ބޮލީވުޑްގެ މަޝްހޫރު ފިލްމް ޑައިރެކްޓަރ ޔަޝް ޗޯޕްޅާ އުފައްދާފައިވާ މަޝަހޫރު ފިލްމެއް ކަމަށްވާ "އިއްތިފާގު"ގެ ރީމޭކެއް ތައްޔާރު ކުރުމުގެ މަސައްކަތް ފަށައިފިއެވެ.
ރެޑް ޗިލީ އެންޓަރޓެއިންމަންޓާއި ދަރްމާ ޕްރޮޑަކްޝަން އަދި ބީއާރު ފިލްމްސް ގުޅިގެން އުފައްދާ މި ފިލްމުގައި ތަރިންގެ ގޮތުގައި ފެނިގެންދަނީ ސިދާތް މަލޯތަރާ އާއި ސޯނާކްޝީ ސިންހާއެވެ.
އަންނަ ފެބްރުއަރީ މަހުގެ ތެރޭގައި މުމްބާއީގައި ޝޫޓް ކުރުމަށް ހަމަޖެހިފައިވާ މި ފިލްމާ ގުޅޭ ގޮތުން ސިދާތް މަލޯތްރާ ބުނެފައިވަނީ މި ފިލްމަކީ ސީދާ "އިއްތިފާގު"ގެ ރީމޭކެއް ނޫން ކަމަށާއި ޒަމާނަށް ފައްތައިގެން ފިލްމަށް ބަދަލުތަކެއް ގެނެސްފައިވާ ކަމަށެވެ.
އެހެންކަމުން މި ފިލްމް ވެގެން ގޮސްފައިވަނީ ދެގަޑިއިރަށް ވެސް ނުފެތޭ ކުރު ފިލްމެއްގެ ގޮތުގައި ކަމަށް އޭނާ ބުންޏެވެ.
1969 ވަނަ އަހަރު އުފެއްދާފައިވާ "އިއްތިފާގުން" ފެނިގެން ގޮސްފައިވަނީ ރާޖޭޝްކަންނާ އާއި ނަންދޫ އެވެ. މި ފިލްމުގައި ރާޖޭޝް ކަންނާގެ ރޯލުން ފެނިގެންދާ ސިދާތް ބުނީ އޭނާއަކީ ރާޖޭޝް ކަންނާގެ ވަރަށް ބޮޑު ފޭނެއް ކަމަށާއި އޭނާގެ ފިލްމުތައް ބަލަން ވަރަށް ޝައުގުވެރިވާ ކަމަށެވެ.
ނަންދޫގެ ރޯލުން މިފިލްމުގައި ފެނިގެން ދާނީ ސޯނާކްޝީ ސިންހާއެވެ.މި މި ފިލްމަކީ ޝިދާތް މަލޯތްރާ އާއި ސޯނާކްޝީ ސިންހާ އެއްފިލްމަކުން ފެނިގެންދާ ފުތަރަމަ ފިލްމެވެ.
މިސްޓްރީ ތްރިލާ ފިލްމެއް ބޮލީވުޑުން ނުފެންނަތާ ގިނަ ދުވަސް ތަކަކަށް ފަހު އެފަދަ ފިލްމެއް އުފައްދަން ފެށުމަކީ އަލުން އެބާވަތުގެ ފިލްމްތައް އުފެއްދުމުގެ މަސައްކަތަށް ގިނަ ބަޔަކު ޝައުގުވެރިވާނެ ކަމެއް ކަމަށް ދެކޭ ކަމަށް ޝިދާތް ބުންޏެވެ.
މި ފިލްމް ރިލީޒް ކުރުމަށް ހަމަޖެހިފައިވަނީ މިއަހަރުގެ ފަހުޅުގައެވެ.
