އެމެރިކާގެ މަޝްހޫރު ދެ ލަވަކިޔުންތެރިން ކަމަށްވާ ސެލީނާ ގޯމޭޒާއި ޖަސްޓިން ބީބާ ރައްޓެހިވެގެން އުޅުމަށްފަހު ރުޅިވިފަހުން މިހާރު އަހަރެއްހާ ދުވަސް ވެދާނެއެވެ.
އެދެމީހުން ވަނީ ގާތްގަނޑަކަށް 4 އަހަރު ވަންދެން އެކީގައި ރައްޓެހިވެގެން އުޅެފައެވެ. ރުޅިވުމަށްފަހު ދެމީހުން އެކީގައި ފެނިފައިވަނީ ދެތިން ފަހަރަކުއެވެ. މި ދެތަރިންވެސް އެދެމީހުން އެކަކު އަނެކަކު މަތިން ހަނދާންވާކަމަށް ދޭތެރެ ދޭތެރެއިން މިޑިއާ ތަކުގައި ބުނެއެވެ.
އާދީއްތަ ދުވަހު އެ ދެ ފަންނާނުން އެކީގައި ހެނދުނު "ބްރެކްފާސްޓަށް" ގޮސް ތިއްބާ ނަގާފައިވާ ފޮޓޯއެއް މިހާރު ވަނީ ވައިރަލް ވެފައެވެ.
މީޑިއާތަކުގެ ފަލަ ސުރުޚީ ތަކަށް އައި މި ފޮޓޯގައި ފެންނަނީ ސެލީނާއާއި ޖަސްޓިން ބީބާ އެކީގައި މޭޒެއް ކައިރީގައި ވާހަކަ ދައްކަން ތިއްބައެވެ. ޖަސްޓިން ބީބާ ހަށިގަނޑު އެއްކޮށް ކަވަރ ވާ ކަހަލަ ޓީޝާޓެއް ލައިގެން އިން އިރު ސެލީނާ އިނީ އާދައިގެ ހެދުމެއް ލައިގެންނެވެ. ޚަބަރުތައް ބުނާ ގޮތުގައި ސެލީނާގެ ގޭގައި ޖަސްޓިން ބީބާ ވަނީ އާދީއްތަދުވަހުގެ ރޭ ވަރަށް ދަންވަންދެން ވެސް އުޅެފައެވެ.
ސެލީނާ ވަނީ މިދިޔަ ސެޕްޓެމްބަރުމަހުގެ ތެރޭގައި ކިޑްނީ ޓްރާންސްޕްލާންޓް ކޮށްފައެވެ. އޭނާއަށް ކިޑްނީ ހަދިޔާ ކޮށްފައިވަނީ އެކްޓަރ ޒެއިރާއެވެ. އަނެއްކޮޅުން ޖަސްޓިން ބީބާ ވަނީ އޭނާ މިއަހަރުގެ ވޯލްޑް ޓުއާ ކެންސަލް ކޮށްފައެވެ. ބީބާ ބުނާ ގޮތުން އޭނާ ޓުއާ ކެންސަލް ކުރީ އަމިއްލައަށް ހަމަޖެހިލުމަށެވެ.
ބީބާ އާއި ސެލީނާ އާއި އެކުގައި "ބްރެކްފާސްޓް" އަށް ދިޔަ ފޮޓޯ ލީކުވުމާއި ގުޅިގެން ދެމީހުން ކުރެ އެކަކުވެސް އެއްވެސް ކޮމެންޓެއް ކޮށްފައެއް ނުވެއެވެ. އެހެން ނަމަވެސް އެދެމީހުން މީގެ ކުރިން ވަނީ ކުރީގައި އޮތް ގުޅުން މިހާރު ރަނގަޅުވަމުން އަންނަ ކަމަށް ބުނެފައެވެ.
