އެމެރިކާގެ ރައީސްގެ ފަރާތުޕުުޅުން ދޭ ޕްރެޒިޑެންޝަލް މެޑަލް އޮފް ފްރީޑަމް، އާޖެންޓީނާގެ ކެޕްޓަން ލިއޮނަލް މެސީ އަށް ދެއްވައިފި އެވެ.
ޕްރެޒިޑެންޝަލް މެޑަލް އޮފް ފްރީޑަމް އަކީ އެ ޤައުމުގައި ދެމުން އަންނަ މަދަނީ އެންމެ ޝަރަފުވެރި ލަޤަބެވެ. އެމެރިކާގެ ރައީސް ޖޯ ބައިޑަން މިފަހަރު ވަނީ ޕްރެޒިޑެންޝަލް މެޑަލް އޮފް ފްރީޑަމްގެ ލަޤަބު 19 ފަރާތަކަށް ދެއްވަން ނިންމަވައިފަ އެވެ. އޭގެ ތެރޭގައި އެމެރިކާގެ އިންޓަރ މިއާމީ އަށް ވެސް ކުޅެމުން އަންނަ މެސީ ހިމެނެ އެެވެ.
މި ލަޤަބަކީ އެމެރިކާގެ އަސާސްތަކާއި، ނުވަތަ އެ ޤައުމުގެ ސަލާމަތާއި، ދުނިޔޭގެ ސުލްޙައާއި، ނުވަތަ އެނޫން ވެސް މުހިންމު އިޖްތިމާޢީ، ޢާންމު ނުވަތަ އަމިއްލަ މަސައްކަތްތަކުގައި ނަމޫނާ ޚިދުމަތްތަކެއް ކޮށްދެއްވާފައިވާ ފަރާތްތަކަށް ދެއްވާ، އެ ޤައުމުގެ އެންމެ މަތީ މަދަނީ ޝަރަފެވެ.
އިންޓަރ މިއާމީގެ ކެޕްޓަންކަން ވެސް ކުރަމުން އަންނަ މެސީ އަންނަނީ، ލިއޯ މެސީ ފައުންޑޭޝާން މެދުވެރިކޮށް ދުނިޔޭގެ އެކި ކަންކޮޅުތަކުގައި ކުޑަކުދިންނަށް ބޭނުންވާ ޞިއްޙީ އަދި ތަޢުލީމީ ޕްރޮގްރާމްތަކަށް އެހީތެރިކަން ފޯރުކޮށްދެމުން ދަނީ، ޔުނިސެފްގެ ގުޑްވިލް އެމްބެސެޑަރެއްގެ ގޮތުގައި ވެސް މަސައްކަތް ކުރަމުންނެވެ.
އެމެރިކާގެ ރައީސް ބައިޑަންގެ އަތްޕުޅުން ދެއްވާ މި ލަޤަބު ދެއްވުމުގެ ހަފްލާގައި މެސީ ބައިވެރިވެފައެއް ނުވެ އެވެ. މުހިންމު އެހެން ކަމެއްގައި ބައިވެރިވާން ކުރިން ރާވާފައި އޮތުމުން، ލަޤަބު ދެއްވާ ޙަފްލާގައި ބައިވެރި ނުވެވޭނެ ވާހަކަ މެސީ ވަނީ ކުރިން އެމެރިކާގެ ރިޔާސީ ގަނޑުވަރު، ވައިޓްހައުސް އަށް އަންގާފައި ކަމަށް ރިޕޯޓުތައް ބުނެ އެވެ. އަދި ފަހުގެ ތާރީޚެއްގައި އެ ލަޤަބާ ހަވާލުވުމުގެ ފުރުސަތު ލިބޭނެ ކަމުގެ އުންމީދުގައި ހުރި ކަމަށް ވެސް މެސީ ވަނީ އަންގައިފަ އެވެ.
ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ދޫކޮށްލުމަށްފަހު މެސީ އިންޓަރ މިއާމީ އަށް ބަދަލުވީ 2023 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު މިއަހަރު ހަމަވާނެ އެވެ. ނަމަވެސް، މެސީގެ މުސްތަޤުބަލާ މެދު މިހާތަނަށް އޭނާ ވަކި ނިންމުމެއް ނިންމާފައެއް ނުވެ އެވެ. އިންޓަރ މިއާމީން އޮތީ މެސީގެ އެއްބަސްވުން އައު ކުރަން ބޭނުންވެފަ އެވެ.
