އދ. ގެ އިންސާނީ ހައްޤުތަކާ ބެހޭ ހައިކޮމިޝަނަރާއި، ހައިކޮމިޝަނަރުގެ އޮފީހާ އެކު ވާހަކަ ދެއްކުމަށް ދިވެހި ސަރުކާރަށް ކުރީގެ ރައީސް މުހައްމަދު ނަޝީދު ގޮވާލައްވައިފިއެވެ.
ރައީސް ނަޝީދު މިފަދައިން ގޮވާލެއްވީ އދ. ގެ އިންސާނީ ހައްޤުތަކާ ބެހޭ ކައުންސިލުން ރާއްޖޭގެ އިންސާނީ ހައްޤުތަކާއި ސިޔާސީ މަސްރަހުގައި ހިނގަމުންދާ ކަންތައްތަކާ ގުޅިގެން ކަންބޮޑުވުން ފާޅުކޮށް، 41 ޤައުމުން ނެރުނު ބަޔާނާ ގުޅިގެންނެވެ. އދ. ގެ އިންސާނީ ހައްޤުތަކާ ބެހޭ ހައިކޮމިޝަނަރު ޒައިދު ރާދު އަލް ހުސައިން އާއި، އިންސާނީ ހައްޤުތަކާ ބެހޭ އޮފީހާއި، އިންސާނީ ހައްޤުތައް ކަށަވަރުކުރުމުގެ ނިޒާމަށް ރާއްޖެއިން ޖަވާބުދާރީ ނުވާކަން އެ ބަޔާނުގައި ފާހަގަކޮށްފައިވެއެވެ.
ރައީސް ނަޝީދުގެ ޓްވީޓްގައި އެމަނިކުފާނުވަނީ ރާއްޖޭގައި މިހާރު ހިނގަމުންދާ ކަންކަމަށް އދ. ގެ އިންސާނީ ހައްޤުތަކާ ބެހޭ ހައިކޮމިޝަނަރ ޒައިދު ރާދު އަލް ހުސައިން ދެއްވާ ސަމާލުކަމަށް ޝުކުރު އަދާކުރައްވާފައެވެ.
We welcome the ongoing attention given to the situation in the Maldives by you, High Commissioner, and urge the Government of Maldives to engage with you and your Office, as well as the mechanisms of the Council in order to address this extremely worrying situation. https://t.co/J6rzi7zc8I
— Mohamed Nasheed (@MohamedNasheed) March 9, 2018
ސްވިޓްޒަލޭންޑުގެ ޖެނީވާގައި މިހާރު ކުރިޔަށްދާ އދ. ގެ ހިއުމަން ރައިޓްސް ކައުންސިލްގެ 37 ވަނަ ބައްދަލުވުމުގައި 41 ގައުމެއް ގުޅިގެން ނެރުނު ބަޔާނުގައި ވަނީ ރާއްޖޭގައި އިންސާނީ ހައްގުތަކަށް އަހަންމިއްޔަތުކަން ދިނުމަށް ގޮވާލާ ކަމަށާއި ކުއްލި ނުރައްކަލުގެ ހާލަތު ސުލްހަވެރިކަމާއެކު އުވާލުމަށް ގޮވާލާ ކަމަށެވެ. ހަމައެހެންމެ ކުއްލި ނުރައްކަލުގެ ހާލަތު އިއުލާނުކޮށް ހިފެހެއްޓިފައިވާ ގާނޫނޫ އަސާސީގެ ހުރިހާ މާއްދާއެއް އިއާދަކުރުމަށާއި، ސުޕްރީމް ކޯޓާއި ޖުޑީޝަރީގެ ހުރިހާ ގުނަވަނެއް މިނިވަންކަމާއެކު ހިންގުމުގެ ފުރުސަތު ދިނުމަށް ގޮވާލާ ކަމަށެވެ. އަދި ގާނޫނު އަސާސީއާއި އެއްގޮތަށް ގައުމުގެ ކަންކަން ބައްޓަން ކުރުމަށާއި މިނިވަންކަމާއެކު ރައްޔިތުންގެ މަޖިލީހުގެ ހުރިހާ މަސައްކަތެއް ކުރުމުގެ ފުރުސަތު ދިނުމަށްވެސް ވަނީ ގޮވާލާފައެވެ. މީގެ އިތުރުން ސުޕްރީމް ކޯޓުން ފެބްރުއަރީ މަހުގެ ފުރަތަމަ ދުވަހު ނެރުނު އަމުރުގައި ވާގޮތަށް 12 މެމްބަރެއްގެ ގޮނޑި ނުގެއްލޭ ކަމަށާއި އެ މެމްބަރުންނަށް މަސައްކަތްކުރުމުގެ ފުރުސަތު ދެވެން ޖެހޭ ކަމަށް ވެސް މި ބަޔާނުގައިވެއެވެ. ހަމައެހެންމެ ސިޔާސީ ގޮތުން ހައްޔަރުކޮށްފައިވާ ހުރިހާ ހައްޔަރީން ދޫކޮށްލުމަށް ވެސް މިބަޔާނުގައި ވަނީ ގޮވާލާފައެވެ.
