މިއަހަރު ދުނިޔޭގެ ކާބޯތަކެތީގެ ދުވަހުގެ ޝިއާރަކީ "ޗޭންޖް ދަ ފިއުޗާ އޮފް މައިގްރޭޝަން. އިންވެސްޓް އިން ފުޑް ސެކިއުރިޓީ އެންޑް ރޫރަލް ޑިވެލޮޕްމެންޓް" އެވެ. ދުނިޔޭގައި ދިރިއުޅޭ ކޮންމެ މީހަކީ އެމީހެއްގެ ހަށިގަނޑަށް ބޭނުންވާ މިންވަރަށް ކާބޯތަކެތި ކަށަވަރު ވެފައިވާ މީހަކަށް ހެދުމަށް ދުނިޔޭގެ ތަފާތު ޖަމިއްޔާތަކުން މުހިއްމު ގިނަ މަސައްކަތްތަކެއް ކުރެވުނު ނަމަވެސް ދުނިޔޭގައި ބަނޑުހައި ހޫނު ކަމަށާއި ފަގީރުކަން އަންނަނީ އެއް އަހަރުން އަނެއް އަހަރަށް އިތުރުވަމުންނެވެ.

ދުނިޔޭގައި އެކި ސަރަހައްދުތަކަށް މީހުން ދަތުރުކުރަމުންދާ އިރު މިއީ ދެވަނަ ބޮޑު ހަނގުރާމަ ދުވަސްވަރަށް ފަހު އެންމެ ގިނަ މީހުން އެއްތަނުން އަނެއް ތަނަށް ދަތުރުކުރަމުންދާ ދުވަސްވަރެވެ. ދުނިޔޭގެ އާބާދީގެ 763 މިލިއަން މީހުން ހިޖުރަކޮށްފައިވާ އިރު މީގެ ތެރެއިން ބޮޑު އާބާދީއަކީ އަމާން ދިރުއުޅުމެއް ހޯދުމަށާއި ބަނޑުހައި ހޫނުކަމާ ގުޅިގެން ހިޖުރަކޮށްފައިވާ މީހުންނެވެ.

ދުނިޔޭގެ ތަފާސް ހިސާބުތަކަށް ބަލާ އިރު، 2016 ވަނަ އަހަރު ގާތްގަނޑަކަށް 815 މިލިއަން މީހުން ދުވަސް ނިންމާލާފައި ވަނީ ބަނޑުހައިހޫންކަންމަތީގައެވެ.

ޒަމާނީ ތަރައްގީ ގާއިމްކުރެވިފައިނުވާ ސަރަހައްދުތަކުން ތަރައްގީ ވެފައިވާ ސަރަހައްދުތަކަށް މީހުން ހިޖުރަކުރުމުގެ ސަބަބުން، ތަކެތި އުފެއްދުމާއި، ދަނޑުވެރިކަން އިތުރު ކުރުމަށް ވަނީ ހުރަސްތަކާ ކުރިމަތިވެފައެވެ. މިކަމުގެ ސަބަބުން ދުނިޔޭގެ ދަނޑުވެރިކަމާއި އުފައްދާ ތަކެތީގެ މިންވަރު ވަނީ އިންތިހާއަށް މަދުވެފައެވެ.

އޭޝިއަން ޑިވެލޮޕްމެންޓް ބޭންކް (އޭޑީބީ) އިން ވަނީ މިިދިޔަ އަހަރުގެ ޖޫން މަހު، ކާބޯތަކެތި ކަށަވަރު ކުރުމާ ގުޅޭ ގޮތުން މަޝްވަރާކޮށްފައެވެ.

އޭޑީބީ އިން ވަނީ ދަނޑުވެރިކަން އިތުރަށް ފުޅާކުރުމަށް ގާތްގަނޑަކަށް 400 މިލިއަން ޑޮލަރު ދަނޑުވެރިކަމުގެ މަސައްކަތްތަކަށް އޭޝިއާ އާއި ޕެސިފިކް ސަރަހައްދުގެ ގައުމުތަކަށް ހަރަދު ކުރުމަށް ނިންމާފައެވެ.

ކާބޯތަކެތި ހޯދުމުގައި އެއް ދުވަހުން އަނެއް ދުވަހަށް ތަދިތަކާ ކުރިމަތިވާ އިރު ދުނިޔޭގައި ކާބޯތަކެތި އިސްރާފު ކުރާ މިންވަރު ވެސް ދަނީ އެއް ދުވަހުން އަނެއް ދުވަހަށް އިތުރުވަމުންނެވެ.

ވޯލްޑް ފުޑް ޕްރޮގްރާމްގައި ހާމަކޮށްފައިވާ ގޮތުގައި، ގާތްގަނޑަކަށް 8.5 މިލިއަން މީހުން އަފްޣާނިސްތާނުގައި ކާބޯތަކެތި އެކަށީގެންވާ މިންވަރަށް ނުލިބޭ އިރު އިތިއޯޕިއާގައި އެކަށީގެންވާ މިންވަރަށް ނުލިބޭ 9.7 މިލިއަން މީހުން ދިރިއުޅެމުންދެއެވެ. މީގެ އިތުރުން ނައިޖީރިއާގައި ބަނޑުހައިހޫނުކަން ފިލުވާލެވޭ މިންވަރަށް ކާބޯތަކެތި ނުލިބޭ އާބާދީ އުޅޭނީ 8.1 މިލިއަންގައެވެ. ސީރިއާގައި ކާބޯތަކެތި ނުލިބޭ ހަތް މިލިއަން މީހުން ދިރިއުޅޭ އިރު ސޫދާނާއި ޒިންބާބްވޭ ފަދަ ގައުމުގައި އެކަށީގެންވާ މިންވަރަށް ކާބޯތަކެތި ނުލިބޭ މީހުންގެ އާބާދީ އުޅެނީ 4 މިލިއަނަށް ވުރެ މަތީގައެވެ.

ދުނިޔޭގެ އެންމެ ފަހުގެ ތަފާސް ހިސާބަށް ބަލާ އިރު 108 މިލިއަން މީހުންނަށް ދުނިޔޭގެ އެކި ކަންކޮޅުތަކުގައި ބަނޑުފުރާނަ މުއްތިކޮށްލާނެ މިންވަރަށް ވެސް ކާބޯތަކެތި ނުލިބި ދިރިއުޅެމުންދެއެވެ.

ކާބޯތަކެތި ލިބުމުގައި އެންމެ ބޮޑަށް ދަތިވާ ނުވަތަ، ފަގީރުންގެ އާބާދީ އިންތިހާއަށް އިތުރުވާ ސަބަބަކީ ކާބޯތަކެތީގެ އަގުތައް ބޮޑުވުމާއި ގުދުރަކީ ކާރިސާތަކުގެ ސަބަބުންނެވެ.

އދ. ގެ ފުޑް އެންޑް އެގްރިކަލްޗަރ އޮގަނައިޒޭޝަނުން ހާމަކޮށްފައިވާ ގޮތުގައި ދުނިޔޭގައި އުފައްދާ ކާބޯތަކެޓީގެ ތިން ބައިކުޅަ އެއްބައި ކޮންމެ އަހަރަކު ވެސް އިސްރާފްވެގެންދެއެވެ.

އެގޮތުން ތަރައްގީވެފައިވާ ގައުމުތަކުން ގާތްގަނޑަކަށް 680 ބިލިއަން ޑޮލަރުގެ ކާބޯތަކެތި އިސްރާވެގެންދާ އިރު، ތަރައްގީވަމުން އަންނަ ގައުމުތަކުން ގާތްގަނޑަކަށް 310 ބިލިއަން ޑޮލަރުގެ ކާބޯތަކެތި އިސްރާފުވެގެންދެއެވެ.

އެގޮތުން ތަރައްގީވެފައިވާ ގައުމުތަކުންނާއި ތަރައްގީވަމުން އަންނަ ގައުމުތަކުން ޖުމްލަ އެއް ބިލިއަން ޓަނުގެ ކާބޯތަކެތި ކޮންމެ އަހަރަކު އުކާލަންޖެހެއެވެ. އެންމެ ގިނަ އިން އިސްރާފުވެގެންދަނީ މޭވާ އާއި ތަރުކާރީގެ ބާވަތްތަކެވެ. އުފައްދާ ކާބޯތަކެތީގެ ތެރެއިން ގޮވާމުގެ ބާވަތްތަކުން 30 ޕަސެންޓް އިސްރާފުވެގެންދާ އިރު ކާޑުގެ ބާވަތްތަކުން ގާތްގަނޑަކަށް 50 ޕަސެންޓް އިސްރާފުވެެގެންދެއެވެ. މީގެ އިތުރުން އެއްގަމުމަހާއި ކިރުގެ ބާވަތްތަކުން ކޮންމެ އަހަރު 35 ޕަސެންޓް އިސްރާފުވެެންދެއެވެ.

ދުނިޔޭގެ އެންމެ މުއްދަނސި ގައުމުތަކުން ގާތްގަނޑަކަށް އަހަރަކު 222 މިލިއަން ޓަނުގެ ކާބޯތަކެތި އުކާލަންޖެހޭ އިރު މިއީ ސަބް ސަހާރަން އެފްރިކާގެ ގައުމުތަކުން އަހަރެއްގެ މައްޗަށް ގާތްގަނޑަކަށް އުފައްދާ ކާނާގެ ބާވަތުގެ މިންވަރެވެ.

ޔޫރަޕްގައި އިސްރާފުކުރާ ކާބޯތަކެތީގެ ހިސާބުތަކަށް ބަލާ އިރު މީހެއްގެ ބޮލަށް ގާތްގަނޑަކަށް އިސްރާފުކުރާ ކާބޯތެކެތިން 95 ކިލޯ އާއި 115 ކިލޯގެ އަދަދަކަށް ޖެހެއެވެ. އޭޝިއާ ސަރަައްދުގައި އިސްރާފުކުރާ ކާބޯތަކެތި މީހެއްގެ ބޮކަލަށް ޖެހޭ މިންވަރު އުޅެނީ 6 ކިލޯ އާއި 11 ކިލޯ ދެމެދުގެ އަދަދެއްގައެވެ.

ދުނިޔޭގައި ކާބޯތަކެތި ހޭދަކުރުމުގައި ރަގަޅު ނިޒާމެއް ބޭނުންވާ އިރު، ގާތްގަނޑަކަށް 21000 މީހުން ބަނޑުހައިހޫނުކަމާއި މަލްނިއުޓްރިޝަންގެ ސަބަބުން ކޮންމެ ދުވަހަކު މަރުވެއެވެ. މިކަމަކީ އަވަސް ހައްލުތަކެއް ހޯދަންޖެހިފައިވާ މައްސަލައެކެވެ.