އިސްރާއީލުގެ ސަލާމަތީ ކެބިނެޓުން ހުކުރު ދުވަހު ވޯޓު ނަގައި، އަންނަ އާދިއްތަ ދުވަހު އަމަލު ކުރަން ފަށާ ޣައްޒާގެ ހަނގުރާމަ ހުއްޓާލުމާއި ރަހީނުން ދޫކޮށްލުމުގެ އެއްބަސްވުމަށް ހުއްދަދީފި ކަމަށް ބޮޑުވަޒީރުގެ އޮފީހުން ބުނެފިއެވެ.

ދެން އޮންނާނީ ނަތަންޔާހޫގެ ފުލް ކެބިނެޓުން މި އެއްބަސްވުން ފާސް ކުރުން ކަމަށްވެސް ބުނެފައިވެއެވެ. ފައިނަލް އެޕްރޫވަލް މުޅި ކެބިނެޓުން ލިބުމުން މި އެއްބަސްވުމުގެ ދަށުން، ޣައްޒާގައި ހިނގަމުންދާ އަނިޔާވެރި ހަނގުރާމައިގައި އިސްރާއީލުން ދެމުންދާ ހަމަލާތަކާއި ބޮންއެޅުން ނިމުމަކަށް އަންނާނެއެވެ.

މީގެ އިތުރުން، 2023 ވަނަ އަހަރުގެ އޮކްޓޯބަރު 7 ވަނަ ދުވަހު ހަމާސް އިން އިސްރާއީލަށް ދިން ހަމަލާއާ ގުޅިގެން ޣައްޒާގައި ހިފަހައްޓާފައިވާ އިސްރާއީލުގެ ރަހީނުން އާދީއްތަ ދުވަހު ދޫކޮށްލަން ފަށާނެއެވެ.

ޤަޠަރު، އެމެރިކާ އަދި މިޞްރު މެދުވެރިވެގެން ވެވުނު މި އެއްބަސްވުމުގެ ދަށުން، ކުރިއަށް އޮތް ހަފްތާތަކުގައި އިސްރާއީލުގެ ޖަލުތަކުގައި ތިބި އެތައް ސަތޭކަ ފަލަސްޠީނު ގައިދީން މިނިވަންވާނެއެވެ.

މި އެއްބަސްވުން އިޢުލާންކުރި ފަހުން ވެސް އިސްރާއީލުގެ ހަމަލާތަކުގައި ގިނަ އަދަދެއްގެ މީހުން ފަލަސްތީނުން ޝަހީދުވެފައިވެއެވެ.

އިސްރާއީލުގެ ސިފައިން ބުރާސްފަތި ދުވަހު ބުނެފައިވަނީ ފާއިތުވި 24 ގަޑިއިރުގެ ތެރޭގައި ޣައްޒާގެ 50 ށް ވުރެ ގިނަ ތަންތަނަށް ހަމަލާދީފައިވާ ކަމަށެވެ.

މުޅި ކެބިނެޓުން މި އެއްބަސްވުމަށް ހުއްދަދިނުމަށް ހުކުރު ދުވަހުގެ ފަހުގެ ވަގުތެއްގައި ބައްދަލުވުމެއް ބާއްވާނެ ކަމަށް ރިޕޯޓުތައް ބުނެއެވެ. ހަނގުރާމަ ހުއްޓާލުމުގެ އެއްބަސްވުމަށް ޢަމަލުކުރަން ފަށާނީ ޑޮނަލްޑް ޓްރަމްޕް އެމެރިކާގެ ރައީސް ކަމަށް ހުވާކުރެއްވުމުގެ އެއް ދުވަސް ކުރިންނެވެ.

މި ހުށަހެޅިފައިވާ އެއްބަސްވުމަކީ "ހަނގުރާމައިގެ މަޤްޞަދުތައް ހާސިލުކުރުމަށް އެހީތެރިވާ" އެއްބަސްވުމެއް ކަމަށް ބުނެ، ބޮޑުވަޒީރު ބެންޖަމިން ނަތަންޔާހޫގެ އޮފީހުން އިޢުލާން ކޮށްފައިވަނީ ސަލާމަތީ ކެބިނެޓުން ސަރުކާރަށް މި އެއްބަސްވުން ފާސްކުރުމަށް ލަފާދީފައިވާ ކަމަށެވެ.

ނަތަންޔާހޫގެ އޮފީހުން ކުރިން ބުނެފައިވަނީ އާދީއްތަ ދުވަހު ހަމާސް އިން ހައްޔަރު ކޮށްފައިވާ ރަހީނުން ދޫކޮށްލަން ފަށާނެ ކަމަށެވެ.