ސެވިއްޔާ ބަލިކޮށް ސްޕެނިޝް ސުޕަރ ކަޕްގެ ޗެމްޕިއަންކަން ހޯދައި ލިއޮނެލް މެސީގެ ކެޕްޓަން ކަމުގެ ދަށުން ބާސާއިން ފުރަތަމަ ފަހަރަށް މުބާރާތެއް ކާމިޔާބުކޮށްފިއެވެ.

ސްޕެއިންގެ ފުޓްބޯޅަ ސީޒަން ހުޅުވުމަށް ކޮންމެ އަހަރަކު ކުޅޭ ސުޕަރ ކަޕްގައި އެހެން އަހަރުތަކާއި ހިލާފަށް މިއަހަރު ކުޅެފައިވަނީ އެންމެ މެޗެކެވެ. މީގެކުރިން ނަތީޖާ ނެރެފައިވަނީ ޓީމުތަކުގެ މެދުގައި ކުޅޭ ދެ ލެގުގެ އެގްރިގޭޓް ނަތީޖާއަށް ބަލައިގެންނެވެ. މި މެޗު ވެގެންދިޔައީ ސްޕެއިންއިން ބޭރުގައި މި މުބާރާތް ކުޅެވުނު ފުރަތަމަ ފަހަރަށެވެ. 

މޮރޮކޯގައި ކުޅުނު މި މެޗު ބާސާއިން ކާމިޔާބުކުރީ ފަހަތުން އަރައި 2-1 ގެ ނަތީޖާއަކުންނެވެ. 

މި މެޗު ފެށިގެން ބާސާގެ ފަރާތުން ރަނގަޅު ކުޅުމެއް ފެނިގެންދިޔައިރު މެޗުގެ ފުރަތަމަ ލަނޑު ޖަހާ ލީޑު ނެގީ ސެވިއްޔާއިންނެވެ. މި ލަނޑު އެޓީމަށް ޖަހައިދިނީ ޕަބްލޯ ސަރާބިއާއެވެ. މި ލަނޑާއެކު ބާސާއިން ކުޅުން ވަރުގަދަކޮށް ފުލުފުލުގައި ހަމަލާ އުފެއްދިއެވެ. މެޗުގެ ފުރަތަމަ ހާފު ނިމެން އުޅެނިކޮށް ބާސާއަށް އެއްވަރުކޮށްދިނީ ޖެރާޑް ޕީކޭއެވެ.

ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ދެވަނަ ހާފުގައި ވެސް ދެ ޓީމުން ވަނީ ރަނގަޅު ކުޅުމެއް ދައްކާފައެވެ. މި މެޗުން ބާސާ މޮޅުވި ލަނޑު މެޗުގެ 78 ވަނަ މިނެޓުގައި އޭރިއާ ބޭރުން އެޓީމަށް ޖަހައިދިނީ އުސްމާން ޑެމްބެލޭއެވެ. 

މިއީ އައު ސީޒަނުގައި ބާސާއިން ކާމިޔާބުކުރި ފުރަތަމަ މުބާރާތަށްވާއިރު މިއީ މެސީގެ ކެޕްޓަން ކަމުގެ ދަށުން އެޓީމު އުފުލާލި ފުރަތަމަ މުބާރާތްވެސްމެއެވެ. ހަމައެހެންމެ މި މުބާރާތުގެ ތަށްޓާއެކު މެސީ ވެގެންދިޔައީ 33 ތަށްޓާއެކު ބާސާގެ ތާރީހުގައި ވެސް އެންމެ ކާމިޔާބު ކުޅުންތެރިޔާއަށެވެ. 

ސީޒަން ހުޅުވުމުގެ ގޮތުން އަންނަ އާދިއްތަ ދުވަހުގެ ރޭ ބާސާ ޑިޕޯޓިވޯ އަލަވޭސްއާ ދެކޮޅަށް ނުކުންނައިރު ސެވިއްޔާ ހަމަ އެރޭ ނުކުންނާނީ ރަޔޯ ވަޔެކާނޯއާ ދެކޮޅަށެވެ.