އިނގިރޭސި ލީގު ކަޕް ނުވަތަ ކަރަބާއޯ ކަޕުގެ ދެވަނަ ބުރުގައި ހަތަރުވަނަ ޑިވިޝަނުގެ ގްރިމްސްބީ އަތުން މެންޗެސްޓަރ ޔުނައިޓެޑް ބަލިވެއްޖެއެވެ. މެޗުން ޔުނައިޓެޑް ބަލިވީ ޕެނަލްޓީ ޖަހައިގެން 12-11 ގެ ނަތީޖާއަކުންނެވެ. މި ބައްޔާއެކު މެންޗެސްޓަރ ޔުނައިޓެޑް ވަނީ މުބާރާތުން ކަޓާފައެވެ. އަދި މިއީ ޔުނައިޓެޑްގެ ތާރީޚުގައި ވެސް ހަތަރުވަނަ ޑިވިޝަނުގެ ކުލަބަކާ ކުރިމަތިލައި ބަލިވި ފުރަތަމަ ފަހަރެވެ.

ގްރިމްސްބީގެ ދަނޑުގައި ކުޅުނު މެޗުގައި ޔުނައިޓެޑްގެ ކޯޗު ރުބެން އަމޮރިމް ވަނީ ފުރަތަމަ އެގާރައަށް ގިނަ ބަދަލުތަކެއް ގެނެސްފައެވެ. މީގެ ތެރޭގައި ކީޕަރު އެންޑްރޭ އޮނާނާ ހިމެނުނު އިރު، ބްރޫނޯ ފެނާންޑޭޒް، ކަސެމީރޯ އަދި އެމްބުއެމޯ ފަދަ މުހިންމު ކުޅުންތެރިން ތިބީ ބެންޗުގައެވެ.

މެޗުގެ ފުރަތަމަ ހާފުގައި ގްރިމްސްބީން ވަނީ ދެ ލަނޑު ކާމިޔާބުކޮށްފައެވެ. 22 ވަނަ މިނެޓުގައި ޗާލްސް ވާރނަމް ޖެހި ލަނޑާއި، 30 ވަނަ މިނެޓުގައި ޓައިރެލް ވޮރެން ޖެހި ލަނޑުން ގްރިމްސްބީ ވަނީ 2-0 ގެ ލީޑެއް ނަގާފައެވެ. ގްރިމްސްބީ ގެ ދެވަނަ ލަނޑަކީ ޔުނައިޓެޑްގެ ކީޕަރު އޮނާނާ ހެދި ގޯހެއްގެ ފައިދާ ނަގާ ޖެހި ގޯލެކެެވެ.

ދެވަނަ ހާފުގައި އަމޮރިމް ގެނައި ބަދަލުތަކާއެކު ޔުނައިޓެޑްގެ ކުޅުން ރަނގަޅުވިއެވެ. 75 ވަނަ މިނެޓުގައި ބްރަޔަން އެމްބުއޭމޯ ޖެހި ލަނޑުން ޔުނައިޓެޑްގެ އުންމީދު އާވިއެވެ. އަދި މެޗުގެ ފުރިހަމަ ވަގުތު ހަމަވާން މިނެޓެއް އޮއްވާ ހެރީ މެގުއާ ޖެހި ލަނޑުން މެޗު އެއްވަރުކުރިއެވެ.

މެޗުގެ ނަތީޖާ ނެރުމަށް ޖެހުނު ޕެނަލްޓީ ޝޫޓްއައުޓުގައި ދެ ޓީމުގެ ފުރަތަމަ ފަސް ޕެނަލްޓީ އެއްވަރުވުމާއެކު، އިތުރު ޕެނަލްޓީތަކެއް ޖެހިއެވެ. ޔުނައިޓެޑުގެ އެމްބުއޭމޯ ޖެހި ދެވަނަ ޕެނަލްޓީ ނާކާމިޔާބުވުމާއެކު، 12-11 އިން ގްރިމްސްބީ މޮޅުވިއެވެ.

1948 ވަނަ އަހަރަށްފަހު މި ދެ ޓީމު ބައްދަލުކުރި ފުރަތަމަ ފަހަރު ހޯދި މި ކާމިޔާބީއަކީ ގްރިމްސްބީގެ ތާރީޚުގައި ހޯދުނު އެންމެ ބޮޑު އެއް ކާމިޔާބީ ކަމުގައި އެ ކުލަބުން ވަނީ ފާހަގަކޮށްފައެވެ. މި ބަލިވުމާއެކު ޔުނައިޓެޑްގެ ކަރަބާއޯ ކަޕުގެ ދަތުރު މިހިސާބުން ނިމުމަކަށް އައިސްފައިވެއެވެ.