މޯލްޑިވްސް ސާރފިންގ އެސޯސިއޭޝަން (އެމްއެސްއޭ) އިން އިންތިޒާމުކޮށްގެން ބާއްވާ، ދިވެހި ސާފު ލީގުގެ ފުރަތަމަ މުބާރާތް ކެންސަލް ކުރަން އެ އެސޯސިއޭޝަނުން ނިންމައިފި އެވެ.
ދިވެހި ސާފު ލީގުގެ ފުރަތަމަ މުބާރާތް ކަމަށްވާ، ކަޅެގަލެކޮޑާ ބާއްވަން ސާރފިންގ އެސޯސިއޭޝަނުން ނިންމާފައި އޮތީ ގދ.ގައްދޫގަ އެވެ. އެ މުބާރާތް ބޭއްވުމަށް އެސޯސިއޭޝަނުން ތާވަލުކޮށްފައި އޮތީ އަންނަ ފެބްރުވަރީ މަހުގެ ފަސް ވަނަ ދުވަހުން ފެށިގެން، އަށް ވަނަ ދުވަހުގެ ނިޔަލަށެވެ.
ނަމަވެސް، ސާރފިންގ އެސޯސިއޭޝަނުން ނެރުނު ބަޔާނެއްގައި ވަނީ އެ މުބާރާތް ކެންސަލް ކުރަން ނިންމާފައިވާކަން ހާމަކޮށްފަ އެވެ. އެގޮތުން އެ މުބާރާތުގެ ހޯސްޓިންރ ޕާޓްނަރު ކަމަށްވާ، ގދ.ގައްދޫ ކައުންސިލް އިދާރާގެ މިވަގުތުގެ ޙާލަތު ނިޔާ ކުރާ ގޮތުން، މުބާރާތަށް ކުރިން ދެމުން އައި އެހީތެރިކަން ދިނުމަށް އުޒުރުވެރިވާކަން އަންގާފައިވާ ކަމަށް ސާރފިންގ އެސޯސިއޭޝަނުން ވަނީ ބުނެފަ އެވެ.
އެ ބަޔާނުގައި ވަނީ ގައްދޫ ކައުންސިލަކީ ސާރފިންގ އެސޯސިއޭޝަނާ ވަރަށް ގާތް ގުޅުމެއް އޮންނަ އިދާރާއެއް ކަމަށާއި، ދިވެހި ސާރފު ލީގު ވުޖޫދަށް ގެނައުމުގައި މުހިންމު ބައިވެރިއެއް ކަމަށް ވެސް ބުނެފަ އެވެ. އަދި ފާއިތުވި އަހަރުތަކުގައި ކަޅެގަލެކޮޑާ މުބާރާތް ކާމިޔާބު ކަމާއެކު ކުރިއަށް ގެންދިޔުމުގައި އެ ކައުންސިލުން ވަރަށް ބޮޑު އެހީތެރިކަމެއް ދީފައިވާ ކަމަށް ވެސް އެ އެސޯސިއޭޝަނުން ވަނީ ބުނެފަ އެވެ.
ސާރފިންގ އެސޯސިއޭޝަނުން ނެރުނު ބަޔާނުގައި އިތުރަށް ބުނެފައި ވަނީ، ކުރިއަށް އޮތް 2026 ވަނަ އަހަރު ގައްދޫ ކައުންސިލްގެ ޙާލަތު ރަނގަޅުވުމާ އެކު، ކަޅެގަލެކޮޑާ މުބާރާތަކީ ކުލަގަދަ އަދި ފޯރިގަދަ މުބާރާތަކަށް ވާނެ ކަމަށް އުންމީދު ކުރާ ކަމަށް ބުނެފަ އެވެ. ދިވެހި ސާފު ލީގުގެ ފުރަތަމަ މުބާރާތް ކެންސަލް ކުރަން ޖެހުނުއިރު، އެ މުބާރާތް އަލުން ބާއްވާނެ ތަނަކާއި، ތާރީޚެއް ފަހުން ހާމަކުރާނެ ކަމަށް ވެސް ސާރފިންގ އެސޯސިއޭޝަނުން ވަނީ ބުނެފަ އެވެ.
