ސަރުކާރުން ހުއްދަ ދީފައިވާ މަދު ސަރަހައްދަކަށް މެނުވީ އެއްނުވެވޭނެ ކަމަށް އަންގައި ފުލުހުން އިންޒާރު ދީފައިވީ ނަމަވެސް މާލޭގެ ހުރިހާ ތަނަކަށް ވެސް އެއްވެވޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވެފައި މިވަނީ ހޮނިހިރު ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.

މާލޭގެ ކާނިވާ ސަރަހައްދާއި ރަސްފަންނާއި އުސްފަސްގަނޑާއި އިންޑަސްޓްރިއަލް ޒޯން ނޫން ތަނަކަށް އެއްވެއްޖެ ނަމަ އެ އެއްވުމެއް ބާރުގެ ބޭނުންކޮށްގެން ރޫޅާލާނެ ކަމަށް ފުލުހުން އަންގާ އިއުލާނު ކުރީ ހުކުރު ދުވަހުގައެވެ.

އެ ވާހަކަތަކަށް އިޝާރަތްކުރައްވައި ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވީ ފުލުހުންގެ އެ އެންގުމަކީ ގާނޫނު މިވަގުތު އޮތް ގޮތުން ލިޔުން ނެރެންވާ ގޮތް ކަމަށް ލަފާކުރެވޭ ކަމަށެވެ. އެގޮތުން މާލެއަށް އެއްވުން ސަރުކާރުން ދުވަހަކު ވެސް މަނާ ނުކުރާ ކަމަށް ވެސް ރައީސް ވިދާޅުވިއެވެ.

21 އަހަރުގެ ޔުމްނު އަށް އިންސާފު ހޯދައިދިނުމަސް ކަމަށް ބުނެ ޒުވާނުން މިހާރު ކުރަމުން އަންނަ ސިލްސިލާ އިހުތިޖާޖުތަކަށް ވަރަށް ބޮޑަށް ފާޑުވިދާޅުވެ ރައީސް ވިދާޅުވީ ވަރަށް ގިނަ ފަރާތްތަކަކުން، އާންމުންނާއި ވިޔަފާރިވެރިން ހިމެނޭހެން ޒުވާނުންގެ އެއްވުމުގައި މަގުބަންދު ކޮށް މުޒާހަރާގެ ނަމުގައި ހުތުރު ބަސްތައް ބޭނުންކޮށް ކުޅިވަރު ކުޅެމުން އަންނަކަމުގެ ޝަކުވާ ކުރައްވާފައި ވާކަމަށެވެ. އެހެން ކަމުން އެފަދަ އެތަކެއް ކަންތަކެއް ހުރީމަ ފުލުހުން ނުކުމެ މުޒާހަރާ ހުއްޓުވާފައިވާ ކަމަށް ރައީސް ވިދާޅުވިއެވެ.

ކުރިން އެންގުމަކައި ނުލައި މުޒާހަރާ ކުރުމަކީ ގާނޫނުއަސާސީއިން ލިބިދޭ ހައްގަކަށް ވާއިރު، ގާނޫނާ ހިލާފަށް ބާއްވާ އެއްވުންތައް ރޫޅާލުމަށް ގާނޫނީ ބާރުގެ ބޭނުންކޮށް އެއްވުން އިންތިޒާމުކުރާ ފަރާތްތަކާމެދު ގާނޫނީ ފިޔަވަޅު އަޅައި އާންމު މަސްލަހަތު ރައްކާތެރިކުރުމަށް އަޅަންޖެހޭ އެންމެހައި ފިޔަވަޅުތައް ދިވެހި ފުލުހުންގެ ހިދުމަތުން އަޅަމުންގެ ގެންދާނެ ކަމަށް ފުލުހުން ހުކުރު ދުވަހު ނެރުނު ބަޔާނެއްގައި ބުނެފައިވެ އެވެ.

ފުލުހުން ނެރުނު ބަޔާނުގައި ބުނީ އެ ގާނޫނު ތަންފީޒު ކުރުމުގެ ގޮތުން އަޅަންޖެހޭ ފިޔަވަޅުތައް ފުލުހުން އަޅާނެ ކަމަށެވެ. ފުލުހުން އެހެން ބުނިއިރު، ގާނޫނުއަސާސީގައި ހުއްދަ ކޮށްފައި އޮތް މިންވަރަށް މުޒާހަރާ ކުރުމުގެ ހައްގު ފުޅާ ކުރުމަކީ ރައީސް މުހައްމަދު މުއިއްޒުގެ ރިޔާސީ ވައުދެކެވެ.