި ގާއިމްވެފައިވާ ބަރގެސް ޔޮޓްސްއިންނެވެ.

ބްރޯކަރެއްގެ ގޮތުގައި މަަސައްކަތްކުރާ އެ ކުންފުނިން ބުނެފައިވަނީ ޔޮޓު ވިއްކުމުގެ ޝަރުއީ މަރުހަލާތައް ހިންގާނީ ހަރުދަނާ އުުސޫލުތަކެއްގެ ތެރެއިން ކަމަށެވެ. ހައިކޯޓަށް ހުށަހަޅާ ބިޑްތައް ހުޅުވުމަށް ނިންމާފައި ވަނީ ނޮވެމްބަރ ނުވަތަ ޑިސެމްބަރުގައި ކަމަށްވާއިރު ބިޑުތައް ހުޅުވާނީ ފުލުހުން ކަމަށް ބަރގެސް ޔޮޓްސްގެ ވެބްސައިޓްގައި ބުނެފައި ވެއެވެ.

1އެމްޑީބީގެ ވަކީލް އޮންގ ޝީ ކްވާން ވަނީ ޔޮޓު ވިއްކާލުމަށް ނިންމާފައިވާކަން ހުކުރު ދުވަހު ކަށަވަރުކޮށްދެއްވާފައެވެ.

ބިޑަށް ކުރިމަތިލާ ފަރާތްތަކުން 1 މިލިއަން ޑޮލަރު ބަހައްޓަންޖެހެއެވެ. ނީލަން ބަންދުވާނީ ނޮވެމްބަރުމަހުގެ 28 ވަނަ ދުވަހުއެވެ.

އޯގަސްޓްމަހުން ފެށިގެން މެލޭޝިއާގެ ކްލަންގް ބަނދަރުގައި އޮތް 250 މިލިއަން ޑޮލަރުގެ "އިކުއަނިމިޓީ" އެ ގައުމަށް ގެންގޮސްފައިވަނީ 1އެމްޑީބީގެ ޚިޔާނާތުގެ މައްސަލަޔާ ގުޅިގެން އެމެރިކާގެ އިދާރާތަކުން ކުރާ ތުހުމަތާ ގުޅިގެން ބާލީގައި އޮއްވައެވެ.