ކްރިމިނަލް ކޯޓުގެ ގާޒީންނާއި ގުޅޭ ގޮތުން، އާންމުންގެ ހިތްތަކުގައި ނަފުރަތު އުފެދޭ ގޮތަށް ވާހަކަދައްކާ ފަރާތްތަކާ މެދު ގާނޫނީ ފިޔަވަޅު އަޅާނެ ކަމަށް ބުނެ އެކޯޓުން އިންޒާރުދީފި އެވެ.
ކްރިމިނަލް ކޯޓުން އާންމު ކޮށްފައިވާ ނޫސްބަޔާނުގައި، ބުނެފައިވަނީ އުއްތަމަ ފަނޑިޔާރު އަބްދުﷲ ސައީދުގެ މައްޗަށް ކޯޓުން ހުށަހަޅާފައިވާ ދައުލަތުގެ މަސައްކަތަށް ހުރަސްއެޅުމުގެ ކުށުގެ ދައުވާ އާއި ގުޅިގެން، 18 މަރޗު 2018 ވަނަ ދުވަހު ބޭއްވި ޝަރީއަތުގެ މަޖިލީހުގައި އަބްދުﷲ ސައީދުގެ މައްޗަށް ޝަރީއަތް ކުރިއަށް ގެންދެވޭނީ ޖިނާއީ ކޮން އިޖުރާއަތަކާ ގުޅިގެންކަން ދިފާއުން ސުވާލު ކުރެއްވުމުން މައްސަލާގައި ތުހުމަތު ކުރެވޭ ފަރާތަކީ ކުއްލި ނުރައްކަލުގެ ހާލަތު އިއުލާނު ކުރުމާ ގުޅޭ ރައީސުލްޖުމްހޫރިއްޔާގެ ގަރާރު ނެރުއްވި ސަބަބުކަމުގައި އެ ގަރާރުގައި ބަޔާންކޮށްފައިވާ ފަދަ ކުށެއްގެ ތުހުމަތުގައި ދައުވާ އުފުލިފައިވާ ފަރާތެއްކަން ހާމަކޮށްފައިވާނެ ކަމަށް އެންގި ކަމަށެވެ.
އެގަރާރުގައި ބަޔާންކޮށްފައިވާ ގޮތުގެމަތިން ޖިނާއީ އިޖުރާއަތުގެ ގާނޫނަކީ އެގަރާރުން އަމަލުކުރުން ހުއްޓާލެވިފައިވާ ގާނޫނަކަށްވީ ނަމަވެސް އަބްދުﷲ ސައީދުގެ މައްޗަށް ދައުވާ ކުރެވިފައިވާ މައްސަލައިގެ ޝަރީއަތް ކުރިއަށް ގެންދެވޭނީ އެ ގަރާރުގައި ބަޔާންކޮށްފައިވާ ހުދޫދުގައި މިނިވަން އިންސާފުވެރި ޝަރީއަތް އަބްދުﷲ ސައީދަށް ލިބިގެންވާކަން ޝަރީއަތަށް ކަވަރުވާ ގޮތުގެ މަތިން ރާއްޖޭގައި އަމަލު ކުރަމުންދާ އާންމު އިޖުރާއަތާ އެއްގޮތްވާ ގޮތުގެ މަތިން ކަމަށް ކްރިމިނަލް ކޯޓުގެ ބަޔާނުގައިވެ އެވެ.
މައްސަލާގައި މިވަގުތު ޝަރީއަތް ކުރިއަށްދަނީ ކުއްލި ނުރައްކަލުގެ ހާލަތުގެ ގަރާރުގައި ބަޔާންކޮށްފައިވާ ހުދޫދުގެ ތެރޭގައި ކަމަށް ވީ ނަމަވެސް، އެގަރާރުން ހަނިކުރެވިފައިވާ ހައްގުތައް ހަނިކުރެވޭނީ ކުއްލި ނުރައްކަލުގެ ހާލަތުގައި އެފަދަ ހައްގެއް ކޮންމެހެން ހިފަހައްޓަން ޖެހިއްޖެ މިންވަރަން ކަމަށް އެކޯޓުން ބުނެ އެވެ. ދިވެހި ދައުލަތުން ކުއްލި ނުރައްކަލުގެ ހާލަތުގެ ގަރާރުގެ މުއްދަތު އިތުރު ނުކުރައްވައިފި ނަމަ އެގަރާރުން ހަނިކުރެވިފާ ހައްގުތައް ހަނިކުރެވިފައިވާ ހަނިކުރުން އެދުވަހުން ފެށިގެން ނިމުމަކަށް އަންނާނެކަން ތަކުރާރުކޮށް ޝަރީއަތުން ސާފުކޮށްދިން ކަމަށް ވެސް ކްރިމިނަލް ކޯޓުން ބުނެ އެވެ. އެހެން ނަމަވެސް މައްސަލައިގެ ޝަރީއަތް ނިމުމުން އަބްދުﷲ ސައީދުގެ ގާނޫނީ ވަކީލުންގެ ޓީމުން މި މައްސަލަ ބަލާ ގާޒީ މައްސަލަ ކުރިއަށްގެންދަނީ ހިތު ހުރި ގޮތަކަށް ކަމަށް ވިދާޅުވި ކަމަށް ބުނެ ފަތުރާފައިވަނީ ދޮގު ވާހަކަތަކެއް ކަމަށް ކްރިމިނަލް ކޯޓުން ބުނެ އެވެ.
މިފަދަ ދޮގު ވާހަކަތައް ފަތުރައިގެން ކޯޓާއި ކޯޓުގެ ގާޒީންނާ މެދު އާންމުންގެ ހިތްތަކުގައި ނަފުރަތު އުފެދޭ ގޮތަށް ކޯޓުގެ ހުރުމަތް ކެނޑޭނޭހެން ވާހަކަދައްކާ ފަރާތްތަކާ ފިޔަވަޅު އަޅާނެ ކަމަށް ބުނެ އިންޒާރުދީފައިވެ އެވެ.
