ސަރަހައްދުގެ ބައެއް ޤައުމުތަކާއި އަޅާ ބަލާ ނަމަ ނިސްބަތުން ކުޑަކުދިން އޮންލައިންކޮށް އެކްސްޕްލޮއިޓްކުރުމުގެ މައްސަލަތައް ރާއްޖޭގައި ގިނަ ކަމަށާއި، ކޮންމެ 10،000 މީހުންގެ ތެރެއިން 94 މީހަކީ މިފަދަ މައްސަލަތަކުގައި ހިމެނޭ މީހެއް ކަމަށް ކުރީގެ ކޮމިޝަނާ އޮފް ޕޮލިސް މުޙައްމަދު ހަމީދު ވިދާޅުވެއްޖެ އެވެ.

އޭނާ އެފަދައިން ވިދާޅުވީ އަންހެނުންނަށް ކުރާ އަނިޔާ އާއި ދެކޮޅަށް މަސައްކަތް ކުރުމަށް ފާހަގަކުރާ "16 ޑޭޒް އޮފް އެކްޓިވިޒަމް" އާއި ގުޅިގެން އެމްޑީޕީ އަންހެނުންގެ ރޫހުން ބޭއްވި ޕެނަލް ޑިސްކަޝަންގަ އެވެ. ޑިޖިޓަލް ބޭސްކޮށް އަންހެންނާއި މެދު ހިނގާ ނޭދެވޭ އަމަލުތަކާއި މެދު ހޭލުންތެރިކުރުމަށް މި އަހަރުގެ ޝިއާރުގެ ދަށުން ބޭއްވި ޕެނަލް ޑިސްކަޝަން އެކެވެ.

އޭނާ ވިދާޅުވީ ރާއްޖޭގައި 85% ވަރަކަށް މީހުން އިންޓަރނެޓް ބޭނުން ކުރާ ކަމަށެވެ. އެކަމުގެ ސަބަބުން އޮންލައިންކޮށް އެކްޕްލޮއިޓްކުރުމަށް އޮންނަ ފުރުސަތު އިތުރުވާ ކަމަށް އޭނާ ވަނީ ދިރާސާގެ އަލީގައި ފާހަގަކުރައްވާފަ އެވެ. ފައުންޑޭޝަން ފޯ ހިއުމަން ޑިގްނިޓީ އިން ޔުނިވަރސިޓީ އޮފް އެޑިމްބަރގްގައި ޤާއިމްކޮށްފައިވާ ޗައިލްޑް ލައިޓް ކިޔާ ޕްރޮގްރާމަކުން ކޮށްފައިވާ ދިރާސާގެ މި އަހަރުގެ ނަތީޖާ އަށް އޭނާ ވަނީ ބައްލަވާލައްވާފަ އެވެ.

"މިފަދަ މައްސަލަތަކުގައި ކޮންމެ 10،000 މީހުންގެ ތެރެއިން 94 މީހުން ރާއްޖޭގައި އެބަ ހިމެނޭ. މިއީ ނިސްބަތުން އިންޑިއާ އާއި ބަންގްލަދޭޝަށް ވުރެ ވެސް މަތި އަދަދެއް. ކުޑަކުދިންގެ ބަރަހަނާ މަންޒަރު ބަލާ މީހުން އެންމެ ގިނައިން ބަލަނީ އުމުރުން 14 އަހަރާއި 17 އަހަރާއި ދެމެދުގެ ކުދިންގެ ވީޑިއޯތައް. މިއީ ތަފާސް ހިސާބުން އެނގޭ ބައިނަލްއަޤުވާމީ އިދާރާތަކުން ހިއްސާކޮށްފައި ހުރި ކަންބޮޑުވުންތައް." އޭނާ ވިދާޅުވި އެވެ.

މީގެ އިތުރުން، ކުޑަކުދިން ގްރޫމް ކުރުމަކީ ވަރަށް އާއްމު ކަމެއް ކަމަށް ކުރީގެ ސީޕީ ވަނީ ވިދާޅުވެފަ އެވެ. ގްރޫމްކޮށްގެން ބޮޑެތި މީހުން ކުޑަ ކުދިންގެ އިތުބާރު ހޯދާ، ކުދިންނަށް ހުޝާމަތުކުރުން ފަދަ ކަންކަން ކުރާ ކަމަށް އޭނާ ވިދާޅުވި އެވެ. އޮންލައިންކޮށް ކުޑަކުދިންނަށް ދިމާވާ ނޭދެވޭ ކަންކަން ދިމާވަނީ އެފަދަ އޮންލައިން ޕްލެޓްފޯމްތަކުގައި އެކަމަށް މަގުފަހިވެފައި އޮތުމުން ކަމަށް އޭނާ ވަނީ ވިދާޅުވެފަ އެވެ.

"ފުރަތަމަ ހޯދަނީ އިތުބާރު، ކުއްޖާ ސެކްޝުއަލީ އެކްސްޕްލޮއިޓްކުރަނީ ފަހުގެ މަރުހަލާ އެއްގައި. އެކަންކަން ބަލަން ޖެހޭ. ބެލެނިވެރިން ކޮންމެހެން ނުޖެހޭ އެހާ ބޮޑަށް ޓެކްނޮލޮޖީ އާއި އަހުލުވެރިވާކަށް. ބެލެނިވެރިންނަށް އެކަންކަން ބަލާ ލެވޭނެ. ކުޑަކުދިން އެކްސްޕްލޮއިޓް ކުރަނީ ކުޑަކުދިން އުޅޭ މާހައުލުގައި. އޮންލައިން ޕްލެޓްފޯމްތަކުގައި އެކްސްޕްލޮއިޓްކުރުމުގެ ނުރައްކާ ބޮޑު" ކުރީގެ ސީޕީ ވިދާޅުވި އެވެ.

ކުޑަ އަންހެން ކުދިން ނުރައްކަލަށް ހުށަޅުމަށް ރާއްޖޭގައި ފުރުސަތު ބޮޑުކަމަށް އޭނާ ވަނީ ވިދާޅުވެފަ އެވެ. ރާއްޖޭގެ އިންޓަރނެޓް ބޭނުންކުރާ ފަރާތްތަކުން ވެސް އަދި އެހެނިހެން ފަރާތްތަކުން ވެސް އެއްވެސް ޕްލެޓްފޯމެއްގައި ކުޑަ ކުދިންނާއި ގުޅުން ހުރި ޗައިލްޑް ޕޯނޯގްރަފީ އާއި ގުޅުން ހުރި އެއްޗެއް ބަލައިފި ނަމަ އެކަން އެނގޭނެ މަގު އޮންނަ ކަމަށް ސީޕީ ހަމީދު ވަނީ ވިދާޅުވެފަ އެވެ. އެއީ ސްނެޕްޗެޓް، ފޭސްބުކް ފަދަ ޕްލެޓްފޯމްތައް ވިޔަސް އެކަން ބެލޭނެ ކަމަށާއި އެކަންކަން ރިޕޯޓްކުރުމަކީ ބައިނަލްއަޤްވާމީ ގޮތުން ލާޒިމް ކަމެއް ކަމަށް އޭނާ ވަނީ ވިދާޅުވެފަ އެވެ.

"2019 ވަނަ އަހަރު ވެސް ރާއްޖޭގައި އެކަން ހިނގާ މިންވަރާއި މެދު ވެސް ރިޕޯޓް ކުރި. މިކަންކަމަށް ބަލާ އިރު ވަރަށް ކަންބޮޑުވާން ޖެހޭ. ކުޑަ ކުއްޖަކު އެކަނި ބޭރަށް ދިއައީމަ ކަންބޮޑުވާ ފަދައިން އެބަ ޖެހޭ ކަންބޮޑުވާން ކުއްޖާ އޮންލައިންކޮށް ކުރާ ކަންކަމާއި މެދުގައި ވެސް." އޭނާ ވިދާޅުވި އެވެ.

އޮންލައިންކޮށް ދަރިފުޅު ކުރާ ކަންކަން ބެލޭ މިންވަރަށް ދަރިފުޅާއި ގުޅުން ބޭއްވުން މުހިންމުކަމަށް ސީޕީ ވަނީ ފާހަގަކުރައްވާފަ އެވެ. އެ ޕެނަލް ޑިސްކަޝަންގައި ރާއްޖޭގެ މިހާރުގެ ހާލަތާއި މެދު ގިނަ ކަންބޮޑުވުންތަކެއް ހުރިކަން އޭނާ ވަނީ ފާހަގަކުރައްވާފަ އެވެ.