ދިވެހި ޓޭބަލް ޓެނިސް އެކެޑަމީ، ''އިހާ'' އާއި ތޮއްޑޫ ލޯކަލް އޮތޯރިޓީ ކުންފުނި ގުޅިގެން ބާއްވާ ތޮއްޑޫ މާސްޓަސް ޓޭބަލް ޓެނިސް މުބާރާތައް މިހާތަނަށް ބޮޑު ތަރުހީބެއް ލިބިފައިވާ ކަމަށާއި އެ މުބާރާތުގައި ބައިވެރިވުމަށް މިހާތަނަށް 18 ގައުމަކުން 110 ކުޅުންތެރިން ރެޖިސްޓަރ ވެފައިވާ ކަމަށް އެ އެކެޑަމީން ބުނެފި އެވެ.

މުބާރާތުގެ އެންމެ ފަހުގެ މައުލޫމާތު ދިނުމަށް ބުރާސްފަތި ދުވަހު ޓީޓީ ހޯލުގައި ބޭއްވި ޕްރެސް ކޮންފަރެންސެއްގައި، އިހާ އެކަޑަމީގެ އެޑްވައިޒަރު ސީވީޑް އަހުމަދު ލަތީފް ވިދާޅުވީ މި މުބާރާތަށް އުއްމީދު ކުރިވަރަށް ވުރެ ބޮޑު ތަރުހީބެއް ލިބިފައިވާކަމަށެވެ. އެގޮތުން މި މުބާރާތުގައި ޗައިނާ، އިންޑިއާ، ނޭޕާލް، ރަޝިއާ، ސިންގަޕޫރު، އަދި ތުރުކީ ހިމެނޭހެން އެކި ގައުމުތަކުން މޮޅެތި ކުޅުންތެރިންތަކެއް ވާދަކުރާނެ ކަމަށެވެ.

އަދި އޭގެ ތެރޭގައި މާސްޓާސް ވޯލްޑް ޗެމްޕިއަނުން ވެސް ހިމެނޭނެ ކަމުގައި ވެސް މާސްޓާސް މުބާރާތްތަކުގައި ރާއްޖެ ތަމްސީލުކޮށްފައިވާ ކުރީގެ ޓީޓީ ޗެމްޕިއަން ލަތީފް ވިދާޅުވި އެވެ.

ޓޭބަލް ޓެނިސްގައި މާސްޓާސް ކެޓެގަރީއަކީ ތަޖުރިބާކާރު ކުޅުންތެރިންނަށް ޚާއްސަކޮށްފައިވާ ކެޓެގަރީއެއް ކަމަށްވާއިރު، މިއީ ރާއްޖޭގައި ބާއްވާ މިފަދަ ފުރަތަމަ މުބާރާތެވެ.

އެ މުބާރާތުގައި ރެޖިސްޓާ ކުރުމަށް ހުޅުވާލީ މިދިޔަ ޖަނަވަރީ މަހު 13އިން ފެށިގެން މިދިޔަ މަހުގެ ނިޔަލަށެވެ.

ސްޕޯޓްސް މިނިސްޓްރީ އާއި ޓީޓީ އެސޯސިއޭޝަނުގެ އެއްބާރުލުމާ އެކު ބާއްވާ މި މުބާރާތް އޮންނާނީ ތޮއްޑޫ ސްކޫލުގެ މަލްޓި ޕާޕޯސް ހޯލުގަ އެވެ. އެތަނަށް ބޭނުންވާ ވަސީލަތްތައް ހަމަކުރުމުގެ މަސައްކަތް މިހާރު އަންނަނީ ކުރަމުންނެވެ. އެގޮތުން މުބާރާތް ފެށެން ވާއިރަށް އެތަން އެއާ ކޮންޑިޝަން ވެސް ކުރާނެ އެވެ.

އެ މުބާރާތާ ގުޅޭ ގޮތުން ތޮއްޑޫ ކައުންސިލްގެ ރައީސް އަހުމަދު ކަރަމް ވިދާޅުވީ، މުބާރާތް ކުރިޔަށް ގެންދަނީ ކުޅުމުގެ އިތުރުން ބައިވެރިންނަށް ޗުއްޓީ ހޭދަ ކޮށްލެވޭ ގޮތަށް ކަމަށެވެ. އެކަމުގެ ސަބަބުން ތޮއްޑޫގެ ލޯކަލް ޓޫރިޒަމް އިތުރަށް ފުޅާވާނެ ކަމަށް އޭނާ ވިދާޅުވިއެވެ.

އަދި އެ މުބާރާތުގެ އެއް ބޭނުމަކީ ތޮއްޑުއަށް ސްޕޯޓްސް ޓޫރިޒަމް ތައާރަފުކޮށް، ލޯ ސީޒަނުގައި ވެސް ގެސްޓް ހައުސްތައް ފުރާލެވޭނެ މަގުކޮށުން ކަމަށާއި އަދި ސްޕޯޓްސް ޓޫރިޒަމް ފުޅާކުރުމަކީ ސަރުކާރުގެ ވެސް ވިސްނުމެއް ކަމަށެވެ.

ކަރަމް ވިދާޅުވީ އެ މުބާރާތް ކުރިޔަށް ގެންދިޔުމަށް ހަމަޖެހިފައިވަނީ ސުކޫލުގެ ފަރާތުން ކަލްޗަރަލް އެކްސްޗޭންޗް ޑޭ ފާހަގަ ކުރާ ދުވަސްވަރެއްގައި ކަމަށާއި އެހެންކަމުން ދަރިވަރުންނަށް ވެސް ފަތުރުވެރިންނާ ގުޅޭ ކަމެއް ކުރިޔަށް ގެންދެވޭނެ ކަމަށެވެ. އަދި މުބާރާތް ހުޅުވުމަށް ވެސް ހަރަކާތްތަކެއް ކުރިޔަށް ގެންދިޔުމަށް ރާވާކަމަށް ވެސް އޭނާ ވިދާޅުވި އެވެ.

ޓީޓީ އެސޯސިއޭޝަނުގެ ކުރީގެ ރައީސް ލަތީފް ވިދާޅުވީ ބޭރު ގައުމެއްގެ ސިޓީއެއްގައި ބާއްވާ މުބާރާތަކަށް ވުރެ، ރާއްޖެ ފަދަ ގައުމެއްގެ ރަށެއްގައި ބާއްވާ މުބާރާތަކުން ކުޅުންތެރިންނަށް ތަފާތު ތަޖުރިބާއެއް ކުރެވޭނެ ކަމަށާއި، މި މުބާރާތުގެ ތެރޭގައި ކުޅުންތެރިންނަށް ރާއްޖޭގެ ރީތިކަމާއި، ސަގާފަތް ދައްކައިދޭ ހަރަކާތްތަކެއް އޮންނާނެ ކަމަށެވެ.

އޭނާ ވިދާޅުވީ މުބާރާތުގެ ސަބަބުން ރާއްޖެ އަށް އިތުރު މަޝްހޫރުކަމެއް ލިބޭނެ ކަމަށާއި، ބޭނުންވަނީ ސިލްސިލާކޮށް ކޮންމެ އަހަރަކު ވެސް ކުރިއަށް ގެންދިއުން ކަމަށެވެ.

އިހާ އެކަޑަމީގެ މެނޭޖިން ޑައިރެކްޓަރު އަފްނާން އިބްރާހީމް ވިދާޅުވީ މި މުބާރާތުގެ ސަބަބުން އެ ކުޅުންތެރިންނަށް ވެސް ރަނގަޅު ތަޖުރިބާތަކެއް ލިބޭނެ ކަމަށާއި އަދި މުބާރާތުގެ ސަބަބުން ތޮއްޑޫގައި ތިބި މި ކުޅިވަރަށް ޝައުގުވެރިވާ ކުދިންނާއި، މީހުންނަށް ވެސް ފުރުސަތު ފަހިވާނެ ކަމަށް އޭނާ ވިދާޅުވި އެވެ. އެގޮތުން އިހާ އެކަޑަމީން ވަނީ މުބާރާތާ ދިމާކޮށް ތޮއްޑޫ ސްކޫލަށް ހާއްސަ ޓްރެއިނިން ޕްރޮގްރާމެއް ހިންގައިދީފަ އެވެ.

އެ މުބާރާތުގެ 40 އިންސައްތަ ބައިވެރިންނަކީ 50އާއި 59 އަހަރާ ދެމެދުގެ އުމުރުގެ މީހުންނެވެ.

އއ. ތޮއްޑޫގައި ފުރަތަމަ ފަހަރަށް ބާއްވާ މާސްޓާސް ޓީޓީ މުބާރާތް ބޭއްވުމަށް ހަމަޖެހިފައިވަނީ އެ ރަށުގައި އަންނަ އޮގަސްޓު މަހުގެ 19އިން 25އަށެވެ.