ކުރީގެ ރައީސް މުހައްމަދު ނަޝީދަށް މަރުގެ އިންޒާރު ދީގެން 2021 ވަނަ އަހަރު ހައްޔަރުކުރި އިސްމާއީލް ޔާފިސް 10 އަހަރަށް ޖަލަށްލުމަށް، ކްރިމިނަލް ކޯޓުން ބުދަ ދުވަހު ހުކުމް ކޮށްފި އެވެ.

މި ހުކުމް އިއްވީ 2021 ވަނަ އަހަރު ޔާފިސް ސޯޝަލް މީޑިއާ ބޭނުންކޮށްގެން ރައީސް ނަޝީދަށް އިންޒާރުދީ، އަދި އޭގެ ފަހުން ފުލުހުންގެ ތަހުގީގާއި ޝަރީއަތުގައިވެސް ރައީސް ނަޝީދަށް ހަމަލާތަކެއް ދޭނެ ކަމަށް ބުނެފައިވާ މައްސަލައެއްގަ އެވެ.

އޭރު ރާއްޖެއިން ބޭރުގައި ހުންނެވި، ރައްޔިތުންގެ މަޖިލީހުގެ އޭރުގެ ރައީސް ނަޝީދު ރާއްޖެ ވަޑައިގެންފި ނަމަ "ބަދުރު ހަނގުރާމައިގެ ދުވަހު އަބޫޖަހުލަށް ހެދި ގޮތް ހަދާލާނެ" ކަމަށް ބުނެ ފޭސްބުކްގައި ދިން އިންޒާރަކާ ގުޅިގެން ޔާފިސް ހައްޔަރުކުރީ ރ. މީދޫންނެވެ.

މައްސަލަ އިތުރަށް ސީރިއަސްވީ ޔާފިސް ބަންދުގެ މުއްދަތު އިތުރު ކުރުމަށް ކޯޓަށް ހާޒިރު ކުރުމުން، އޭނާ ކޯޓުގައިވެސް ރައީސް ނަޝީދަށް އިންޒާރުދީފައި ވުމުންނެވެ. އެ މައްސަލައިގައި ކޯޓުގެ ހުރުމަތް ކެނޑިކަމަށް ނިންމައި، ޔާފިސް އެއް މަސް ދުވަހަށް ޖަލަށްވެސް ލިއެވެ.

ޔާފިސްގެ މައްޗަށް ދައުލަތުން ތިން ދައުވާ އުފުލާފައިވެ އެވެ. އެއީ ޓެރަރިސްޓު ޖަމާއަތަކަށް ތާއީދު ކުރުމުގެ ދައުވާ އާއި، ޓެރަރިޒަމްގެ ހަމަލާއެއް ހިންގާނެކަމުގެ އިންޒާރު ދިނުމުގެ ދައުވާ އާއި، ޓެރަރިޒަމްގެ އަމަލެއް ކުރުމަށް ހިތްވަރުދިނުމުގެ ދައުވާ އެވެ. މި ތިން ދައުވާގެ ދަށުން އޭނާ އަށް ވަނީ ދެ އަހަރާއި، ތިން އަހަރާއި، ފަސް އަހަރުގެ ހުކުމެއް ކަނޑައަޅައި، ޖުމްލަ 10 އަހަރުގެ ޖަލު ހުކުމެއް އައިސްފަ އެވެ.

ޔާފިސް ރައީސް ނަޝީދަށް އަމާޒުކޮށް މީސްމީޑިއާ ގައި އިންޒާރުދިނީ 2021 ވަނަ އަހަރުގެ އޯގަސްޓު 23 ވަނަ ދުވަހުއެވެ. މި އިންޒާރު ދިނީ ރައީސް ނަޝީދަށް އަމާޒުކޮށް ބޮމުގެ ހަމަލާ އެއްވެސް ދީފައި ވަނިކޮށެވެ.

2021 ވަނަ އަހަރުގެ މޭ މަހުގެ ހަ ވަނަ ދުވަހުގައި މާލޭ މަޖީދީ މަގު ރައީސް ނަޝީދުގެ ގެކޮޅު ކައިރިން އެއްޗެއް ގޮއްވާލައިގެން އެމަނިކުފާނު އަވަހާރަކޮށްލުމަށް ބޮމުގެ ހަމަލާއެއް ދީފައިވެ އެވެ. ހަނި ގޮތަކަށް ހަމަލާއިން ސަލާމަތްވެވަޑައިގެންނެވި ނަމަވެސް ބޮޑެތި ޒަހަމްތަކެއް އެ ހަމަލާގެ ސަބަބުން ރައީސް ނަޝީދަށް ލިބިވަޑައިގަތެވެ. އެ ހަމަލާގައި ލިބިވަޑައިގެންނެވި ޒަހަމްތަކަށް އެމަނިކުފާނު ޖަރުމަނަށް ވަޑައިގެން ގިނަ ދުވަސްތަކެއް ހޭދަކުރައްވާ ފަރުވާ ހޯއްދެވި އެވެ.