ދިވެހި ރައްޔިތުން، 2023ގެ ރިޔާސީ އިންތިޚާބާއި 2024ގެ މަޖިލީސް އިންތިޚާބުގެ މެޖޯރިޓީ މި ސަރުކާރަށް ދިނީ ޤާނޫނުއަސާސީ ނަގާ ވީދާލާނެ ކަމަށް ވިސްނައިގެން ނޫން ކަމަށް އެމްޑީޕީގެ ކުރީގެ ޗެއަރޕަރސަން އަދި ރައްޔިތުންގެ މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކު ވިދާޅުވެއްޖެއެވެ.
އޭނާ އެފަދައިން ވިދާޅުވީ "ފުދިއްޖެ، ފުނޑިއްޖެ" ކަވަރޭޖްގައި ވާހަކަދައްކަވަމުންނެވެ.
މޫސަ ވިދާޅުވީ ވެރިކަން ލިބުމަށް ފަހު މަޖިލީހުގެ މެޖޯރިޓީ ލިބުމުން ސަރުކާރުން ކަންކަން ކުރަމުން ދަނީ ހިތުހުރި ގޮތަކަށް ކަމަށާއި އެއީ ލަދުވެތިކަމެއް ކަމަށެވެ.
ޤާނޫނުއަސާސީގެ 27 ވަނަ މާއްދާއިން ޚިޔާލުފާޅުކުރުމުގެ މިނިވަންކަން ދީފައިވާ އިރު އެ ހައްގުގެ ބޭނުން ފުރިހަމައަށް ހިފަން ޖެހޭ ކަމަށް މޫސަ ވިދާޅުވިއެވެ. 31 ވަނަ ދުވަހު އެމްޑީޕީން ޤާނޫނުއަސާސީ ދިފާއުކުރަން ނުކުންނަނީ ޤާނޫނުއަސާސީ ބައްޓަންކުރި ގޮތާއި ޚިލާފަށް އެތައް ކަމެއް މި ސަރުކާރުން ކުރަމުންދާތީ ކަމަށް އޭނާ ވިދާޅުވިއެވެ. ޤާނޫނުއަސާސީ ވުޖޫދަށް ގެނައީ ވެސް ދިވެހިންގެ ހައްގުތައް ހޯދުމުގެ މަޤްސަދުގައިކަން ފާހަގަކުރައްވާ މޫސަ ވަނީ ޤާނޫނުއަސާސީ ވުޖޫދަށް ގެނެސްފައި ވަނީ އެތައް ޒަމާނެއް ވަންދެން އެތައް ބަޔަކު ކުރި ބުރަ މަސައްކަތުގެ ނަތީޖާއެއްގެ ގޮތުންކަމަށް ފާހަގަކުރައްވާފައެވެ. އެ ޤާނޫނުއަސާސީ ވުޖޫދަށް ގެނައީ އަސާސީ ހައްގުތައް ގެއްލި ރާއްޖެ ބަނަ ހާލަތަކަށް ވެއްޓިފައި ވަނިކޮށް ކަމަށާއި މިހާރު އަނެއްކާވެސް ރާއްޖެ ދަތުރުކުރަނީ އެ ދިމާލަށް ކަމަށް މޫސަ ވަނީ ވިދާޅުވެފައެވެ.
ޤާނޫނުއަސާސީ ހިމާޔަތް ނުކޮށްފި ނަމަ މާދަމާ މަޖިލީހުން ރާއްޖޭގައި ހުރިހާ ދީނަކަށް އުޅެވިދާނެ ކަމަށް ވެސް ނިންމާފާނެކަމުގެ ބިރުވެރިކަން އޮތް ކަމަށް މޫސަ ވިދާޅުވިއެވެ. ސަރުކާރުން އާއްމުން މަގުމައްޗަށް ނުކުމެދާނެތީ ވަރަށް ބިރު ގަންނަ ކަމަށާއި ސަބަބަކީ ސަރުކާރަށް ތާއީދު ނެތް މިންވަރު ހާމައަށް ފެނިގެންދާތީ ކަމަށް އޭނާ ވަނީ ވިދާޅުވެފައެވެ.
މާދަމާ ނިންމަންވީ ބަޔަކު މީހުން ދިވެހިރާއްޖޭގައި ހުރިހާ ދީނަކަށް އުޅެވޭނެއޭ. އެހިސާބުން އެކަން އެ ދިޔައީ. މަޖިލީހުގެ މެޖޯރިޓީގެ ބޭނުން ހިފައިގެން. އެކަމާއި އަޅުގަނޑު ބިރު ގަންނަނީ ޖެހިލުން ވަނީ. ސަރުކާރުގަ ތިބި މީހުން ވަރަށް ބިރު ގަންނާނެ މަގުމައްޗަށް ނުކުންނަ ވާހަކަ ދައްކަންޏާ. ބިރުގަންނާނެތާ ތާއީދު ނެތްކަން ފެނިގެންދާނެތާ. މިހާރު ވަރަށް ބިރު ގަންނާނެ އެކަމާ.އެމްޑީޕީގެ ކުރީގެ ޗެއަރޕަރސަން އަދި ރައްޔިތުންގެ މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކު
މޫސަވަނީ ޤާނޫނުއަސާސީ އައުމުގެ ކުރިން ހައްގުތައް ހުރީ ވަރަށް ބޮޑަށް ހަނިވެ ހިފެހެއްޓިފައި ކަމަށް ފާހަގަކުރައްވާފައެވެ. އޭރު މަތީ ތައުލީމް ވެސް ހާސިލްކުރެވެނީ ވަކި ބަޔަކަށް ކަމަށާއި، މަޤާމްތައް އަދާކުރެވެނީ ވެސް ވަކި ބަޔަކަށް ކަަމަށް މޫސަ ވިދާޅުވިއެވެ. އާއްމު ރައްޔިތުންނަށް ހަމަހަމަކަން ހޯދައިދިނީ ޤާނޫނުއަސާސީން ކަމަށް މޫސަ ވަނީ ވިދާޅުވެފައެވެ. އެހެންކަމުން އެ ޤާނޫނުއަސާސީގެ ބާރުތައް ކަނޑުވާލާތަން ބަލަން އާއްމުން ނުތިބޭނެ ކަމަށް އޭނާ ވިދާޅުވިއެވެ.
މޫސަ ވަނީ ޤާނޫނުއަސާސީގެ ދިފާއުގައި ތެދުވުމަށް އާއްމުންނަށް ގޮވާލާފައެވެ. ހައްގުތައް ހިމާޔަތްކުރުމަށް ބަސް ނުބުނާ ނަމަ ފަހުން ކަންކަން މާ ގޯސްވާނެ ކަމަށް މޫސަ ވަނީ ވިދާޅުވެފައެވެ.
