އެޓަރނީ ޖެނެރަލް އޮފީހުގެ ސްޓޭޓް ކައުންސެލް މަރިޔަމް ޝުނާނާ އިސްތިއުފާ ދެއްވައިފި އެވެ.
ރައީސް އަބްދުﷲ ޔާމީން އިއުލާން ކުރެއްވި ކުއްލި ނުރައްކަލުގެ ހާލަތާއި ދެކޮޅަށް ޝުއޫރު ފާޅު ކުރެއްވި ޝުނާނާ އެމަގާމުން އިސްތިއުފާ ދެއްވާފައިވަނީ ބުދަ ދުވަހު އެވެ.
މަގާމުން އިސްތިއުފާ ދެއްވިކަން ހާމަކުރައްވާ، ޝުނާނާ ކުރެއްވި ޓްވީޓެއްގައި ވަނީ 10 އަހަރަށްވުރެ ގިނަ ދުވަހު ވަޒީފާ އަދާ ކުރުމަށްފަހު އެޓަރނީ ޖެނެރަލްގެ އޮފީޙުން ވަކިވުމަށް ނިންމެވީ އުނދަގޫ ނިންމެވުމެއް ކަމަށެވެ. އެހެންނަމަވެސް އެނިންމުން ނިންމެވީ ކޮންމެހެން އެކަން ކުރައްވަން ޖެހިވަޑައިގެން ކަމަށާއީ، އޭޖީ އޮފީހުން އިސްތިއުފާ ދެއްވި ނަމަވެސް ރައްޔިތުންނަށް ރަނގަޅު ޚިދުމަތެއް ކޮށްދެވޭނެ ކަމަށް އުއްމީދު ކުރައްވާ ކަމަށް ޝުނާނާ ވިދާޅުވި އެވެ.
It was a very difficult decision to resign from AGO where I have worked for around 10 yrs. But, this was necessary & I hope to do some good out there serving public. Will always cherish overwhelming love & respect staffs of AGO had given me.
— Mariyam Shunana (@shuna_007) March 28, 2018
މަގާމުން އިސްތިއުފާ ދެއްވުމުގެ ކުރިން އަންގާރަ ދުވަހު ކުރެއްވި ޓްވީޓެއްގައި ވަނީ، ދައުލަތުގެ ވަކީލުންނަކީ ދައުލަތުގެ އިސް ފަރާތްކާއި މުއައްސަސާތަކުން ހިންގާ ޤާނޫނާއި ޚިލާފް އަމަލުތައް ދިފާއު ކުރުމަށް ގެންގުޅޭ ބައެއްގެ ގޮތުގައި ދެކިގެންނުވާނެ ކަމަށް ވިދާޅުވެފައިވެއެވެ.
މީގެ ކުރިން ޝުނާނާ ވަނީ، ކުއްލި ނުރައްކަލުގެ ހާލަތު އިއުލާން ކޮށްފައިވަނީ ޤާނޫނު އަސާސީ އާ ޚިލާފަށް ކަމަށް ވިދާޅުވެ، ކުއްލި ނުރައްކަލުގެ ހާލަތު ނިމުމަކަށް ގެނައުމަށް ގޮވާލާ، އެ ނިންމުމަށް ފާޅުކަން ބޮޑު ގޮތެއްގައި ފާޑު ވިދާޅުވެފައެވެ.
