ބަޑިއެއްގެ ވަޒަނެއް، ކ. ހިންމަފުށީ ގެޔެއްގެ ދޮރަށް އަރައިފި އެވެ.
ރާއްޖެޓީވީއަށް މައުލޫމާތުދެއްވަމުން ހިންމަފުށީ ކައުންސިލް މެމްބަރަކު ވިދާޅުވީ، ގެޔެއްގެ ދޮރަށް ވަޒަނެއް އަރާފައިވާ ކަމަށާއި، އެއްވެސް މީހަކަށް ގެއްލުމެއް ނުލިބޭ ކަމަށެވެ. ކަމާއިބެހޭ އިދާރާތަކުން މިހާރު އެ މައްސަލަ ތަހުޤީޤްކުރަމުން އަންނަ ކަމަށް ކައުންސިލް މެމްބަރު ވިދާޅުވި އެވެ. އޭނާ ވިދާޅުވީ ވަޒަން އެރި ގެޔަކީ، އެ ރަށުގެ އެންމެ އަތިރިމައްޗަށްވާގޮތަށް ހުންނަ ގެޔެކެވެ.
މީގެ ދެ އަހަރުކުރިންވެސް ހިންމަފުށީ ގެޔަކަށް ވަޒަނެއް އަރާފައިވެއެވެ. ހިންމަފުށީ ގެޔަކަށް ވަޒަން އަރާފައިވަނީ، އެ ރަށް ކައިރީގައި އޮންނަ އެމްއެންދީއެފްގެ ތަމްރީންތައް ކުރިއަށްގެންދާ ގިރިފުށިންނެވެ.
ރާއްޖެޓީވީއަށް މައުލޫމާތުދެއްވަމުން އެމްއެންޑީއެފްގެ ތަރުޖަމާނު، މޭޖަރ އަދުނާން މުޙައްމަދު ވިދާޅުވީ، އެކަން ތަހުޤީޤްކުރަމުންގެންދާ ކަމަށާއި، މިވަގުތު މައުލޫމާތު ހިއްސާކުރެވެން ނެތްކަމަށެވެ. އަދި އެއީ ގިރިފުށީގައި ބޭނުންކުރި ވަޒަނެއްކަންވެސް ކަށަވަރު ނުވާކަމަށް އަދުނާނު ވިދާޅުވި އެވެ. އެނާ ވިދާޅުވީ ތަހުޤީޤް ނިމުމުން އެކަމުގެ މައުލޫމާތު ހިއްސާކުރައްވާނެ ކަމަށެވެ.
