މެންޗެސްޓަރ ސިޓީގެ ފޯވާޑް ގެބްރިއަލް ޖީސަސްގެ ކަކުލު ހުޅުގެ ލިގަމެންޓަށް އަނިޔާވެފައިވާކަން އެކްލަބުން ކަށަވަރުކޮށްދީފި އެވެ.

އިނގިރޭސި ޕްރިމިއަރ ލީގުގައި އާދީއްތަ ދުވަހު ކްރިސްޓަލް ޕެލަސް އާއި ދެކޮޅަށް ކުޅެ ލަނޑެއް ނުޖެހި އެއްވަރުވި މެޗުގައި ޖީސަސް އަށް ވަނީ އަނިޔާވެފައެވެ.

ކްރިސްޓަލް ޕެލަސްގެ ދަނޑު ސެލްހާސްޓް ޕާކްގައި ކުޅުނު މިމެޗުގެ ފުރަތަމަ ހާފްގެ ކުރީކޮޅު ލިބުނު އަނިޔާއާ ގުޅިގެން އޭނާ ބަދަލުކުރިއިރު، މެޗަށް ފަހު ބޭއްވި ނޫސްވެރިންގެ ބައްދަލުވުމުގައި ސިޓީގެ ކޯޗު ޕެޕް ގާޑިއޯލާ ވަނީ، ޖީސަސް އަށް ލިބުނު އަނިޔާގެ ސަބަބުން އޭނާ ދެ މަހެއްހާ ދުވަހު ކުޅުމާ ދުރުގައި ހުންނަން ޖެހިދާނެ ކަމަށް ބެލެވޭ ކަމަށް ބުނެފައެވެ.

ޖީސަސްގެ އަނިޔާއާ ގުޅޭ ގޮތުން ސިޓީ އިން ނެރުނު ބަޔާނެއްގައި ވަނީ، އޭނާ އަށް މީޑިއަލް ކޮލޭޓެރަލް ލިގަމެންޓް (އެމްސީއެލް) އިންޖަރީއެއް ކުރިމަތިވެފައިވާ ކަމަށާއި، ކުޅުމާ ދުރުގައި ހުންނަން ޖެހޭ މުއްދަތު ކަށަވަރު ވާނީ އިތުރު ޓެސްޓްތަކަށް ފަހުގައި ކަމަށެވެ.

އަނިޔާއާ ގުޅޭ ގޮތުން ޖީސަސް ކުރި ޓްވީޓެއްގައި ވަނީ، އޭނާގެ ވައަތު ކަކުލަށް ލިބުނު އަނިޔާގެ ޓެސްޓްތަކަށް ފަހު، ސާޖަރީއެއް ހަދަން ނުޖެހޭނެކަން ކަށަވަރުވެފައިވާ ކަމަށް ބުނެފައެވެ.

ބްރެޒިލްގެ ސައޮ ޕައުލޯ އަށް އުފަން، އުމުރުން 20 އަހަރުގެ ޒުވާން ފޯވާޑް ސިޓީއާ ގުޅިފައި ވަނީ 2017 ވަނަ އަހަރުގެ ޖެނުއަރީ މަހުއެވެ. ސިޓީ އާއެކު އޭނާ ހެދި ކޮންޓްރެކްޓްގެ މުއްދަތު ހަމަވާނީ 2021 ވަނަ އަހަރުގެ ހޫނު މޫސުމަށެވެ.

ސިޓީއާ ގުޅުނު ފަހުން ޖީސަސް އެކްލަބަށް ކުޅުނު 28 މެޗުގައި 15 ލަނޑު ޖަހައިދީފައިވެއެވެ.