މުނިފޫހިފިލުވުމުގެ ދާއިރާގައި ދިވެހިންގެ މެދުގައި ބޮޑު މަޤްބޫލްކަމެއް ހޯދާފައިވާ އަލީ ސީޒަންގެ، ސީޒަން އަލީ ޕްރޮޑަކްޝަން އިން ދިވެހިންނާއި ހަމައަށް ގެނެސްދޭ "ޕަރީ" ފިލްމްގެ ލޯގޯ ލޯންޗްކޮށްފިއެވެ.

ފިލްމްގެ ޕްރޮޑަކްޝަންގެ ވާހަކަ އާއި ހިސާބުން ދިވެހިންގެ ޝައުގުވެރިކަން ދަމައިގަނެފައިވާ މި ފިލްމުގެ ލޯގޯ ލޯންޗްކުރީ އާދިއްތަ ދުވަހުއެވެ. މި ފިލްމް ވެގެންދާނީ ދިވެހި ސިނަމާގައި ފާހަގަކޮށްލެވޭ ފިލްމަކަށެވެ. އޭގެ ތެރެއިން އެއް ސަބަބަކީ މި ފިލްމަކީ ސީޒަންގެ ޕްރޮޑިއުސްކޮށް، ޑައިރެކްޓް ކުރާ ފިލްމެއް ދިވެހި ސިނަމާ އަށް ތިން އަަހަރަށް ފަހު ގެނެސްދޭ ފިލްމަށް ވުމެވެ.

ފިލްމުގެ ކާސްޓުންނަކީ ފިލްމް ޝައުގުވެރިކޮށްދޭ އަނެއް ސަބަބެވެ. ފިލްމްގެ ލީޑިން ކާސްޓުގައި ޝީލާ ނަޖީބް، ރިޝްމީ ރަމީޒް، ލަމްހާގެ އިތުރުން އަލީ ސީޒަން ފަދަ މޫނުތައް ފާހަގަކޮށްލެވެއެވެ. ފިލްމްގެ ކާސްޓުންގެ ގޮތުގައި ތިބީ ދިވެހިންގެ ލޯބި ހޯދާފައިވާ ކުޅަދާނަ ފަންނާނުންކަމަށް ވުމާއި އެކު މި ކާސްޓާއި އެކު ޕަރީ ފިލްމް ދިވެހިންނާއި ހަމައަށް އަންނާނެ އިރެއްގެ އިންތިޒާރުގައި މިހާރުވެސް ސިނަމާ އަށް ލޯބިކުރާ އެތައް ބަޔަކު ތިބިކަން ފާހަގަކޮށްލެވެއެވެ.