ރާއްޖެއަށް މިހާރު ކުރަމުންދާ ވިއްސާރައިގައި ހުކުރު ދުވަހު މާލޭގައި ފެންބޮޑުވެ، ބޮޑެތި ގެއްލުންތަކެއް ލިބުނުއިރު، ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ހުންނެވީ އާރަށުގައިކަން ރާއްޖެއެމްވީއަށް ކަށަވަރުވެއްޖެއެވެ.

މިހާރު ރާއްޖެއަށް ކުރަމުން މިދާ ވިއްސާރައިގައި މާލޭގެ އިތުރުން ރާއްޖޭގެ ގިނަ ރަށް ރަށަށް ވަނީ ގެއްލުން ލިބިފައެވެ.

ހުކުރު ދުވަހަކީ ފަހުގެ ތާރީޚެއްގައި މާލެއަށް ރެކޯޑް މިންވަރަކަށް ވާރޭވެހުނު ދުވަހެކެވެ. ހުކުރު ދުވަހުގެ ރެކޯޑަށް ބަލާއިރު އެއް ގަޑިއިރުތެރޭގައި 62 މިލިމީޓަރުގެ ވާރޭ ވަނީ ވެހިފައެވެ. ސައުވީސް ގަޑީއިރު ތެރޭގައި 140 މިލިމީޓަރުގެ ވާރޭ ވަނީ ވެހިފައެވެ. މޫސުމާ ބެހޭ އޮފީހުން ފާހަގަ ކުރާ ގޮތުގައި މާލެ އަށް އެއް ގަޑި އިރުގެ ތެރޭގައި 30 މިލި މީޓަރުގެ ވާރޭ ވެހިއްޖެނަމަ މާލޭގައި ފެން ބޮޑުވެއެވެ.

ހުއްޓުމެއް ނެތި ބޯކޮށް ވެހުނު ވާރޭގެ ސަބަބުން މާލޭގެ ގިނަ ގެތަކަށާއި ފިހާރަތަކަށް ފެންވަދެ، ބޮޑެތި ގެއްލުންތަކެއް ލިބުނުއިރު، މާލޭގެ ރައްޔިތުންގެ އެންމެ ބޮޑު ކަންބޮޑުވުމަކަށް ވެފައިވަނީ ގިނަ އިރުތަކެއް ވަންދެން މަގުތަކުން ފެން ނުހިނދި ލަސްވުމެވެ.

މިކަމާ ގުޅިގެން ބައެއް ރައްޔިތުން ވަނީ އަމިއްލައަށް ކޯރު ކަނޑައި، ވެލި ބަސްތާ ޖަހައިގެން ފެން ހިންދުމުގެ މަސައްކަތްތަކެއް އަމިއްލަ އަށް ވެސް ކޮށްފައެވެ. ފެންވަނުން ކޮންޓްރޯލް ވޭތޯ މާލޭ ސިޓީ ކައުންސިލާއި ފުލުހުން ވެސް ވެލި ބަސްތާ ޖެހުމުގެ މަސައްކަތް ކުރި އިރު، ޑިޒާސްޓަރ މެނޭޖްމަންޓް އޮތޯރިޓީން ބުނެފައިވަނީ ވެލި ބަސްތާ ޖެހުމަށާއި އެހީތެރިކަން ބޭނުންވެގެން 400 ށް ވުރެ ގިނަ ފޯނު ކޯލު ލިބުނު ކަމަށެވެ.

ސިފައިން ވަނީ މާލޭގެ މަގުތަކުގައި ބޮޑުވެފައިވާ ފެންގަނޑު ހިންދޭތޯ ޕަމްޕް ޖަހައިގެން މަސައްކަތް ކޮށްފައެވެ. އެމްއެންޑީއެފް އިން ބުނެފައިވާ ގޮތުގައި 6 ސަރަހައްދަކުން 16 ޕަމްޕް ޖަހައިގެން ފެން ހިންދުމުގެ މަސައްކަތް ކޮށްފައި ވެއެވެ.

ފެންބޮޑުުވުމުގެ ސަބަބުން ވެހިކަލްތައް ނުދުއްވި މަގުމެދަށް ހުއްޓުނު އިރު، ފުލުހުން އޮތީ ހަތަރު ފުރޮޅުލީ ދުއްވާ އެއްޗެއްސާއި ބަރު އުޅަނދުތައް މަގުތަކަށް ނުނެރުމަށް އިރުޝާދުވެސް ދީފައެވެ.

ގައުމުގައި ބޮޑު ކަމެއް ހިނގައިގެން ރައްޔިތުން އުޅުނު އިރު ރައީސް މުއިއްޒުގެ އެއްވެސް ޚަބަރެއް ނެތުމުން ބައެއް މީހުން ސޯޝަލް މީޑިއާގައި ސުވަލު އުފައްދަމުން ދިއައެވެ. ސޯޝަލް މީޑިއާގައި ފެތުރުނު ވާހަކަތަކަށް ބަލާއިރު މާލެ ފެނުއަޑީގައި އޮތް އިރު ރައީސް ހުންނެވީ ޗުއްޓީ ހޭދަ ކުރައްވަން އާރަށުގައި ކަމަށް ބައެއް މީހުން ބުނަމުން ދިޔައެވެ. ރާއްޖެއެމްވީން މިކަން ކަށަވަރު ކުރުމަށް ކުރި މަސައްކަތުން ރާއްޖޭގެ ގިނަ ރަށްތަކެއްގައި ފެންބޮޑުވެ ރައްޔިތުން ހާސް ކަމުގެ ތެރޭގައި އުޅެމުން ދިޔައިރު ރައީސް ހުންނެވީ އާ ރަށުގައި ޗުއްޓީ ހޭދަކުރެއްވުމަށެވެ. މި ނާޒުކު ހާލަތުގައި ރައީސުލްޖުމްހޫރިއްޔާ އާރަށުގައި ހުންނެވުމާ ގުޅޭގޮތުން ގިނަ ރައްޔިތުން ވަނީ ވަރަށް ބޮޑަށް ފާޑު ކިޔާފައެވެ.

ހުކުރު ދުވަހު ކުރި ވިއްސާރައިގައި ފެން ބޮޑުވުމުގެ ސަބަބުން ގެއްލުން ލިބުނު 36 ގޭބިސީން 226 މީހަކަށް ވަގުތީ ބޯހިޔާވަހިކަމާއި ކާބޯތަކެތި ފޯރުކޮށްދެވިފައިވާ ކަމަށް ނެޝަނަލް ޑިޒާސްޓަރ މެނޭޖްމެންޓު ސެންޓަރުން ވަނީ ބުނެފައެވެ.

މޫސުން ރަނގަޅުވާނެ ކަމަށް ލަފާކުރެވެނީ ހޯމަ ދުވަހުން ފެށިގެން ކަމަށް މޫސުމާއި ބެހޭ ޤައުމީ އިދާރާއިން މިހާރު ވަނީ ބުނެފައެވެ. ކުރިއަށް އޮތް ދުވަސްތަކުގައިވެސް ވިއްސާރަވެ، ވާރޭވެހުމުގެ ފުރުސަތު އޮތްކަމަށް ބުނެފައިވާއިރު، ރައްޔިތުންނަށް ވަނީ ރައްކާތެރިކަމުގެ ފިޔަވަޅުތައް އެޅުމަށް އިލްތިމާސްކޮށްފައެވެ.

މާލޭގެ ހާލަތު މި ފަހުގެ ތާރީޚެއްގައި ނުދާ މިންވަރަށް ގޯސްވެގެން ދިޔައިރު، މިދިޔަ އަހަރު ކުރި ވިއްސާރައިގައި ރައީސް މުއިއްޒު މަގުތަކަށް ނުކުންނަވާ ގޭގެއަށް ވަންނަވާ ވަޒީރުންނާ ސަރުކާރުގެ ވެރިން އެމަނިކުފާނުގެ އަރިހުގައި އުޅުއްވަމުން ދިޔަ ނަމަވެސް މިފަހަރުގެ ހާދިސާގައި މަދު ވެރިޔަކު ނޫނީ ހިލަމެއް ވެފައެއް ނުވެއެވެ.

ރާޢްޖޭގެ ބޮޑު ބަޔަކަށް ވިއްސާރަކޮށް ގިނަ ރަށްތަކެއްގައި ފެން ބޮޑުވި ދަނޑިވަޅަކީ އައު އަހަރުގެ ޗުއްޓީގެ ދުވަސްތައް ކަން ފާހަގަ ކުރެވެއެވެ.