ރިޔާސީ އިންތިހާބުގައި އިލެކްޓްރޯނިކް ވޯޓިންގ (އީ-ވޯޓިން) ބޭނުން ނުކުރަން ނިންމާފައިވާ ކަމަށް އިލެކްޝަންސް ކޮމިޝަނުން ބުނެފި އެވެ.
އިލެކްޝަންސް ކޮމިޝަނުގެ ރައީސް އަހުމަދު ޝަރީފު ވިދާޅުވީ އީ-ވޯޓިންގ އަކަށް ދާއިރު ގާނޫނުގެ ތެރެއިން ބަދަލުތަކެއް ގެންނަންޖެހޭ ކަމަށާއި އެހެން ކަމުން ކުރިއަށް މިއޮތް މުއްދަތުގައި ގާނޫނަށް ގެންނަން ޖެހޭ އިސްލާހުތައް ގެނެވޭނެ ކަމަށް ގަބޫލު ނުކުރާ ކަމަށެވެ. އެހެން ކަމުން ކުރިއަށް އޮތް ރިޔާސީ އިންތިހާބުގައި އީ-ވޯޓިންގ އަކަށް ނުދާނެ ކަމަށް އޭނާ ވިދާޅުވި އެވެ. ރިޔާސީ އިންތިހާބު ބޭއްވުމަށް ނިންމާފައިވަނީ ސެޕްޓެމްބަރު މަހުގެ ކުރީކޮޅު އެވެ.
ޝަރީފު ވިދާޅުވީ، އީ-ވޯޓިންގ ގާއިމް ކުރުމަށް ކުރަންޖެހޭ މަސައްކަތްތައް ފުރިހަމަ ނުވާނެތީ އީ-ވޯޓިންގ އިންތިހާބުގައި ބޭނުން ނުކުރެވުނު ނަމަވެސް، ވޯޓު ގުނުމުގައި އީ-ކައުންޓިންގ ބޭނުންކޮށްފާނެ ކަމަށެވެ. އެހެން ނަމަވެސް އެކަމުގައިވެސް ގޮތް ތަކެއް ކަނޑައަޅާފައިނުވާނެ ކަމަށް އޭނާ ވިދާޅުވި އެވެ.
އިލެކްޝަންސް ކޮމިޝަނުން އެންމެ ފުރަތަމަ އީ-ވޯޓިންގ ސިސްޓަމެއް ގާއިމް ކުރުމުގެ ވާހަކަ ދައްކާފައި ވަނީ 2015 ވަނަ އަހަރުގެ ތެރޭގަ އެވެ.
އޭރުއްސުރެ އީ-ވޯޓިންގ ރާއްޖެއަށް ތައާރަފް ކުރުމަށް ގިނަ މަސައްކަތްތަކެއް އިލެކްޝަންޝް ކޮމިޝަނުން ކޮށްފައިވެ އެވެ. އީ-ވޯޓިންގ ގެ އެންމެ ބޮޑު އެއް ފައިދާއަކީ ވޯޓް ގުނުމާއި، ޑޭޓާ ކަލެކްޓް ކުރުމަށް ހޭދަވާ ވަގުތު ސަލާމަތްވެ ހަރަދު ކުޑަވުންކަމަށް ވެސް އިލެކްޝަންސް ކޮމިޝަނުން ބުނެ އެވެ.
އީ-ވޯޓިންގ ތައާރަފް ކުރުމަށް މަސައްކަތް ފެށި ހިސާބުން އިދިކޮޅު ފަރާތްތަކުންވެސް މިފަދަ ސިސްޓަމެއް ރާއްޖެއާ ނުގުޅޭ ކަމަށާއި އީ-ވޯޓިންގ ތައާރަފް ކުރުމަށް މަސައްކަތް ކުރަމުންދަނީ ވޯޓު އޮޅުވާލުމަށް ކަމަށެވެ. އަދި ދެފުއްފެންނަ ނިޒާމެއް ނޫން ކަމަށްވެސް އިދިކޮޅު ފަރާތްތަކުން ބުނެ އެވެ.
