ލޯކަލް ކައުންސިލް އިންތިހާބު ބާއްވާ ތާރީހު ދެވަނަ ފަހަރަށް ފަސްކޮށްފި އެވެ.
އިލެކްޝަންސް ކޮމިޝަނުގައި ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިލެކްޝަންސް ކޮމިޝަނުގެ ނައިބު ރައީސް އަމްޖަދު މުސްތަފާ ވިދާޅުވީ، އެ ކޮމިޝަނުން ލޯކަލް ކައުންސިލް އިންތިހާބު އޭޕްރީލް މަހުގެ އަށް ވަނަ ދުވަހަށް ތާވަލް ކުރި ނަމަވެސް އިންތިހާބު އޭޕްރީމް 15 ވަނަ ދުވަހަށް ފަސްކޮށްފައިވާ ކަމަށެވެ.
މިގޮތަށް ފަސްކޮށްފައިވަނީ، އިންތިހާބު ބާއްވާ ދުވަހަކީ ސްކޫލުތަކުގައި ވަރަށް ގިނަ ހަރަކާތްތަކެއް ބޭއްވުމަށް ނިންމާފައިވާ ދުވަހަކަށް ވާތީ ފަސްކޮށްދިނުމަށް އެޑިއުކޭޝަން މިނިސްޓްރީން އެދިފައިވުމުން ކަމަށް އޭނާ ވިދާޅުވި އެވެ. އިންތިހާބީ މަސައްކަތްތަކުގައި އެންމެ ގިނައިން ބޭނުން ކުރާ ތަނަނީ ސްކޫލުތައް ކަމަށް ވާތީ 8 ވަނަ ދުވަހަށް ސްކޫލުތައް އެވެއިލެބެލް ނުވާ ކަމަށް ވެސް އޭނާ ވިދާޅުވި އެވެ. އަދި އިންތިހާބުގެ ކަންކަން އެންމެ ފުރިހަމައަށް ރަގަޅަށް ބޭއްވޭނީ އިންތިހާބު ފަސްކޮށްގެން ކަމަށް ވާތީ އިންތިހާބު ފަސްކުރީ ކަމަށް ވެސް އޭނާ ވިދާޅުވިއެވެ.
މިގޮތަށް ބަދަލު ކުރުމުން އެއްވެސް ހާލެއްގައި ގާނޫނީ މައްސަލައެއް ދިމާނުވާ ކަމަށް އޭނާ ވިދާޅުވި އެވެ.
"މިކަމުގައި ގާނޫނީ ހުރަހެއް ނެތް. ސިވިލް ކޯޓުގެ ހުކުމުގައި ބަޔާންކޮށްފައި އެބަ އޮތް އަލަށް އިންތިހާބު ކުރާ ކައުންސިލް މަޤާމުތަކާއި ހަވާލުވަންދެން މިހާރު އޮތް ކައުންސިލްތައް ދެމި އޮންނާނެ ކަމަށް،" އަމްޖަދު ވިދާޅުވި އެވެ.
މިކަމާ ގުޅޭ ގޮތުން އިލެކްޝަންސް ކޮމިޝަނުގެ މެންބަރު އަހްމަދު އަކްރަމް ވިދާޅުވީ، އިލެކްޝަންސް ކޮމިޝަނުން ބާއްވާ އިންތިހާބުގައި ފޮށިތައް ބެހެއްޓޭ 90 ޕަސެންޓް ތަންތަނަކީ، ސްކޫލުތަކާއި އެޑިއުކޭޝަންގެ އިމާރާތްތައް ކަމަށެވެ. އަދި އިންތިހަބާ ބެހޭ ގައުމީ ލަފާދޭ ކޮމިޓީގެ ހުރިހާ މެންބަރުން މިކަމާ އެއްބަސްވެފައިވާ އިރު މިކަމުގެ ސަބަބުން އިންތިހާބުގެ ކަންކަމަށް އެއްވެސް ބަދަލެއް ނާންނާނެ ކަމަށް އޭނާ ވިދާޅުވި އެވެ. އިންތިހާބާ ބެހޭ ގައުމީ ލަފާދޭ ކޮމިޓީން ބޭއްވި ބައްދަލުވުމުގައި ހުރިހާ މެންބަރުންގެ އިއްތިފާގުން މިކަން ފާސްވެފައިވާ ކަމަށް އަމްޖަދު ވިދާޅުވި އެވެ.
ކޮމިޓީގެ ބައްދަލުވުމުން މިކަން ފާސްވި ނަމަވެސް އެ މަޖިލީހުގައި އެމްޑީޕީން ބައިވެރިނުވާ ކަމަށް ވެސް އޭނާ ވިދާޅުވި އެވެ. އެހެން ނަމަވެސް ޖުމްހޫރީ ޕާޓީ އާއި ޕީޕީއެމްގެ އިތުރުން ޑީއާރްޕީން ވެސް ބައްދަލުވުމަށް އައިސްފައިވާ ކަމަށް އަކްރަމް ވިދާޅުވި އެވެ.
"އިންތިހާބަށް ނިންމަންޖެހޭ ހުރިހާ ކަމެއް ނިންމަމުން މިދަނީ. އިދާރީގޮތުން ނިންމަންޖެހޭ ހުރިހާ ކަމެއް ނިމިފައިވަނީ.އަޅުގަނޑުމެން ޓްރެއިނިންތައް ބާއްވާނެ ތާރީހުތަކާއި ކުރަންޖެހޭ ކަންކަން ކުރުމަށް ބޭނުންވާ ދުވަސްތައް ވަނީ ކަނޑައަޅާފަ. މިއީ އިންތިހާބު އިތުރަށް ހަރުދަނާކުރުމަށް ލިބިގެންދިއަ ފުރުސަތެއް ކަމަށް އަޅުގަނޑުމެން މިބަލަނީ،" އަކްރަމް ވިދާޅުވި އެވެ.
ލޯކަލް ކައުންސިލް އިންތިހާބު ބާއްވާ ތާރީހު ފަސް ކުރުމުން ވޯޓުލެވޭ މީހުންގެ ލިސްޓަށް ބަދަލުތަކެއް އަންނާނެ ކަމަށާއި އެކަމަށް ކުރަންޖެހޭ މަސައްކަތްތައް ކުރައްވާނެ ކަމަށް އިލެކްޝަންސް ކޮމިޝަނުން ބުނެ އެވެ.
ޖެނުއަރީ މަހުގެ 14 ވަނަ ދުވަހު ބޭއްވުމަށް ނިންމާފައި އޮތް ކައުންސިލް އިންތިހާބް ދެ މަސް ދުވަސް ފަސްކުރީ ޕީޕީއެމްގެ ރައީސް ޔާމީން ފެކްޝަނުން ސިވިލް ކޯޓަށް ހުށަހެޅި މައްސަލައާ ގުޅިގެންނެވެ. ކައުންސިލް އިންތިހާބު ފަސް ކޮށްފައިވަނީ ވަކި ބަޔަކަށް މަންފާތަކެއް ހޯދާ ދިނުމަށް ކަމަށް އެމްޑީޕީ އާއި ޕީޕީއެމްގެ މައުމޫން ޕެކްޝަނުންވެސް ދަނީ ބުނަމުންނެވެ. އެހެން ނަމަވެސް އިލެކްޝަންސް ކޮމިޝަނުން ވަނީ އެފަދަ އެއްވެސް ކަމެއް ނުހިނގާ ކަމަށާއި ކޮމިޝަނުން އަބަދުވެސް މަސައްކަތް ކުރަނީ މިނިވަން އިންސާފުވެރި އިންތިހާބެއް ބޭއްވުމަށް ކަމަށް ބުނެފަ އެވެ.
