އުތުރު ކޮރެއާއިން ޖަޕާނުގެ އުތުރުގެ ސަރަޙައްދުތަކަށް އަމާޒުކޮށް ފޮނުވާލި މިސައިލެއް ވައިގެ ތެރޭގައި ގޮވައި ކަނޑަށް ވެއްޓިއްޖެއެވެ.

އުތުރު ކޮރެއާގެ ގަޑިން ފަތިހު 5:57 ގައި ފޮނުވައިލި މި މިސައިލް ވެއްޓިފައިވަނީ ޖަޕާނުގެ އުތުރުގައިވާ ރަށެއް ކަމުގައިވާ ހޮކައިޑޯގެ އިރުމަތިން 1180 ކިލޯމީޓަރު ބޭރަށެވެ. މިސައިލް ވެއްޓިފައިވަނީ ވައިގެ ތެރޭގައި މިސައިލް ގޮވައި ތިން ބަޔަށް ބައިބައިވެގެން ކަމަށް ޖަޕާނާއި ދެކުނު ކޮރެއާގެ އަސްކަރިއްޔާއިން ބުނެއެވެ.

އުތުރު ކޮރެއާގެ ވެރިރަށް ޕިޔޮންގޔަންގ އާއި ދުރުނޫން ހިސާބެއްގައި އޮންނަ ސުނާން ކިޔާ ސަރަޙައްދަކުން އުދުއްސައިލި މި މިސައިލް ވެއްޓިފައިވަނީ އެ މިސައިލް ވައްޓައިލުމަށް ޖަޕާނުން ފިޔަވަޅެއް ނާޅަނީސް ކަމަށް ޖަޕާނުގެ އަސްކަރިއްޔާއިން ވަނީ ހާމަކޮށްފައެވެ. އަދި މި ހަމަލާ އާއި ގުޅިގެން ދޭނެ ރައްދެއްވެސް އެފަރާތުން ހާމަކޮށްފައެއް ނުވެއެވެ.

މި ހަމަލާ އާއި ގުޅިގެން އެއްވެސް ފަރާތަކަށް ގެއްލުމެއް ލިބިފައިވާ ކަމުގެ ނިޝާނެއް އަދި ފެނިފައެއް ނުވެއެވެ.

އުތުރު ކޮރެއާގެ މި ހަމަލާ އާއި ގުޅިގެން ޖަޕާނުގެ އުތުރުގައިވާ ސަރަޙައްދުތަކުގެ ސަލާމަތީ ކަންކަން ވަރުގަދަ ކޮށްފައިވާއިރު، އިތުރު ހަމަލާއެއް ކުރިމަތިވެދާނެ ކަމަށް ބަލައި ސަމާލުވެގެން ތިބުމަށް ޖަޕާނު ސަރުކާރުން ވަނީ އެ ޤައުމުގެ ރައްޔިތުންނަށް އަންގާފައެވެ.

މި ހަމަލާ އާއި ގުޅިގެން އުތުރު ކޮރެއާއިން ވަކި އެއްޗެއް ހާމަކޮށްފައެއް ނުވެއެވެ.