ކުރިއަށް އޮތް ރިޔާސީ އިންތިހާބަށް ކެމްޕެއިން ކުރުމަށް ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) މާލޭގެ ބައެއް ގެތަކަށް ވަޑައިގަންނަވައިފި އެވެ.
ޑޯޓުޑޯ ހަރަކާތެއްގެ ގޮތުން އިބޫ ވަނީ ހޮނިހިރު ދުވަހުގެ ހެނދުނު މައްޗަށްގޮޅީގެ ބައެއް ގެތަކަށް ވަޑައިގެންފަ އެވެ. އަދި މައްޗަށްގޮޅީގައި ހުރި ބައެއް ކެފޭތަކަށް ވަޑައިގެން އާންމުންނާ ވަނީ ބައްދަލު ކުރައްވާފަ އެވެ.
ރައްޔިތުންނާ ބައްދަލު ކުރައްވަން ވަޑައިގަތުމުގެ ކުރިން ނޫސްވެރިން ކުރި ސުވާލުތަކަށް ޖަވާބު ދެއްވަމުން އިބޫ ވިދާޅުވީ ގޭގެއަށް ވަޑައިގަތުމުގެ ބޭނުންފުޅަކީ ރައްޔިތުންގެ ހާލު އޮޅުންފިލުއްވައި ދަތިވެފައިވާ ކަންތައްތައް ދެނެވަޑައިގަތުން ކަމަށެވެ.
"އެނގިވަޑައިގަންނަވާނެ ވޯޓުލުމާ ދޭތެރޭ މި އޮތީ ވަރަށް ކުޑަ ދުވަސްކޮޅެއް. އެހެން ވިއަސް އަޅުގަނޑުމެންގެ އަމާޒަކީ ވީހާވެސް ގިނަ ރައްޔިތުންނާ ބައްދަލުކޮށް، އެ ރައްޔިތުންގެ އިހުސާސްތައް ދަނެގަނެ ބޭނުންވެފައިވަނީ ކޮން ކަންތައްތަކެއް ތޯ ބަލައި، ދަތިވެފައިވަނީ ކޮން ކަންތައްތަކެއްތޯ ބަލައި އަޅުގަނޑުމެންގެ ސަރުކާރެއްގައި އެކަންތައް ހާސިލް ކުރުމަށްޓަކައި ހިންގޭނެ ޕްރޮގްރާމްތައް އެކުލަވާލުން،" އިބޫ ވިދާޅުވި އެވެ.
ޖަލްސާތައް ބާއްވައިގެން ކުރިއަށް ގެންދާ ސިޔާސީ ހަރަކާތްތަކާއި ރައްޔިތުންނާއި ވަކި ވަކިން ބައްދަލު ކޮށްގެން ކުރިއަށް ގެންދާ ހަރަކާތާ ވަރަށް ބޮޑު ތަފާތެއް ހުންނަ ކަން އިބޫ ފާހަގަ ކުރެއްވި އެވެ.
"ސީދާ ވަކި ވަކިން ބޭފުޅުންނާ ބައްދަލު ކުރީމަ ވަރަށް ސާފުކޮށް ކަންތައްތައް އެބަ ކިޔާދެއްވާ އަޅުގަނޑުމެންނަށް. އެނގިވަޑައިގަންނަވާނެ އަޅުގަނޑުމެންގެ މެނިފެސްޓޯގެ މުޅި ސިޔާސަތަކީ ވެސް ޖަޒީރާ ގައުމެއްގެ ގޮތުގައި ރާއްޖެ ތަރައްގީ ކުރުން. އެއީ ވީހާ ވެސް ކައިރިން ރައްޔިތުންނާ ބައްދަލުކޮށް ރައްޔިތުންނާ ބައްދަލުކޮށް ބޭނުންވަނީ ކޮން ކަންތައްކެއްތޯ ބެލުން،" އިބޫ ވިދާޅުވި އެވެ.
މީގެ އިތުރުން އިބޫ ވިދާޅުވީ ރިޔާސީ އިންތިހާބުގައި ވާދަ ކުރައްވާ ހުރިހާ ފަރާތްތަކަށް ހަމަ ހަމަ ކަމާއެކު ކެމްޕެއިން ކުރުމުގެ ފުރުސަތު ލިބިގެންދާނެކަން އެނގިގެންދާނީ ޖަލްސާއެއް ބޭއްވުމަށް ތަނެއް ހޯދަން އެދުމުން ކަމަށެވެ. އެހެން ނަމަވެސް އަދި މާލޭގައި ޖަލްސާއެއް ބާއްވަން އިދިކޮޅު ކޯލިޝަނުން ނޭދޭ ކަމަށާއި ހަމަ ހަމަ ކަމާއެކު ފުރުސަތު ދޭނެ ކަމަށް އުއްމީދު ކުރައްވާ ކަމަށެވެ.
އެމަނިކުފާނު މިއަދު މެންދުރު ފަހު ވެސް ބައެއް ގެތަކަށް ވަޑައިގަތުމަށް ވަނީ ހަމަ ޖެހިފަ އެވެ.