ގޭގެއިން ނެރެންޖެހޭ ކުނިތަކާއި، މަގުތަކުގައި ހުންނަ ކުނިތައް ދުވަހުން ދުވަހަށް ނެގޭނެ އިންތިޒާމް ހަމަޖައްސައިދިނުމަށް މާލޭ ސިޓީ ކައުންސިލުން ގޮވާލައިފި އެވެ. 

މާލެ ސިޓީގެ މަގުތަކާއި ގޯޅިތަކުގައި ކުނިގިނަވާ މައްސަލައާއި ގުޅެގޮތުން ސިޓީ ކައުންސިލްއިން ފާސްކުރި ޤަރާރުގައި ބުނެފައިވަނީ މާލޭގެ ގޭގެއިން މާލެ ސިޓީ ކައުންސިލްގެ ބައެއް މުވައްޒިފުން ކުނިއުކާލުމާއި މާލެ ސިޓީގެ މަގުތައް ކުނިކަހާ ސާފުކޮށް ބެލެހެއްޓުމުގެ މަސައްކަތް މާލެ ސިޓީ ކައުންސިލްއިން ކުރަމުން ގެންދަނިކޮށް، އެ މަސައްކަތާއި ހައުސިން މިނިސްޓްރީން ހަވާލުވިތާ 3 އަހަރުވެފައިވާ ކަމަށެވެ. ނަމަވެސް އެންމެ އެކަށީގެންވާގޮތުގައި މާލެ ސިޓީގެ މަގުތައް ސާފު ކުރެވިފައިނުވާ ކަމަށް ސިޓީ ކައުންސިލުން ބުނެ އެވެ. 

މަގުތަކާއި ގޯޅިތަކުގެ ޕޭވްމެންޓުމަތީގައި އާއި ސަހަރާތަކާއި އާންމު ތަންތަނުގައި ކުނި ބެހެއްޓުން ވަނީ އާންމު ކަމަކަށްވެފައިކަން ފާހަގަކޮށް، މާލެ ސިޓީ ކައުންސިލްއިން ބުނީ އޭގެ ސަބަބުން މަގުމަތި ދުއްވާ ވެހިކަލްތަކަށް ގެއްލުުން ލިބުމާއި ހިނގާ މީހުންނަށް ނުބައި ވަސް ދުވުމާއި ބުޅަލާއި މެހީގެ އުނދަގޫ ބޮޑުވާކަމުގެ ޝަކުވާތައް ބޮޑުވެފަިއވާ ކަމަށެވެ. އަދި އޭގެ ސަބަބުން ބަލިތައް ފެތުރުމުގެ ފުރުސަތު ވެސް ބޮޑުވެގެންދާ ކަމަށް ސިޓީ ކައުްނސިލްއިން ބުނެ އެވެ. 

އެހެންކަމުން މާލެ ސިޓީ ކައުންސިލްގެ ނިންމުމުގައި ސަރުކާރަށް ގޮވާލައިފައިވަނީ ގޭގެއިން ނެރެންޖެހޭ ކުނިތަކާއި، މަގުތަކުގައި ހުންނަ ކުނިތައް ދުވަހުން ދުވަހަށް ނެގޭނެ އިންތިޒާމް ހަމަޖައްސައިދިނުމަށެވެ. އަދި މާލެ ސިޓީއަކީ ނަލަފެހި ސިޓީއަކަށް ހެދުމަށްޓަކައި މަގުތައް ސާފުތާހިރުކޮށް، ފެހިކޮށް، ޒީނަތްތެރިކޮށް ބޭއްވުމަށްޓަކައި ހުރިހާ ރައްޔިތުންގެ އެއްބާލުމަށް ވެސް މާލެ ސިޓީ ކައުންސިލްއިން ވަނީ ގޮވާލައިފަ އެވެ.