ހައްޔަރު ކޮށްފައިވާ ރައީސް މައުމޫންގެ ދަނބިދަރިކަލުން މުހައްމަދު ނަދީމާއި ދިއްގަރު ދާއިރާގެ މެމްބަރު ފާރިސް މައުމޫން، ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)ގެ މެމްބަރުންނާ ބައްދަލު ކުރެއްވުމަށް ހުށަހަޅުއްވައިފި އެވެ.
ކުއްލި ނުރައްކަލުގެ ހާލަތުގެ ދަށުން ހައްޔަރު ކޮށްފައިވާ ނަދީމުގެ ސިއްހީ ހާލަތާ ގުޅޭ ގޮތުން އޭނާގެ ގާނޫނީ ވަކީލު މަހުފޫޒު ސައީދު ވަނީ ކަންބޮޑުވުންފާޅުކުރައްވާފަ އެވެ. އަދި ސާފު ބޯ ފެން ނުލިބި، ފާހާނާގެ އިސްކުރުން ފެން ބޯން ޖެހުމުން ޑައިރިއާ ޖެހި، ސިއްހީ މައްސަލަތަކެއް ނަދީމް ތަހަންމަލް ކުރަމުންދާތީ، އެކަމުގެ ކަންބޮޑުވުން ވެސް އޭނާ ވަނީ އެޗްއާރްސީއެމާ ހިއްސާ ކުރައްވާފައެވެ.
ނަދީމްގެ ފަރާތުން އެޗްއާރްސީއެމަށް ހުށަހެޅުއްވި ސިޓީއެއްގައި މަހުފޫޒު ވިދާޅުވެފައި ވަނީ ސާފު ބޯ ފެނާއި ސާފުތާހިރުކަންކުޑަ ކާއެއްޗެހި ބޭނުން ކުރަންޖެހުމުގެ ސަބަބުން ބޭރަށް ހިންގުމުގެ މައްސަލަތަކެއް އޭނާގެ މުވައްކިލަށް ކުރިމަތިވެފައިވާ ކަމަށެވެ. އަދި ޑޮކްޓަރަށް ދެއްކިތާ ހަފްތާއެއްވެފައިވާ ކަމަށާއި ޑޮކްޓަރު ދެއްވި އެންޓި ބައޮޓިކް ބޭނުން ކުރުމުން ރަނގަޅު ކަމަށް ނުފެންނާތީ އެންމެ ފަހުން ދިން ބޭސް އަޅުގަނޑުގެ މުވައްކިލު ބޭނުންކޮށްފައިނުވާ ކަމަށް އެޗްއާރްސީއެމަށް މަހުފޫޒު ފޮނުއްވެވި ސިޓީގައިވެއެވެ. ޑޮކްޓަރު ދޭ ފަރުވާއާމެދު ސުވާލު އުފައްދައި މަހުފޫޒު ވިދާޅުވެފައި ވަނީ ޑޮކްޓަރުގެ ފަރުވާއާމެދު އެތައް ގައިދީންނެއްގެ ފަރާތުން މީގެ ކުރިން ވެސް އެޗްއާރްސީއެމަށް ޝަކުވާ ހުށަހަޅާފައިވާ ކަމަށެވެ.
My client @MNadhym requests for a meeting with members of @hrcmv . He doesn’t require the antibiotics prescribed by dhoonidhoo doctor and asks for a better and cheaper solution. PROVIDE CLEAN WATER TO DRINK! pic.twitter.com/2fUhHHTT8o
— Mahfooz Saeed (@MahfuzSayd) March 11, 2018
ނަދީމަށް ބޭރަށް ހިންގުމުގެ މައްސަލަ ކުރިމަތިވެެފައި ވަނީ ސާފު ބޯފެން ނުލިބުމުގެ ސަބަބުން ކަމަށާއި ދޫނިދޫގައި ބަންދު ކުރާ މީހުންނަށް ސާފު ބޯފެން ފޯރުކޮށްދެނީ ޑޮކްޓަރުގެ ލަފާގެ މަތިން ކަމަށްވާއިރު، ނަދީމަށް ސާފު ބޯފެން ނުދޭ ސަބަބު ޑޮކްޓަރު ވިދާޅުވެފައި ނުވާ ކަމަށް އޭނާގެ ވަކީލު ވިދާޅުވި އެވެ.
ނަދީމަށް ދޭންޖެހޭ ފަރުވާ ނުދީ ލަސްކުރަމުން ގެންދަނީ ކީއްވެގެންތޯ ބެއްލެވުމަށާއި އެކަމާ ގުޅޭ ފިޔަވަޅުތަކެއް އަޅުއްވައި ދެއްވުމަށް މަހުފޫޒު ހުށަހެޅުއްވި ސިޓީގައި އެދިވަޑައިގެންފައިވެ އެވެ. އަދި ނަދީމް އެދިވަޑައިގެންފައިވާ ގޮތަށް އޭނާއާ ބައްދަލު ކުރެއްވުމަށް، ވެސް މަހުފޫޒު ވަނީ އެޗްއާރްސީއެމަށް ހުށަހަޅުއްވާފައެވެ.
މަހުފޫޒު ވިދާޅުވެފައި ވަނީ ފާރިސް ވެސް އެޗްއާރްސީއެމްގެ ބޭފުޅުންނާ ބައްދަލު ކުރެއްވުމަށް ހުށަހަޅުއްވާފައިވާ ކަމަށާއި އޭނާއާ ވެސް ވީހާވެސް އަވަހަކަށް ބައްދަލު ކުރައްވާނެ ކަމަށް އުންމީދު ކުރައްވާ ކަމަށެވެ.
My client MP @afarismaumoon has requested members of @hrcmv for a meeting. Hope the members will meet him soon.
— Mahfooz Saeed (@MahfuzSayd) March 11, 2018
