މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ކުލަބު ވެލެންސިއާއާ ދެކޮޅަށް ކުޅުނު މެޗުން، ފަހަތުން އަރައި ބުރު ސްޕޯޓްސް ކުލަބު މޮޅުވެއްޖެ އެވެ.

ހޮނިހިރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ބުރުން ކާމިޔާބު ކުރީ 4-1 އިންނެވެ. މެޗުގައި ވެލެންސިއާ އިން ލަނޑު ޖަހައި ލީޑު ނަގާފައި ވަނިކޮށް، ބުރުން ވަނީ ފަހަތުން އަރައި ހަތަރު ލަނޑު ޖަހައިގެން މެޗުން މޮޅުވެފަ އެވެ.

މެޗު ފަށައިގެން ނުވަ ވަނަ މިނެޓުގައި ވެެލެންސިއާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އަޙުމަދު އަތުވާން އަލީ އެވެ. ނަމަވެސް، މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް ބުރުން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ މުޙައްމަދު ނާއިމް އެވެ.

މެޗުގެ ދެ ވަނަ ހާފުގައި ބުރުން ވަނީ ދެ ވަނަ ލަނޑެއް ޖަހައި ލީޑު ނަގައިފަ އެވެ. އެގޮތުން މެޗުގެ 66 ވަނަ މިނެޓުގައި އެ ލަނޑު ބުރަށް ޖަހައިދިނީ ވެސް ނާއިމް އެވެ. އޭގެ ތިން މިނެޓު ފަހުން އަލީ ހަމްދާން ވަނީ ބުރުގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. މެޗުގައި ބުރުގެ ފަހު ލަނޑު 77 ވަނަ މިނެޓުގައި ޖަހައި ނާއިމް ވަނީ އޭނާގެ ހެޓްރިކް ހަމަ ކޮށްފަ އެވެ.

މޮޅާއެކު ބުރުން ލީގު ތާވަލްގެ ހަތަރު ވަނައިގައި އޮތީ މިހާތަނަށް އެ ޓީމު ކުޅެފައިވާ ނުވަ މެޗުން 14 ޕޮއިންޓާ އެކު އެވެ. ލީގުގެ ފުރަތަމަ ބުރުގެ ކުޅުން ނިންމާލިއިރު، ބުރަށް މި ވަނީ ހަތަރު ވަނަ އިން ޖާގަ ލިބިފަ އެވެ. ބުރުގެ ފަހަތުން ފަސް ވަނައިގައި އޮތް ކުލަބު އީގަލްސް އަށް ލިބެނީ ނުވަ މެޗުން 13 ޕޮއިންޓެވެ.