ކުއްލި ނުރައްކަލުގެ ޙާލަތު ސަރުކާރުން އުވާލި ނަމަވެސް ޙާލަތު އަދިވެސް ބަދަލު ނުވާ ކަމަށާއި، އިޙްތިޖާޖުތައް ކުރިއަށްދާނެ ކަމަށް ގުޅިފައިވާ ސިޔާސީ ޕާޓީތަކުން ބުނެފިއެވެ. 

ގުޅިފައިވާ ސިޔާސީ ޕާޓީތަކުން ބުރާސްފަތި ދުވަހުގެ ހަވީރު އިދިކޮޅު މައި ޕާޓީ އެމްޑީޕީގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ބުނީ ޙާލަތު ބަދަލުވަންދެން ހުއްޓުމެއް ނެތި އިހްތިޖާޖުތައް ކުރިއަށްދާނެ ކަމަށެވެ. 

ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްޑީޕީގެ ސެކްރެޓަރީ ޖެނެރަލް އަނަސް އަބްދުއްސައްތާރު ވިދާޅުވީ ކުއްލި ނުރައްކަލުގެ ޙާލަތު އުވިގެން ދިޔަޔަސް މިހާރު އޮތް ޙާލަތު އުވިގެން ދިޔަ ކަމަށް ނުފެންނަ ކަމަށެވެ. އެގޮތުން ކުއްލި ނުރައްކަލުގެ ޙާލަތުގެ ދަށުން ހައްޔަރުކުރި ސިޔާސީ ހައްޔަރީންނާއި ސުޕްރީމް ކޯޓުގެ ފަނޑިޔާރުން އަދިވެސް ތިބީ ބަންދުގައިކަން އަނަސް ފާހަގަކުރެއްވިއެވެ. 

"އަޅުގަނޑުމެން އޭރުވެސް ދައްކަމުން ދިޔަ ވާހަކައަކީ މި ޙާލަތުގެ ބޭނުން ކުރައްވައިގެން ރައީސް ޔާމީން ކުރެއްވިކަމަކީ މުއައްސަސާތަކުގެ މައްޗަށް ގެއްލެމުން ދިޔަ އެމަނިކުފާނުގެ ބާރުތައް އެމަނިކުފާނުގެ ގޮށްމުށުގެ ތެރެއަށް ގެންދިޔުން،" އަނަސް ވިދާޅުވިއެވެ. 

މީގެ އިތުރުން ހައްޔަރުކުރެވިފައިވާ ފަރާތްތަކަށް ބަންދުގެ މުއްދަތު ޖެހުމަށް ކްރިމިނަލް ކޯޓަށް ހާޒިރުކުރެވުނު ގޮތާ މެދު ވެސް އަނަސް ފާޑުވިދާޅުވިއެވެ.

"އަޅުގަނޑުމެންނަށް ފެނިގެން ދިޔައީ ކްރިމިނަލް ކޯޓުގައި ތިއްބެވި ފަނޑިޔާރުންގެވެސް އެއްވެސް ބާރެއް ނެތި ބަންދުގެ މުއްދަތުގެ ނުވަތަ ޝަރީޢަތުގެ މަޖިލިސްތައް ތާވަލުކުރެވިގެން، އެއްގަޑިއެއްގައި ހުރިހާ ބޭފުޅުން ގެނެސް އެއް ފަނޑިޔާރެއްގެ ކުރިމައްޗަށް ހުރިހާ ބޭފުޅުންގެ ބަންދުގެ މުއްދަތު ޖަހަން ހަވާލުކުރެވުނުތަން."

ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނޮޅިވަރަމް ދާއިރާގެ މެމްބަރު ހުސެން އަރީފް ވިދާޅުވީ ކުއްލި ނުރައްކަލުގެ ޙާލަތުގެ ދަށުން ހައްޔަރުކުރެވުނު ބައެއް ފަރާތްތަކަށް ޓެރަރިޒަމްގެ ދައުވާކޮށް، ޓެރަރިސްޓުންގެ ލަޤަބު ދޭ ގޮތާއިމެދު ޙައިރާންވާ ކަމަށެވެ. އަދި ސަރުކާރުން ސިޔާސީ ލީޑަރުންނަކީ ޓެރަރިސްޓުންނޭ ބުންޏަސް، ރާއްޖޭގެ އާބާދީގެ 95 އިންސައްތަ ރައްޔިތުން ޤަބޫލުކުރާ ގޮތުގައި އެފަރާތްތަކަކީ ބަޠަލުން ކަމަށް އަރީފް ވިދާޅުވިއެވެ.

"ދީނާއި ޤައުމުގެ ހައްޤުގައި މިއަދު ބަހެއް ބުނާ ކޮންމެ މީހަކު ފެތިގެން މިދަނީ ތުހުމަތުތަކެއްގެ ތެރެއަށް. އަޅުގަނޑުމެން އެބަޖެހޭ މިޤައުމު ސަލާމަތްކުރުމަށްޓަކައި ވަރަށް ވަރުގަދަ އަޒުމެއް ކަނޑައަޅަން. އަޅުގަނޑުމެން އެބަޖެހޭ މިރޭގެ އިހްތިޖާޖަށް ވެސް ހުރިހާ ދިވެހި ރައްޔިތުން ނުކުންނަން،" އަރީފް ވިދާޅުވިއެވެ

ޢަދާލަތު ޕާޓީގެ ފަރާތުން ވާހަކަ ދައްކަވަމުން އެޕާޓީގެ މީޑިއާ ކޮމިޓީގެ މުޤައްރިރު އަލީ ނަޒީރު ވިދާޅުވީ ނަމެއްގައި ނަމަވެސް ކުއްލި ނުރައްކަލުގެ ޙާލަތު އުވާލީ ރައްޔިތުން ކުރަމުންދިޔަ އިޙްތިޖާޖުގެ ސަބަބުން ސަރުކާރަށް ކެތް ނުވެގެން ކަމަށެވެ. ކުއްލި ނުރައްކަލުގެ ޙާލަތު އުވާލި ކަމަށް ސަރުކާރުން ބުނި ނަމަވެސް، އެޙާލަތުގެ ދަށުން ޖެހުނު ހުރިހާ މުޞީބާތެއް އަދިވެސް ދެމި އެބައޮތް ކަމަށް އޭނާ ވިދާޅުވިއެވެ. އަދި ކުއްލި ނުރައްކަލުގެ ޙާލަތު އިއުލާންކުރި ފަހުން ރާއްޖޭގައި މިހާރު މިއޮތީ 'ފުލް ފްލެޖްޑް ޑިކްޓޭޓަރޝިޕެއް' ކަމަށް ވިދާޅުވެ، އިހްތިޖާޖަށް ރައްޔިތުން ނިކުތުމަށް ނަޒީރު ވެސް ގޮވާލެއްވިއެވެ.

އެހެންނަމަވެސް ތާއަބަދު މިހެން ކަންކަން ނޯންނާނެކަން އޭނާ ފާހަގަކުރެއްވިއެވެ.

"މިވަގުތު އަޅުގަނޑުމެންނަށް ކަށަވަރުކޮށް އެނގޭކަމަކީ ދިވެހި ރައްޔިތުން މަގުތަކަށް ނިކުމެ އިހުތިޖާޖުކުރަން ޖެހޭ ސަބަބުތައް ގިނަވެއްޖެކަން. ކުރިއަށްވުރެ ބާރުލާފައި، ކުރިއަށްވުރެ ހިތްވަރު ލާފައި، ކުރިއަށްވުރެ ވަރުގަދަ އަޒުމަކާއި އެކީގައި މިއަދު އެބަޖެހޭ އަޅުގަނޑުމެން އިހްތިޖާޖުކުރަން. މި އިހުތިޖާޖުތަކުގެ ތެރެއިން ﷲ އިރާދަކުރެއްވިއްޔާ އަޅުގަނޑުމެންނަށް 1 ފެބްރުއަރީ 2018 ވަނަ ދުވަހު މިދިވެހިރާއްޖޭގެ ސުޕްރީމް ކޯޓުގެ އިއްތިފާޤުން ނެރުއްވާފައިވާ އޮތް އަމުރު ތަންފީޒުރުމާއި ހަމަޔަށް ދެވޭނެ. މިރާއްޖެ އަމާން ބަނދަރަކާއި ހަމަޔަށް ގެންދެވޭނެ. އަޅުގަނޑުމެންނަށް އުފާވެރި ފާގަތި މުސްތަޤްބަލެއް ހާސިލްކުރެވޭނެ،" ނަޒީރު ވިދާޅުވިއެވެ. 

ނޫސްވެރިންގެ ބައްދަލުވުމުގައި ޖުމްހޫރީ ޕާޓީގެ ފަރާތުން ބައިވެރިވެވަޑައިގެންނެވި މުހައްމަދު އިލްހާމް ވިދާޅުވީ ރައްޔިތުންނަކީ ޓެރަރިސްޓުންނޭ ސަރުކާރުން ބުނި ނަމަވެސް، ރައްޔިތުންނަކީ ޓެރަރިސްޓުން ނޫން ކަމަށެވެ. އަދި ރައްޔިތުންނަކީ ޓެރަރިސްޓުންނޭ ބުނާއިރު، ސަރުކާރަކީ ފާއިތުވި ދެތިން އަހަރު ރައްޔިތުންނަށް އޮތް ބިރެއްކަމަށްވެސް އިލްހާމް ސިފަކުރެއްވިއެވެ. އަދި މަޖިލީހާއި ފަނޑިޔާރުގެ ސިފައިން ހިސާރުކޮށްފައިވާތީ އެކަމަށް ފާޑުވިދާޅުވަމުން އިލްހާމް ވިދާޅުވީ ފަނޑިޔާރުގެ އިސްލާޙުކުރަންވީ ފަނޑިޔާރުން ހައްޔަރުކޮށްގެން ނޫން ކަމަށާއި، މަޖިލިސް ރަނގަޅުކުރަން ޖެހެނީ މަޖިލިސް ހިސާރުކޮށް، އެތަނުގައި ބޮޑު ތަޅުއަޅުވައިގެން ނޫން ކަމަށެވެ. މީގެ އިތުރުން ސިފައިންނާއި ފުލުހުންނަކީ ސަރުކާރު ޙިމާޔަތްކޮށްދޭން ޖެހޭ ބައެއް ނޫން ކަމަށާއި، ސިފައިންނާއި ފުލުހުން ޔުނިފޯމް އެޅުމުގެ މާކުރިން އެމީހުންނަކީ ފުރަތަމަ ދިވެހި ރައްޔިތުން ކަމަށާއި، އިސްކަން ދޭންވީ ޤައުމު ހިމާޔަތްކުރުމަށް ކަމަށް އިލްހާމް ވިދާޅުވިއެވެ.

"ތިބޭފުޅުން ދިވެހި ރައްޔިތުން ކަމުގައި ދެކިގެން، އެއިހުސާސާއި އެއްކޮށް، ޤައުމު ސަލާމަތްކުރަން އަޅުގަނޑުމެންނާއި އެއްކޮށް މަސައްކަތްކޮށްދެއްވާ. އަޅުގަނޑުމެންގެ އަޑު އުފުލޭއިރު އަޅުގަނޑުމެންނަށް ސަލާމަތާއި ރައްކާތެރިކަން ދެއްވަން އެތާގައި ތިއްބަވާށޭ އަޅުގަނޑުމެންނަށް މިކަން ކޮށްދޭން،" އިލްހާމް ފުލުހުންނަށް އިޝާރާތްކުރައްވައި ވިދާޅުވިއެވެ.

ކުއްލި ނުރައްކަލުގެ ޙާލަތު އުވާލާފައި ވަނީ 44 ދުވަހާއި 16 ގަޑިއިރު ފަހުންނެވެ. ކުއްލި ނުރައްކަލުގެ ޙާލަތު އިއުލާންކޮށް، ޤާނޫނު އަސާސީގައި ރައީސުލްޖުމްހޫރިއްޔާއަށް ކުއްލި ނުރައްކަލުގެ ޙާލަތުގައި ސަސްޕެންޑްކުރެވޭނެކަމަށް ބުނާ މާއްދާތައް ފިޔަވައި އެހެން ބައެއް މާއްދާތަކާއި، ޖިނާޢީ އިޖުރާތުގެ ޤާނޫނާއި، ފަނޑިޔާރުންގެ ޤާނޫނުގެ ބައެއް ބައިތައް ރައީސް ޔާމީން ސަސްޕެންޑްކުރެއްވީ ފެބްރުއަރީ މަހުގެ 5 ވަނަ ދުވަހުގެ ރޭ 8:00ގައެވެ. އަދި ހަމައެރޭ އުއްތަމަ ފަނޑިޔާރު އަބްދުﷲ ސަޢީދާއި، ފަނޑިޔާރު އަލީ ޙަމީދުގެ އިތުރުން ކުރީގެ ރައީސް މައުމޫން އަބްދުލްޤައްޔޫމާއި، އެމަނިކުފާނުގެ ދަރިކަނބަލުން ޔުމްނާ މައުމޫންގެ ފިރިކަލުން މުހައްމަދު ނަދީމް އަދި ޗީފް ޖުޑީޝަލް އެޑްމިނިސްޓްރޭޓަރ ހަސަން ސަޢީދު ހައްޔަރުކުރިއެވެ. އިދިކޮޅު ފަރާތްތަކުން ބުނާ ގޮތުގައި ކުއްލި ނުރައްކަލުގެ ޙާލަތު އިއުލާންކުރީ ސަރުކާރުން ސުޕްރީމް ކޯޓުގެ އަމުރު ތަންފީޒުނުކުރުމަށެވެ.