ބޭ އޮފް ބެންގަލް ސަރަޙައްދުގައި އުފެދިފައިވާ ކޮޅިގަނޑުގެ އަސަރު މާދަމާއިން ފެށިގެން ރާއްޖެއަށް ކުރާނެކަމަށާއި މުޅި މި ހަފްތާގައި ރާއްޖެއަށް ވިއްސާރަވާނެކަމަށް ބެލެވޭކަމަށް މޫސުމާ ބެހޭ ޤައުމީ އިދާރާއިން ބުނެފިއެވެ.
މޫސުމާ ބެހޭ ޤައުމީ އިދާރާއިން ބުނީ ރާއްޖޭގެ ހުޅަނގު ދެކުނުން އުފެދިފައިވާ ކޮޅިގަނޑު ހުޅަނގަށް ޖެހި، ރާއްޖެ ސަރަޙައްދުގައި ބޯ ވިއްސާރަ ވިލާ އުފެދުމުގެ ފުރުޞަތު ބޮޑުކަމަށެވެ. އެހެންކަމުން މާދަމާއިން ފެށިގެން މި ހަފްތާގެ ހޮނިހިރު ދުވަހުގެ ނިޔަލަށް ރާއްޖޭގެ ބޮޑު ބަޔަކަށް ވިއްސާރަކުރާނެކަމަށް ވަނީ ލަފާކޮށްފައެވެ.
އެހެންކަމުން 13 ޖެނުއަރީ އިން ފެށިގެން 18 ޖެނުއަރީއާ ދެމެދު ރާއްޖޭގެ ބޮޑު ބަޔަކަށް ވިއްސާރަކުރާނެ ކަމަށާއި މި ވިއްސާރައިގައި ބައެއް ރަށްތަކަށް ބޯކޮށް ވާރޭވެހުމާއެކު ގުގުރާނެކަމަށް މެޓް އޮފީހުން ބުނެފައިވެ އެވެ. މީގެ އިތުރުން އާންމުވައި ގަދަވެ ކަނޑުތައް ގަދަވާނެ ކަމަށް ބެލެވޭ ކަމަށް މެޓުން ބުންޏެވެ.
މީގެއިތުރުން އުތުރާއި މެދުރާއްޖެތެރޭގެ ބައެއް ރަށްތަކަށް އުދައިގެ އަސަރުކުރުމުގެ ފުރުޞަތު އޮތްކަމަށްވެސް ވަނީ ލަފާކޮށްފައެވެ. އެހެންކަމުން މޫސުމާ ގުޅޭގޮތުން މެޓުން ނެރޭ މޫސުމީ ސަމާލުތަކާ އިންޒާރުތަކަށް ސަމާލުވުމަށް މޫސުމާ ބެހޭ ޤައުމީ އިދާރައިން ވަނީ އިލްތިމާސުކުރައްވާފައެވެ. އަދި ގެއްލުން ކުޑަކުރުމަށް އަޅަންޖެހޭ ފިޔަވަޅުތަކަށް ދުރާލާ ސަމާލުކަން ދިނުމަށްވެސް ވަނީ އިރުޝާދު ދީފައެވެ.
މި ޖެނުއަރީ މަހުގެ ފުރަތަމަ ހަފްތާގައި މުޅި ރާއްޖެއަށް ކުރި ވިއްސާރައިގައި ވެރިރަށް މާލެ ހިމެނޭގޮތަށް ގިނަ ރަށްތަކެއްގައި ފެންބޮޑުވެ ގެއްލުން ލިބިފައިވެ އެވެ.
