ފެބްރުއަރީ 1 ގެ އަމުރާއި ގުޅިގެން ހައްޔަރުކޮށްފައިވާ ކުރީގެ ރައީސް މައުމޫން އަބްދުލްޤައްޔޫމަށް އެހީތެރިވުމަށް އިންޑިއާގެ ކިބައިން އެމަނިކުފާނުގެ ދަރިކަނބަލުން ދުންޔާ މައުމޫން އެދިވަޑައިގަތްގަތުމަށް، ކުރީގެ ރައީސް މުހައްމަދު ނަޝީދު ތާޢީދުކުރެއްވުމުން އެކަމަނިކުފާނު ވިދާޅުވި އެއްޗެއްގެ މާނަ އޮޅޭ ގޮތަށް ދުންޔާ ރައްދު ދެއްވައިފިއެވެ.
އިންޑިއާގެ އެހީތެރިކަމަށް އެދިވަޑައިގެން ދުންޔާ މައުމޫން ބުރާސްފަތި ދުވަހު ވިދާޅުވީ ރާއްޖޭގައި ހަމަޖެހުން ޤާއިމްކުރުމަށާއި ޑިމޮކްރަސީ ހަރުދަނާކުރުމަށް އެހީވުމަށް އިންޑިއާގެ މައްޗަށް އޮތް ޒިންމާ އަދާކުރުމުގައި އިންޑިއާ ފެއިލްވެފައިވާކަމަށެވެ. އަދި ރައީސް މައުމޫނަށް އެހީތެރިވުމަށް އިންޑިއާއަށް ގޮވާލެއްވިއެވެ.
‘I believe India is failing in its responsibility to maintain stability & assist democracy in the Maldives. I appeal to India to assist my father Pres Maumoon Abdul Gayoom, the father of modern Maldives & the architect of india-Maldives relations in t modern era.’@SushmaSwaraj pic.twitter.com/hMEYvEDXxI
— Dunya Maumoon (@dunyamaumoon) May 3, 2018
ދުންޔާ މައުމޫން އިންޑިއާގެ ކިބައިން އެހީތެރިކަމަށް އެދިވަޑައިގަތުމުން، އެކަމަނާ ރައީސް ޔާމީނުގެ ސަރުކާރުގެ ޚާރިޖީ ވަޒީރު ކަމުގައި ހުންނަވައިގެން، ބޭރުގެ އެހީ ހޯދުމަށް އިދިކޮޅު ފަރާތްތަކުން ކުރި މަސައްކަތާއި ދެކޮޅަށް ދެއްކެވި ވާހަކަފުޅުތައް ބައެއް ފަރާތްތަކުން ފާހަގަކުރަން ފެށިއެވެ. އަދި ސަރުކާރުން ވަކިވެވަޑައިގަތުމަށްފަހުވެސް އެކަމަނާ ގުޅިފައިވާ ޕާޓީތަކުން ބޭރުގެ ފަރާތްތަކާއި ގުޅިގެން ކުރިއަށް ގެންދާ އިސްލާހީ ހަރަކާތްތަކަށް ވަރަށް ބޮޑަށް ފާޑުވިދާޅުވިއެވެ. އިދިކޮޅު ފަރާތްތަކުގެ ޙަރަކާތްތަކަށް އެކަމަނާ ފާޑުވިދާޅުވާއިރު، ރައީސް މައުމޫނީ ގުޅިފައިވާ ޕާޓީތަކުގެ އެއް ލީޑަރެވެ.
އިންޑިއާގެ އެހިއަށް ދުންޔާ މައުމޫން އެދިވަޑައިގަތުމުން ކުރީގެ ރައީސް މުހައްމަދު ނަޝީދު ކުރެއްވި ޓްވީޓެއްގައި ވިދާޅުވީ ރާއްޖޭގެ މައްސަލައިގެ ތެރެއަށް އިންޑިއާއިން ވަނުމުގެ މުހިއްމުކަން ދުންޔާ މައުމޫނަށް އެނގިވަޑައިގަންނަވާތީ އެކަމާ އުފާކުރައްވާކަމަށާއި، އެމައްސަލައިގައި އެމަނިކުފާނު އަބަދުވެސް ދެކިވަޑައިގަތީ އެގޮތަށްކަމަށެވެ.
I am pleased @dunyamaumoon -- Prez Yameen's former Foreign Minister and @maumoonagayoom's daughter -- understands the need for Indian intervention in the Maldives. I have always held the same view.
— Mohamed Nasheed (@MohamedNasheed) May 3, 2018
އެހެން ނަމަވެސް ރައީސް ނަޝީދުގެ ޓްވީޓާއި ގުޅިގެން އެއަށް ރައްދު ދެއްވައި ދުންޔާ ވިދާޅުވީ އިންޑިއާއިން އަސްކަރީގޮތުން ރާއްޖޭގެ މައްސަލައިގެ ތެރެއަށް ވަންނަ ވާހަކަ އެކަމަނާ ވިދާޅުނުވާކަމަށެވެ. ދުންޔާ އެހެން ވިދާޅުވިއިރު، އަސްކަރީ ގޮތުން އިންޑިއާއިން ރާއްޖޭގެ މައްސަލައިގެ ތެރެއަށް ވަންނަ ވާހަކަ ރައީސް ނަޝީދު ވިދާޅުވެފައެއް ނުވެއެވެ. ފެބްރުއަރީ މަހު ރާއްޖޭގައި ކުއްލި ނުރައްކަލުގެ ޙާލަތު އިއުލާންކުރުމާއި ގުޅިގެންވެސް އެމަނިކުފާނު ވިދާޅުވީ އިންޑިއާގެ އަސްކަރިއްޔާގެ މަދަދު ލިބިފައިވާ މަންދޫބެއް ރާއްޖެއަށް ފޮނުއްވުމަށެވެ.
With due respect, Former President @MohamedNasheed, I am not calling for Indian military intervention. You would no doubt agree with me on the need to protect the sovereignty and independence of Maldives whilst maintaining Indian Ocean stability.
— Dunya Maumoon (@dunyamaumoon) May 4, 2018
ރައީސް ނަޝީދު ދެއްކެވި ވާހަކަފުޅުގެ މާނަ އޮޅޭ ގޮތަށް ދުންޔާ ކުރެއްވި ޓްވީޓާއި ގުޅިގެން ގިނަ ބައެއްގެ ފާޑުކިޔުންތައް ދަނީ އެކަމަނާއަށް އަމާޒުވަމުންނެވެ. ރައީސް މައުމޫންގެ ދިފާޢުގައި އެމްޑީޕީއާއި ގުޅިފައިވާ ޕާޓީތަކުން މަސައްކަތްކުރަމުންދާއިރު، އެޕާޓީތަކުގެ އިސްވެރިން ދައްކާ ވާހަކަތައް ރައްޔިތުންނަށް އޮޅޭ ގޮތަށް ދުންޔާގެ ވާހަކަ ދައްކަވާތީ ގިނަ ބަޔަކު ދަނީ ފާޑުކިޔަމުންނެވެ.
