އިނގިރޭސި ޕްރިމިއަރ ލީގުގައި ނޮޓިންހަމް ފޮރެސްޓާ ދެކޮޅަށް ކުޅުނު މެޗުން އެއްވަރުވެ، ލީޑު ފުޅާ ކުރުމުގެ ފުރުސަތު ލިވަޕޫލުން ނަގާލައިފި އެވެ.

ފޮރެސްޓުގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު ނިމުނީ 1-1 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ފޮރެސްޓުންނެވެ. ނަމަވެސް މެޗުގެ ދެ ވަނަ ހާފުގައި ލަނޑު ޖަހައިގެން ލިވަޕޫލް ވަނީ އެއްވަރުކޮށްފަ އެވެ. ފޮރެސްޓު މެޗުން މޮޅުވެ، އެއް ވަނައިގައި ލީޑު ފުޅާ ކުރުމުގެ ފުރުސަތު ލިވަޕޫލަށް އޮތެވެ.

މެޗު ފަށައިގެން އަށް ވަނަ މިނެޓުގައި ފޮރެސްޓުގެ ކްރިސް ވުޑް ވަނީ ލިވަޕޫލް ކޮޅަށް ލަނޑު ޖަހައި، އެ ޓީމަށް ކުރި ހޯދައިދީފަ އެވެ. އެ ލަނޑު އޭނާ ޖެހީ އެންތަނީ އެލަންގާ ތަނަވަސްކޮށްދިން ފުރުސަތެއްގަ އެވެ. މެޗުގައި ލިވަޕޫލުން ނަތީޖާ ހަމަހަމަ ކުރީ ޑިއޭގޯ ޖޮޓާ ޖެހި ލަނޑުންނެވެ. މެޗުގެ 66 ވަނަ މިނެޓުގައި ޖޮޓާ އެ ލަނޑު ޖެހީ ކޮސްޓަސް ސިމިކާސް ތަނަވަސްކޮށްދިން ފުރުސަތެއްގަ އެވެ.

ލީގު ތާވަލްގެ އެއް ވަނައިގައި ލިވަޕޫލަށް އޮތީ މިހާތަނަށް އެ ޓީމު ކުޅެފައިވާ 20 މެޗުން 47 ޕޮއިންޓާ އެކު އެވެ. ލިވަޕޫލް އަތުން ހޯދި ޕޮއިންޓާ އެކު ފޮރެސްޓަށް ދެ ވަނައިގައި ލިބެނީ 41 ޕޮއިންޓެވެ. ލިވަޕޫލަށް ވުރެ އެއް މެޗު މަދުން ކުޅެގެން ތިން ވަނައިގައި އާސެނަލަށް ލިބެނީ 41 ޕޮއިންޓެވެ. އާސެނަލް ދެން ކުޅޭ މެޗުން މޮޅުވެ، ފަރަގު ކުޑަ ކުރުމުގެ ފުރުސަތު އެ ޓީމަށް އޮންނާނެ އެވެ.