މި ސަރުކާރު ވެރިކަމަށް އައިފަހުން 2024 އަދި 2025 ކުއާޓަރު 1 ގައި ދައުލަތުގެ ދަރަނި 20 ބިލިއަން އިތުރުވެފައިވާ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

ހޯމަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އަމީރު ވިދާޅުވީ މި އަހަރު ނިމޭއިރު ރާއްޖޭގެ ދަރަނި 156.2 ބިލިއަން ރުފިޔާއަށް އަރާނެ ކަމަށާއި، 2025 ވަނަ އަހަރުގެ ފުރަތަމަ ކުއާޓަރު ނިމުނުއިރު ދައުލަތުގެ ދަރަނި 146.1 ބިލިއަން ރުފިޔާއަށް އަރާފައިވާ ކަމަށެވެ. 2025 ގެ ފުރަތަމަ 3 މަހުގައި ދައުލަތުގެ ދަރަނި 1.2 ބިލިއަން ރުފިޔާއަށް އިތުރުވި ކަމަށާއި، މިއަހަރުގެ ދަރަނީގެ ތެރެއަށް 12 ބިލިއަން ރުފިޔާ އިތުރުވާނެ ކަމަށް އޭނާ ވިދާޅުވިއެވެ.

އަމީރު ވިދާޅުވީ މިސަރުކާރު ވެރިކަމަށް އައިފަހުން 2024 އަދި 2025 ކުއާޓަރު 1 ހަމައަށް ދައުލަތުގެ ދަރަނި 20 ބިލިއަން އިތުރުވެފައިވާ ކަމަށާއި، މިއީ ކޮވިޑް-19ގައި ދަރަނި މައްޗަށް ދިޔަ މިންވަރަށް ވުރެ އިތުރު މިންވަރެއް ކަމަށެވެ.

ޑޮލަރު ރޭޓު މަތިވަމުންދާތީ އެކަމަށް އިޝާރާތް ކުރައްވައި އަމީރު ވިދާޅުވީ ޑޮލަރުގެ ރޭޓު އެވްރެޖްކޮށް ދުވަހަކު ވެސް މަތިނުވާ މިންވަރަށް މަތިވަމުންދާ ކަމަށެވެ.

އަމީރު ވިދާޅުވީ ބޭންކަށް މާރުކޮށްގެން ޑޮލަރުގެ ކަޅު ބާޒާރު ރޭޓް ދަށަށް ދާނެ ކަމަށް ރައީސް ޑރ.މުހައްމަދު މުއިއްޒު ވިދާޅުވެފައިވަނީ އެއްވެސް އިގްތިސާދީ ހަމައަށް ބިނާ ކުރުމެއް ނެތި ކަމަށާއި، މިސަރުކާރުގެ ސިޔާސަތުގެ ސަބަބުން ޑޮލަރުގެ ކަޅު ބާޒާރުގެ ރޭޓް ދަނީ މައްޗަށް ކަމަށެވެ.