ހައްޖަށް މީހުން ގެންދިއުމަށް އިސްލާމިކް މިނިސްޓްރީން ހުއްދަ ދީފައިވާ މިންވަރަށް ވުރެ އިތުރަށް ގުރޫޕުތަކުން ނަގާ ފައިސާ ހަރާމްވާނެ ކަމަށް ދީނީ އިލުމުވެރިޔާ ޑރ.މުހައްމަދު އިޔާޒު ވިދާޅުވެއްޖެއެވެ.
ޑރ.އިޔާޒު ކުރެއްވި ޓްވީޓެއްގައި ވިދާޅުވެފައިވަނީ ހައްޖަށް ގެންދިއުމަށް ހުއްދަ ލިބިފައިވާ ކުންފުނިތަކުން މިނިސްޓްރީ އޮފް އިސްލާމިކް އެފެއާޒްއިން ހުއްދަ ދެއްވާފައިވާ އަގަށްވުރެ އިތުރަށް، ފައިސާ ބަލައިގެންކަމުގެ ރަސީދު ދިނުމެއްނެތި ނަގާ ފައިސާއަކީ ޙަރާމް އެއްޗެއް ކަމަށެވެ.
އެފަދައިން ގުރޫޕުތަކަށް ފައިސާ ނުދިނުމަށް ގޮވާލައްވާ ކަމަށެވެ. އަދި ހައްޖުގެ އަޅުކަން އެފަދަ މުޑުދާރު އަމަލުތަކުން ހަރާބުކޮށް ނުލުމަށް ވެސް ޑރ.އިޔާޒު ގޮވާލައްވާފައިވެއެވެ.
Hajjah gendhiyumu hudhdha libifaivaa kunfuni thakun MIA in hudhdha dhevvaafaivaa agah vure ithurah (faisaa balaigen kamuge raseedhu dhinumeh nethi) nagaa faisaa aky haraam echchekeve. Thiya beyfulhun ge Hajju ge alhukan mifadha mududhaaru amalu thakun kharaabu koh nulavvaasheve.
— Dr Mohamed Iyaz (@dr_iyaz) May 1, 2018
ކޮންމެ އަހަރަކު ވެސް ހައްޖަށް މީހުން ގެންދިއުމަށް ކޯޓާ ދޭނެ ގުރޫޕުތައް ކަނޑައަޅާ އިރު ގުރޫޕުތަކުން ހުށަހަޅާ ޕްރޮޕޯސަލުތަކުގައި އެ ގުރޫޕަކުން ނަގާނެ އަގު ބަޔާން ކުރަން ޖެހޭނެއެވެ. އެނގިފައިވާ ގޮތުގައި އިސްލާމިކް މިނިސްޓްރީން މިހާރު ކަނޑައަޅާފައިވާ އަގަކީ 69،970 ރުފިޔާއެވެ.
ކޮންމެ އަހަރަކުވެސް ދެ ހާހެއްހާ މީހުން ރާއްޖެއިން ހައްޖަށްދާ އިރު ޖާގަ ލިބޭނެކަން ޔަގީން ކުރުމަށާއި އެހެނިހެން ގޮތްގޮތުން ގުރޫޕުތަކުން ހައްޖަށްދާ މީހުންގެ އަތުން އިތުރަށް ފައިސާ ނަގާ ކަމަށް ވާހަކަ ދެކެވެމުންދެއެވެ. ނަމަވެސް އެފަދަ މައްސަލައެއް ކޯޓަކަށް ހުށަހެޅި އެފަދަ ކަމެއް ސާބިތުވެފައެއް ނުވެއެވެ.
