ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ)އިން އަންނަ 2018 ވަނަ އަހަރު ފެށުމަށް ހަމަޖެހިފައިވާ ކޯސްތަކަށް ވަނުމުގެ ފުރުސަތު ހުޅުވާލައިފި އެވެ.

އެމްއެންޔޫއިން އިއުލާން ކޮށްފައިވާ  ގޮތުގައި  2018 ވަނަ އަހަރުގެ ޖަނަވަރީ ގައި މި ޔުނިވަރސިޓީން ފެށުމަށް ހަމަޖެހިފައިވާ ކޯސްތަކަށް ވަނުމަށް އެދި ފޯމު ހުށަހެޅުމުގެ ފުރުސަތު 24 ސެޕްޓެންބަރު 2017 ވާ އާދީއްތަ ދުވަހުން ފެށިގެން 28 ޑިސެންބަރު 2017 ވާ ބުރާސްފަތި ދުވަހުގެ ނިޔަލަށް އޮންނާނެއެވެ.

އެމްއެންޔޫ އިން ބުނީ އެ ކޯސްތަކާ ބެހޭ މައުލޫމާތާއި ކޯހަށް އެދޭ ފޯމު ޔުނިވަރސިޓީގެ ދަރިވަރުންގެ ޚިދްމަތްތަކާބެހޭ ބައިންނާއި ޔުނިވަރސިޓީގެ ވެބްސައިޓް  www.mnu.edu.mvއިން ލިބެން ހުންނާނެ ކަމަށެވެ. އިތުރު މަޢުލޫމާތު 3345155 ފޯނާ ގުޅުއްވުމުން ލިބިވަޑައިގަންނަވާނެ ކަމަށް ވެސް އެމްއެންޔޫއިން ބުނެއެވެ.

އެމްއެންޔޫއިން ތަފާތު އެކި ދާއިރާތަކުން ފައުންޑޭޝަން ކޯސްތަކުން ފެށިގެން މާސްޓާސް ޑިގްރީއާ ހަމައަށް ކިޔަވާދެމުން ދެއެވެ.

އެމްއެންޔޫއިން މާލެ ފިޔަވާ، ލ. ގަން، ސ. ހިތަދޫ، ކުޅުދުއްފުށި އަދި ގދ. ތިނަދޫގައި އެ ޔުނިވާރސިޓީގެ ކެމްޕަސްތައް ހިންގަމުން ދެއެވެ.