ސްރީ ލަންކާ އަށް ކުރި ވިއްސާރައިގައި މަރުވި މީހުން ގެ އަދަދު 159 އަށް އަރާފައިވާ ކަމަށް، އެ ޤައުމުގެ ޑިޒާސްޓާ މެނޭޖްމަންޓް ސެންޓަރުން ހާމަ ކޮށްފި އެވެ.
އެ އިދާރާ އިން ހާމަ ކޮށްފައިވާ ގޮތުގައި އެ ހާދިސާ ގެ ސަބަބުން މަރުވި މީހުން ގެ އަދަދު އިތުރުވެފައިވާއިރު، އެ އަދަދު އަދިވެސް އިތުރުވުމަކީ އެކަށީގެންވާ ކަމެކެވެ. މީގެ އިތުރުން ގެއްލިފައިވާ މީހުންގެ އަދަދު 200 އިން މައްޗަށް އަރާފައިވާ ކަމަށް ވެސް ހާމަ ކޮށްފައިވެ އެވެ.
މިއީ އަހަރު ތަކެއް ފަހުން ސްރީ ލަންކާ އަށް ދިމާވި ޤުދުރަތީ އެންމެ ބޮޑު ކާރިސާ ކަމަށް ބެލެވޭއިރު، މި ހާދިސާގައި 20،000 އަށް ވުރެ ގިނަ ގެދޮރު ބިމާ ހަމަވެފައިވާ ކަމަށް ވެސް ޑިޒާސްޓާ ސެންޓަރުން ހާމަ ކޮށްފައިވެ އެވެ. އަދި ހާދިސާގެ ސަބަބުން ސަރުކާރުން ހިންގާ ވަގުތީ ހިޔާހަވި ކަމަށް ބަދަލުވެފައިވާ މީހުންގެ އަދަދު މިހާރު، 108،000 އަށް އަރާފައިވާ ކަމަށް ވެސް ހާމަ ކޮށްފައިވެ އެވެ.
ސްރީ ލަންކާގެ އޮފިޝަލުން ބުނެފައި ވަނީ އެ ވިއްސާރައިގެ ސަބަބުން އެ ޤައުމުގެ ސަރުކާރުން ކުއްލި ނުރައްކަތުގެ ޙާލަތު އިއުލާން ކުރިއިރު، ޤައުމުގެ ތިން ބައި ކުޅަ އެއް ބައި ހިސާބަށް ކަރަންޓާއި ސާފު ފެން ލިބުން ހުއްޓިފައިވާ ކަމަށެވެ. ކެލާނީ ކޯރުގެ ފެންގަނޑު އުފުލެމުން އަންނާތީ، އެ ހިސާބުގެ ސަރަހައްދު ތަކުން މީހުން ހުސް ކުރުމުގެ އަމުރެއް ވެސް ވަނީ ނެރެފަ އެވެ.
މި ހާދިސާގައި އެންމެ ގިނައިން މީހުން މަރުވެފައި ވަނީ ކެންޑީ އާއި ބަދުއްލާ ސަރަހައްދުން ކަމަށް ބުނެފައިވެ އެވެ. މި ސަރަހައްދު ތަކުގެ ގިނަ ހިސާބަށް ދަތުރު ކުރުމުގެ މަގު ވެސް ވަނީ ބަންދުވެފަ އެވެ. ބަދުއްލާގެ މަސްޕަންނާ ގޭގައި ދިރިއުޅޭ މީހަކު ބުނެފައި ވަނީ، އެކި މީހުން ހިމާޔަތް ހޯދުމަށް އެކި ގޮތް ގޮތް ހޯދަމުން އަންނަ ކަމަށެވެ.
އޭނާ ބުނީ އެ ސަރަހައްދުން ބޭރަށް ދެވޭނެ އެއްވެސް ގޮތެއް ނެތް ކަމަށާއި، އަދި އިތުރު ބަޔަކަށް އެ ސަރަހައްދަށް އައުމުގެ ފުރުސަތެއް ވެސް ނެތް ކަމަށެވެ. ސަބަބަކީ އެ ސަރަހައްދުގެ މަގުތައް ބްލޮކުވެފައިވުން ކަމަށާއި، ސަރަހައްދުގައި ހާސްކަން ފެތުރިފައިވާ ކަމަށެވެ. އެގޮތުން އެ ސަރަހައްދުގައި ކާނާ ނެތްއިރު، ސާފު ފެން ހުސްވަމުން އަންނަ ކަމަށް އޭނާ ބުންޏެވެ.
ސްރީ ލަންކާ އަށް ކުރިމަތިވެފައިވާ ޙާލަތުގެ ސަބަބުން އެ ޤައުމުގެ ސަރުކާރުން ވަނީ ބައިނަލްއަޤުވާމީ އެހީތެރި ކަމަށް ވެސް އެދިފަ އެވެ. އިންޑިއާ އާއި ސަރަހައްދުގެ ޤައުމު ތަކުން އަންނަނީ ލަންކާ އަށް އެހީތެރިކަން ފޯރުކޮށްދެމުންނެވެ.