ސަރުކާރުން އިސްނަގައިގެން ކުރިއަށް ގެންދިޔަ ރޮހިންޖާ ފަންޑަށް ޖަމާކުރި 18.1 މިލިއަން ރުފިޔާ ރޮހިންޖާ މުސްލިމްނަށް ހަދިޔާކޮށްފައިވާ ކަމަށް ބުނެފައި ވަނިކޮށް، އެ ފައިސާގެ ތެރެއިން ތިން ލައްކައަށް ވުރެ ގިނަ ރުފިޔާ މަދުވެފައިވާކަން ހާމަވެއްޖެ އެވެ.
މިޔަންމާގެ ރޮހިންޖާ މުސްލިމުންނަށް އެހީވާން އިސްލާމިކް މިނިސްޓްރީން ހަ މަސް ކުރިން ހިންގި ހަރަކާތްތަކުން ލިބުނު 18.1 މިލިއަން ރުފިޔާ އޭގެ ހައްގުވެރިންނަށް ހަވާލުކޮށްފައިވާ ކަމަށް އިސްލާމިކް މިނިސްޓަރު ޑރ. އަހުމަދު ޒިޔާދު ބާގިރު ވިދާޅުވެފައި ވަނީ މިދިޔަ މަހުގެ 21 ވަނަ ދުވަހުއެވެ.
ނަމަވެސް ބަންގުލަދޭޝްގައި ހުންނަ ރާއްޖޭގެ އެމްބަސީން އިއްޔެ ކުރި ޓްވީޓެއްގައި ބުނެފައި ވަނީ ރޮހިންޖާ މީހުންނަށް 1,150,000 (އެއް މިލިއަން އެއް ލައްކަ ފަންސާސް ހާސް) ޑޮލަރު ހަވާލުކޮށްފައިވާ ކަމަށެވެ. ބަންގުލަދޭޝްގައި ހުންނަ ރާއްޖޭގެ އެމްބަސީން ބުނެފައިވާ ގޮތުންނަމަ، 1.15 މިލިއަން ޑޮލަރަކީ ދިވެހި ފައިސާއިންނަމަ، 17.7 މިލިއަން ރުފިޔާއެވެ. އެ އަދަދަކީ ފަންޑަށް ޖަމާކުރި ޖުމްލަ އަދަދު ކަމުގައި 18.1 މިލިއަން ރުފިޔާއިން 367،000 ރުފިޔާ މަދު އަދަދެކެވެ.
Mr. Azmat Ulla, Head of Country Office, Bangladesh @Federation @IFRCAsiaPacific visited the @MDVinBGD and handed over the official acknowledgement of receipt to Maldives Ambassador Aishath Shaan Shakir for the donation from Maldives of USD 1,150,000 for the Rohingyas @MDVForeign pic.twitter.com/Ex6oD03DHv
— Maldives Embassy BD (@MDVinBGD) April 1, 2018
އެކަމާ ގުޅޭ ގޮތުން އިސްލާމިކް މިނިސްޓްރީއާ ސުވާލު ކުރުމުން، އެ މިނިސްޓްރީގެ އޮފިޝަލަކު ވިދާޅުވީ ބަންގުލަދޭޝްގައި ހުންނަ ރާއްޖޭގެ އެމްބަސީން ކުރި ޓްވީޓުގައި ބުނެފައިވާ 1.15 މިލިއަން ރުފިޔާއަކީ ދެ ބުރަކަށް ބަހާލައިގެން ޖަމާކުރި ފައިސާ ކަަމަށެވެ. ފުރަތަމަ ބުރުގައި 200،000 (ދެ ލައްކަ) ޑޮލަރު ޖަމާކޮށްފައިވާ ކަމަށާއި ދެ ވަނަ ބުރުގައި 950،000 (ނުވަ ލަައްކަ ފަންސާސް ހާސް) ޑޮލަރު ޖަމާކޮށްފައިވާ ކަމަށެވެ.
"ޓްރާންސްފާ ފީގެ ގޮތުގައި އެއްޗެއް ނަގާނެކަން ނުވަތަ ނޫންކަން އެހާތަނަށް ޔަގީން ވެފައި ނުވާތީ އާއި ޓްރާންސްފާ ފީގެ ގޮތުގައި އެއްޗެއް ދައްކަން ޖެހިއްޖެ ހާލަތެއްގައި 18.1 މިލިއަން އެއްފަހަރާ ފޮނުވައިފިނަމަ، އެކަމުގެ ސަބަބުން އިތުރު ލަސްކަމެއް އައިސްދާނެތީ،" އިސްލާމިކް މިނިސްޓްރީގެ އޮފިޝަލް ވިދާޅުވިއެވެ.
އިސްލާމިކް މިނިސްޓްރީގެ އޮފިޝަލް ވިދާޅުވީ ރޮހިންޖާ ފަންޑުން ނުފޮނުވި ހުރި ބާކީ ފައިސާ މި މަހުގެ ތިން ވަނަ ޓީޓީއެއްގައި ފޯރުކޮށްދެވޭނެ ކަމަށެވެ.
އޮފިޝަލް ވިދާޅުވީ ރޮހިންޖާ ފަންޑުގެ ފައިސާ ބޭންކަށް ޖަމާކޮށް، މިހާރު އެ ހިނގަނީ ބޭންކު ޕްރޮސެސްއާ ޓެކްނިކަލް ކަންތައްތަކުގެ މަރުހަލާތަކެއް ކަމަށެވެ.
އޮފިޝަލް އެގޮތަށް ވިދާޅުވިއިރު، އިސްލާމިކް މިނިސްޓަރު އެފަދަ ވާހަކަތަކެއް މީޑިއާއަކަށް ތިލަކޮށެއް ނުދެއްވައެވެ. ވިދާޅުވީ ހުރިހާ ފައިސާ އެއްފަހަރާ ރޮހިންޖާ މީހުންނާ ހަވާލުކޮށްފައިވާ ކަމަށެވެ.
ރޮހިންޖާ ފަންޑަށް ފައިސާ ހޯދުމަށް މީޑިއާތަކާ ގުޅިގެން މިނިސްޓްރީން ހިންގި ހިންގި ޓެލެތޯން ނިންމާލުމަށްފަހު، މިނިސްޓަރު ޒިޔާރު ކުރިން ވިދާޅުވީ ހަފްތާއެއްހާ ދުވަހުގެ ތެރޭގައި ރޮހިންޖާ މީހުންނަށް އެ ފައިސާ ހަވާލުކޮށްދޭނެ ކަމަށެވެ. ނަމަވެސް އެ ފައިސާ ހަވާލު ކުރުމުގެ މަރުހަލާ ވެސް ފެށިފައި އެ ވަނީ ފަސް މަސް ފަހުންނެވެ. އަދި ހަވާލުކުރި ފައިސާގެ ތެރެއިން، ތިން ލައްކައެއްހާ ރުފިޔާ އެ ވަނީ މަދުވެފައެވެ.