ޣައްޒާގެ ބޯޑަރު ސަރައްދުގައި ފަލަސްތީނުގެ މުޒާހިރީންނާ ދެކޮޅަށް ދެމުންދާ ހަމަލާތައް ދިވެހި ސަރުކާރުން ކުށްވެރި ކޮށްފިއެވެ.
މިކަން ކުށްވެރިކޮށް ފޮރިން މިނިސްޓްރީ އިން ކުރި ޓްވީޓެއްގައި އިތުރަށް ބުނީ މި ހަމަނުޖެހުންތަކުގެ ޝިކާރައަކަށްވެފައިވާ ފަރާތްތަކުގެ އާއިލާތަކަށް ތައުޒިޔާ ފޮނުވާ ކަމަށާއި އަދި ފަލަސްތީނުގެ އުޚުވަތްތެރި ރައްޔިތުންގެ ހިތާމައިގައި ބައިވެރިވާ ކަމަށެވެ.
ފަލަސްތީނުގެ ސިއްހަތާ ބެހޭ ވުޒާރާއިން ބުނީ އިސްްރާއީލު-ޣައްޒާގެ ބޯޑަރު ސަރައްދުގައި ފަލަސްތީނުގެ ރައްޔިތުން ކުރި މުޒާހަރާގައި އިސްރާއީލު ސިފައިން ހަމަލާ ދިނުމުގެ ސަބަބުން ފަލަސްތީނުގެ ފަނަރަ މީހުން މަރުވި ކަމަށާއި އަދި 750 އަށް ވުރެ ގިނަ މީހުން ޒަޚަމްވެފައިވާ ކަމަށެވެ. އެހެން ނަމަވެސް އިސްރާއީލުގެ އަސްކަރިއްޔާ އިން ބުނީ ފަލަސްތީނުގެ މުޒާހިރީން މަސައްކަތް ކުރީ ސުލްހަވެރިކަމާއެކު މުޒާހަރާ ކުރުމަށް ނޫން ކަމަށާއި އެގޮތުން ބައެއް މުޒާހިރީން ގާއުކާ އަދި އަލިފާން ރޯކޮށްފައިވާ ޓަޔަރުތައް އިސްރާއީލު ސިފައިންނާ ދެކޮޅަށް އުކަމުން ދިޔަ ކަމަށެވެ.
GoM condemns the deadly attacks on Palestinian protesters near Gaza's border. Deepest condolences to the Government and brotherly people of #Palestine including the families of the victims - Foreign Minister @ASIM_MDV
— MFA Maldives (@MDVForeign) March 31, 2018
އިސްްރާއީލު-ޣައްޒާގެ ބޯޑަރު ސަރައްދުގައި ފަލަސްތީނުގެ ރައްޔިތުން ފޭލިގެ ޖަހައި، ފަލަސްތީނު އެތައްހާސް ރައްޔިތުން ހުކުރު ދުވަހު ހެނދުނުން ފެށިގެން ގެންދަނީ މުޒާހަރާ ކުރަމުންނެވެ. "ގްރޭޓް މާޗް އޮފް ރިޓާން"ގެ ނަމުގައި ހަ ހަފުތާގެ މުއްދަތަށް ފަލަސްތީނު ރައްޔިތުން ފެށި މުޒާހަރާގައި ފަލަސްތީނު މީހުން ޑިމާންޑް ކުރަމުން ދަނީ އިސްރާއީލުގައި މިހާރު ދިރިއުޅޭ ފަލަސްތީނުގެ ރެފިއުޖީން އެ މީހުންގެ ގެދޮރަށް އަނބުރާ ގެނައުމަށެވެ. އިހްތިޖާޖް ނިންމަން ހަމަޖައްސާފައި ވަނީ މެއި 15 ވަނަ ދުވަހު ކަމަށްވާއިރު އެއީ ފަލަސްތީނުން ކިޔާ ގޮތުން ނަކްބާ ނުވަތަ ހަލާކުގެ ދުވަހެވެ. ނުވަތަ 1948 ވަނަ އަހަރު އިސްރާއީލް އުފެދުނު ދުވަހެވެ.
