މާލޭގެ މަސް މާރުކާޓް ހިމެނޭ ސަރަހައްދުގައި އެކިއެކި ފަރާތްތަކުން މަސްކަނޑަމުންދާތީ އެކަން އަންގަރާ ދުވަހުން ފެށިގެން މަނާކޮށްފިއެވެ.
މަސް މާރުކޭޓްގައި ހަރުކޮށްފައިވާ އިއުލާނެއްގައި ވަނީ މެއި މަހުގެ އެކަކުން ފެށިގެން މާލޭގެ ރޯމަސް މާރުކޭޓް ހިމެނޭ އެއްވެސް ސަރަހައްދެއްގައި، މަސް ކަނޑައިގެން ނުވަތަ ބުރިކޮށްގެން މަސް ވިއްކުމަކީ މަނާ ކަމެއް ކަަމަށެވެ.
އެކަން އަންގާފައި ވަނީ މާލޭ ރޯމަސް މާރުކޭޓް ބަލަހައްޓަމުންދާ އޯޝަން އެމްޕަވަރ އިންޓަރނޭޝަނަލް ކިޔާ ކުންފުންޏަކުންނެވެ.
އޭގައިވާ ގޮތުން ރޯމަސް މާރުކޭޓް ހިމެނޭ އެއްވެސް ސަރަހައްދެއްގައި، މަސް ކަނޑައިގެން ނުވަތަ ބުރިކޮށްގެން މަސް ވިއްކުމަކީ މަނާ ކަމެއް ކަމުގައި ހަމަޖައްސާފައި ވަނީ ހެލްތު މިނިސްޓްރީ އެކަން މަނާކޮށް އެކުންފުންޏަށް އަންގާފައިވާތީއެވެ.
މާލޭގެ ރޯމަސް މާރުކޭޓްގައި މަސްކަނޑާ ހާއްސަ ތަނެއް ހުރެއެވެ. އަގު ނަގައިގެން އެތަނުން މަސް ކަނޑަމުންދާއިރު، ބައެއް މަސްވެރިން ނުވަތަ ރޯމަސް ވިއްކާ ބައެއް ފަރާތްތަކުން މަސް ކެނޑުމަށް ހާއްސަކޮށްފައިވާ ތަން ނޫން މާރުކޭޓް ހިމެނޭ ސަރަހައްތުތަކުގައި މަސްކަނޑައި ނުވަތަ ބުރިކޮށްގެން ވިއްކައެވެ. ހާއްސަކޮށް ފަރުމަސް ވިއްކާ ފަރާތްތަކުން މިގޮތަށް އަމަލުކުރަމުންދާކަން ފާހަގަކުރެވެއެވެ. އެހެންކަމުން ރޯމަސް މާރުކޭޓް ހިމެނޭ ސަރަހައްދުގެ ސާފުތާހިރުކަން ވަރަށް ބޮޑަށް ގެއްލެމުންދާކަން ބައެއް ފަރާތްތަކުން ދަނީ ފާހަގަ ކުރަމުންނެވެ.