ސ. މަރަދޫ، ހުދުހިރި، އަހުމަދު މަފާޒު މަރާލުމުގެ ކުރިން ހިންގި ހަމަނުޖެހުންތަކާ ގުޅިގެން ޓެރަރިޒަމުގެ ދައުވާކޮށްފައިވާ ތިން މީހުންގެ މައްޗަށް ހުކުމްކުރުން އަންނަ މާޗް މަހަށް ތާވަލުކޮށްފި އެވެ.

މަފާޒުގެ މަރާ ގުޅިގެން ދައުލަތުން ދައުވާ ކޮށްފައިވަނީ މާލެ ދަފްތަރު 1475 އަހުމަދު ރިޒާމާއި ހ. ބްލޫބާޑް މުހައްމަދު މިދުހަތުގެ އިތުރުން ހ. އީމާންމަންޒިލް އަހްމަދު ސައީދުގެ މައްޗަށެވެ.

އެ ތިން މީހުންގެ ތެރެއިން މިދުހަތުގެ މައްޗަށް ދައުވާ އުފުލާފައި ވަނީ އިތުރު ބަޔަކާ އެކު މަސް އޮޑިގެ ކައިރިއަށް ގޮސް ދިގުމިނުގައި ތިން ފޫޓު ހުންނަވަރުގެ ކޮޅަށް ތޫނުކޮށްފައި ހުރި ކަނޑިއެއް ފާޑު އެއްޗެއް ހިފައިގެން މަސްއޮޑިގޭ ކުރިމަތީގައި ތިބި މީހުން ފަހައި ދުވެފައިވާ ކަމަށް ތުހުމަތު ކުރެވޭތީ އެވެ.

އަހްމަދު ސައީދުގެ މައްޗަށް ދައުވާ އުފުލާފައި ވަނީ އެ ހަމަނުޖެހުން ހިންގި މީހުންނާއެކު އޭނާ އުޅެފައިވާތީ އެވެ. އަދި ދައުވާ އުފުލާފައިވާ ރިޒާމަކީ ވެސް އެ ހަމަނުޖެހުންތަކުގައި ބައިވެރިވެފައިވާ މީހެއް ކަމަށް ދައުލަތުން ވަނީ ތުހުމަތުކޮށްފައެވެ.

ގ. މަސްއޮޑިގޭ ކައިރިން މަފާޒަށް ތޫނު އެއްޗަކުން ހަމަލާދީ މަރާލާފައިވަނީ 2014 ވަނަ އަހަރުގެ ޑިސެމްބަރު ހަތް ވަނަ ދުވަހުގެ ރޭ އެވެ. މަފާޒަށް ހަމަލާދީފައިވަނީ ގްރޫޕަކުންނެވެ. ނަމަވެސް، މަފާޒަށް ހަމަލާދިން މަންޒަރު ފެނުނު މީހުން ވަނީ ފުލުހުންގެ ތަހުގީގަށް ބަޔާން ދިނުމަށް ދެކޮޅު ހަދާފަ އެވެ.

އެހެންކަމުން ދައުވާ އުފުލާފައިވާ ތިން މީހުންނަށް މަފާޒުގެ މަރުގެ ތުހުމަތެއް ނުކުރެ އެވެ. އެމީހުންގެ މައްޗަށް ދައުވާ ކުރީ އެރޭ ހަމަނުޖެހުން ހިންގި ކަމުގެ ތުހުމަތުގަ އެވެ.

އެ މައްސަލައިގެ ޚުލާސާ ބަޔާން ހުށަހެޅުމަށް ބުރާސްފަތި ދުވަހު ބޭއްވި އަޑުއެހުމުގައި އެމީހުންގެ ވަކީލު އަބްދުﷲ ހަސީން ވިދާޅުވީ ދައުލަތުން ހުށަހަޅާފައިވާ ހެކީންގެ ހެކި ބަހުން ގާނޫނު އަސާސީގެ 51 ވަނަ މާއްދާގެ 'އ' ގައި ބަޔާންކޮށްފައިވާ މިންވަރަށް މައްސަލަ ސާބިތުކޮށް ދެވިފައިނުވާ ކަމަށެވެ.

ފުލުހުންގެ ތަހުގީގުގައި ދައުވާ އުފުލާފައިވާ ތިން މީހުންގެ ވާހަކަ ވަރަށް ތަފްސީލުކޮށް ހެކިވެރިން ކިޔާދީފައި އޮތް ނަމަވެސް ކޯޓަށް ގޮސް ސިއްރުން ދިން ހެކިބަހުގައި ތަހުގީގަށް ދިން ބަޔާނާ ބޮޑެތި ފުށުއެރުންތަކެއް ހުއްޓެވެ. އެހެންކަމުން ދައުލަތުގެ ވަކީލުގެ ޚުލާސާ ބަޔާނުގައި ހަމައެކަނި ވިދާޅުވީ ހެއްކާއި ގަރީނާތަކުން މި މައްސަލަ ސާބިތުވާ ކަމަށް ކަނޑައަޅައި ދިނުމަށް އެދޭ ކަމަށެވެ.

މި މައްސަލައިގައި ހުކުމް ކުރުން ތާވަލުކޮށްފައިވަނީ މާޗް މަހުގެ 14 ވަނަ ދުވަހުގެ ހެނދުނު 11:00 އަށެވެ.