ޓްރީ ޓޮޕް ހުޅުވިފަހުން އެންމެ ގިނަ ބަޔަކު ފަރުވާ ހޯދުމަށް އަންނަނީ އިންޓަރނަލް މެޑިސިންއާއި ކަށީގެ ބަލިތަކަށް ފަރުވާ ހޯދުމަށް ކަމަށް އެ ހޮސްޕިޓަލުން ބުނެ އެވެ.

އެ ހޮސްޕިޓަލް މާރޗު އެއްވަނަ ދުވަހުން ފެށިގެން ހިދުމަތްތައް ފަށާފައިވާ އިރު އެ ހޮސްޕިޓަލަށް އެންމެ ގިނައިން ފަރުވާ ހޯދުމަށް އައިސްފައިވަނީ އިންޓަރނަލް މެޑިސިން އާއި ކަށީގެ ފަރުވާތައް ހޯދުމަށް ކަމަށް މައުލޫމާތު ލިބިފައިވެއެވެ.. މީގެ އިތުރުންކަރުން މަތީގެ ބަލިތަކަށް ފަރުވާ ހޯދުމަށާއި ކުޑަކުދިންގެ ބަލިތަކަށް ފަރުވާ ހޯދުމަށް ވެސް ގިނަ ފަރާތްތަކުން އަންނަ ކަމަށް މައުލޫމާތު ލިބިފައިވެއެވެ.

މި ހޮސްޕިޓަލުގެ މަސައްކަތަށް 110 މިލިއަން ޑޮލަރު ހަރަދުވެފައިވެއެވެ.

ފަސް ބުރީގެ އެ ހޮސްޕިޓަލުގައި އެކްސިޑެންޓްތަކާއި އެމަރޖެންސީ ހިދުމަތްތަކަށް ހާއްސަ ޓްރައޭޖެއް ވަނީ ގާއިމް ކޮށްފައެވެ. ރާއްޖޭގައި ފުރަތަމަ ގާއިމްކުރާ ޕްރައިވެޓް ޓަރޝަރީ ހޮސްޕިޓަލުގައި 210 އެނދު ގާއިމް ކުރެވިފައިވާ އިރު އެ ހޮސްޕިޓަލުގެ ހިދުމަތްތަކަކީ މެލޭޝިއާގެ ސިމް ޑާބީ ހެލްތްކެއަރ އާއި އޮސްޓްރެއިލިއަރގެ ރަމްސީ ހެލްތްކެއަރއާ ގުޅިގެން ފޯރުކޮށްދިނުމަށް ހަމަޖެހިފައިވާ ހިދުމަތެކެވެ.

ހޮސްޕިޓަލުގައި 80 އަށް ވުރެ ގިނަ ޑޮކްޓަރުން ހަރަކާތްތެރިވުމަށް ނިންމާފައިވާ އިރު 150 އަށް ވުރެ ނަރުހުން ހަރަކާތްތެރިވެ އެވެ

އެ ހޮސްޕިޓަލުން ޑޮކްޓަރަށް ދެއްކުމަށް 750ރ. ހޭދަކުރަންޖެހޭ އިރު ދިވެހިންނަށް 30 ޕަސެންޓްގެ ޑިސްކައުންޓް ލިބިގެންދާނެ އެވެ. އެގޮތުން ދިވެހިން ފަރުވާ ހޯދުމަށް ހަރަދު ކުރަންޖެހެނީ 525ރ. އާ އެވެ. ޓްރީ ޓޮޕް ހޮސްޕިޓަލް ހުޅުވިފަހުން ގިނަ ބަޔަކު ދަނީ އެ ހޮސްޕިޓަލުން ފަރުވާ ހޯދަމުންނެވެ.