ރައީސުލްޖުމްހޫރިއްޔާ ޑރ. މުހައްމަދު މުއިއްޒު އުޅުއްވަނީ މިގައުމަށް ކިހިނެއް ހައްދަވަންތޯ އެވެ. މިގައުމާއި ދޭތެރޭގައި ރައީސް އަމަލު ކުރައްވަން ތިޔަ އުޅުއްވަނީ ކިހިނެއްތޯ އެވެ. މިއީވެސް ހަމަ ދިގު ތާރީހެއް އޮތް، ހަމަ ރަނގަޅު ގައުމެއް ނޫންތޯ އެވެ. ރަނގަޅު ނިޒާމުތަކެއް ހުރި ކޮންމެވެސް ސިސްޓަމަކަށް ހިނގަމުން އައި ތަހުޒީބް ބަޔަކު ދިރިއުޅެމުންދާ ހަމަ ރަނގަޅު ގައުމެއް ނޫންތޯ އެވެ.

ރައީސް މުއިއްޒުއަށް ރައްޔިތުން ހަވާލުކުރީ ފަސް އަހަރުގެ މުއްދަތަކަށް ގައުމު ހިންގަން ނޫންތޯ އެވެ. ގައުމުގެ ރައީސްގެ ގޮތުގައި، ހުންނަވައިގެން ގައުމު ތަރައްޤީ ކުރަން ނޫންތޯ އެވެ. މުޅިން އައު ގައުމެއް އުފައްދާކަށް މުޅިން އައު ގައުމެއް ބިނާކުރާކަށް ރައީސް މުއިއްޒުއަކަށް ދިވެހިން މެންޑޭޓެއް ހަވާލެއް ނުކުރެއް ނޫންތޯ އެވެ. ވީއިރު އަމިއްލަފުޅު ވިޔަފާރިތަކާއި، ގޯތި ގެދޮރަށް އަމަލު ކުރައްވާހެން މިގައުމާއި މެދު އަމަލު ތިޔަ ކުރައްވަނީ ދިވެހިންނަށް ކޮން ކުށެއް ކުރެވިގެންތޯ އެވެ.

މިހާރު ދިވެހި ރައްޔިތުންނަށް ވާނުވާ އޮޅިއްޖެ އެވެ. މަނިކުފާނު ވެރިކަމަށް ވަޑައިގެން މުޅި ގައުމުގައި ފަސްބާޑި ޖެއްސެވުމުން މުޅި ނިޒާމުތައް ހަރާބުވެ، ގައުމުގެ ސޯބުތައް ނެއްޓި، ގައުމީ ނަވުގެ ހުންގާނު ބިނދި، ފެންމަތީގައި އޮޔާދާ ބޮނބިގަނޑެއްހެން މިގައުމު އޮޔާދާން ފަށާއިފި އެވެ.

ކުންފުންޏަކުން ކުރާ ކަމެއް ކުރަން ޖެހޭ ކަމެއް، އެކުންފުނީގެ ވެރިންނަށް ނޭނގޭތާ، އެނގޭ ރައްޔިތަކުވެސް މިއަދަކު ނެތެއެވެ. ވުޒާރާއެއްގެ މެންޑޭޓެއް އޮފީހެއްގެ ޒިންމާއެއް މުއައްސަސާއެއްގެ މަސްއޫލިއްޔަތެއް އޮޅުން ފިލާ މީހަކު މިއުޑުދަށަކު މިއަދު އުޅޭ ކަމަކަށް ނުވެ އެވެ.

މީގެ ކުރިން ހީކުރަނީ މޯލްޑިވްސް އެއަޕޯޓްސް ކޮމްޕެނީ ލިމިޑެޓްއަކީ އެއަރޕޯޓްތަކާއި ގުޅުންހުރި ކަންކަން ކުރާ ކުންފުންޏެއް ކަމަށެއެވެ. އެކަމަކު މިހާރު އެމީހުން އެހަވާލުވީ ރަށްރަށުގައި އައުޓްޑޯ ޖިމް ހިންގާށެ އެވެ. މީކުރިން ހީކުރަނީ ހައްޖު ކޯޕަރޭޝަންއަކީ ރައްޔިތުން ހައްޖަށް ފޮނުވަން ހަދާފައި އޮންނަ ކުންފުންޏެއް ކަމަށެ އެވެ. އެކަމަކު އެމީހުންވެސް ދަމާ ރޮއްޖަކަށް ފޫގަޅައިގެން، އެނިކުތީ ގެސްޓްހައުސް ހިންގާށެ އެވެ. ފެނަކައިން ވީ ހޮސްޕިޓަލް އަޅާށެ އެވެ. އާރްޑީސީން ވީ ބޯޓް ބަންނާށެ އެވެ. އެމްޓީސީސީން ވަރި ކައިވެނީގެ ކަންތައްވެސް ބަލަހައްޓަންވީ އެވެ. މިއަދަކު ރައްޔިތަކަށް ހިދުމަތެއް ހޯދަން ދާންވީ ދިމާލެއް ސާފުވާގޮތެއް ނުވެ އެވެ. މިހާވަރުން ދަންޏާ ސްޓެލްކޯއިން އެކްސްރޭ މެޝިން ބަހައްޓައިގެން އެކްސްރޭވެސް ނަގަން ފަށަންވީ އެވެ. އެމްޑަބްލިއުއެސްސީން ސަރުކާރުގެ ސްކޫލުތައް ހިންގަން ފަށަންވީ އެވެ. އެޗްޑީސީއިން އިމާމުން ތަމްރީނު ކުރުމުގެ ކޯސްތައް ބާއްވާ އިސްލާމިކް މިނިސްޓްރީން ރަސްމާލެ ހިއްކަންވެސް ސޮއިކުރަންވީ އެވެ. މިދިޔަ އަހަރު ކުންފުނިތަކަށް ހަވާލުކޮށް ސޮއިކުރި މަޝްރޫއުތައް އެކުންފުނިތަކުން ނަންގަވާ މިއަހަރު އެހެން ކުންފުނިތަކެއް ލައްވާ ސޮއިކުރުވަނީ އެވެ. ކޮންޓްރެކްޓެއް ހަދައި ނުލެވި ކުރަންވީ ކަމެއް ގަނޑެއްގައި ލިޔެނުލެވި ހުސް ގަނޑުތަކުގައިވެސް ސޮއިކުރުވަނީ އެވެ. ނިންމާފައި ހުންނަ ފުޓްސަލް ދަނޑުތައް އަޅާނެ މީހުން ހޯދަން ކުންފުނިތައް ލައްވާ އިއުލާންވެސް ކުރުވަނީ އެވެ. ކުރާނެ ނުކުރާނެ ކަމެއް ނޭނގި އޭޓީއެމްތަކުގައި ރިބަން ދަމައިގެން ރިބަން ކަނޑަމުން ގޮސް، ނުނިމި ހުންނަ ނަރުދަމާގެ ނިޒާމްތައްވެސް ހުޅުއްވަވަނީ އެވެ.

ޤަބޫލުފުޅުކުރައްވާށެ އެވެ. ގިނަ ދިވެހި ރައްޔިތުން ބުނަނީ ތިޔަ އުޅުއްވަނީ ހައްދަވާނެ ނުހައްދަވާނެ އެއް ނޭނގިގެން ކަމަށެ އެވެ. އަމިއްލަ ކުންފުނިތަކަށް ދައްކަން ހުރި ފާއިސާ ނުދައްކަވާ އޭގެއިން ބޯދަމައިގަންނަވާނެ މަގެއް ހޯއްދަވަންވެގެން ކަމަށެ އެވެ. ދެއަހަރުވީއިރުވެސް ވައުދުތައް ނުފުއްދި، ސަރުކާރުގެ މަގްބޫލުކަން ކުޑަވެ، ވައްކަން އާންމުވެ، ހިޔާނާތް ބޮޑުވުމުން އެކި ކުންފުނިތައް ލައްވާ އެކި ކަންކަމުގައި ސޮއިކުރުވައިގެން ހަޑި ހާއްވަވަން ކަމަށެ އެވެ.

ޤަބޫލުފުޅުކުރައްވާށެ އެވެ. މީހުން ބުނަނީ މަނިކުފާނަށްވުރެ ބިސްއަޅަން އަރާ ވެލާވެސް ރަނގަޅު ކަމަށެ އެވެ. އެއީ އެސޮރުވެސް މުޅި ތަނުގައި ފަސްބާޑި ޖަހަނީ ބޭނުމެއް އޮވެގެންނެ އެވެ. އެއީ ބިސްވަޅު ފޮރުވުމެ އެވެ. އެ ނަގަން އަންނަ މީހުންނަށް ބިސްވަޅު ހުރި ތަން އޮޅުވާލުމެ އެވެ. އޭގެ ނަސްލު ރައްކާތެރިކުރުވުމެ އެވެ. ދަރިފަސްކޮޅު ދެމެހެއްޓުމެވެ. އެކަމަކު މަނިކުފާނު މުޅި ގައުމުގައި ފަސްބާޑި ތިޔަ ޖައްސަވަނީ އެއްވެސް މަގްސަދެއް ނެތި އަމާޒެއް ނެތި އެހެން މީހުން ލޮލުގައި އަނދުން އަޅުވައިގެން ސަރުކާރުގެ ނާގާބިކްލަން ފޮރުވުމަށެ އެވެ. މީހުން ބުނެ އެވެ. ނުފޯރާ ފޮތިން ފޫގެޅީމާ ފެންނާނީ އޮރިޔާމެ އެވެ. އެހެން ނަހައްދަވާށެ އެވެ. މިގައުމު ހަލާކުކޮށް ނުލައްވާށެ އެވެ. ނިޒާމްތައް ފުނޑު ފުނޑު ނުކުރައްވާށެ އެވެ. މިއީ މަނިކުފާނަށް ވާރުތައިން ލިބުނު އަމިއްލަފުޅު މުދާ ގަނޑެއް ނޫނެ އެވެ. މިއީ ދިވެހިންގެ ފަޚުރުވެރި ދިވެހި ގައުމެ އެވެ.